Read bahnar Esa 18 Bible Online

Esa 18 - bahnar bible

Esa 18

¹Răm-'băm tơpă kơ teh đak đei re jơwa thoi tơtuh pơnăr noh jơ̆ teh đak pah to lu krong lăm char Kus.

²Ih wơh lu bơngai pơtruh nơ̆r tŏk đak dơsĭ, hao thŏng-nan pik hăm chai đông kơpal đak! Ơ lu bơngai năm pơtruh nơ̆r hơbĕch hơbal, năm tơ teh đak lu bơngai kơjung akar rơmuăn. Tơ kon pơlei mă jê̆ mă ataih hli ngăl; minh pôm teh đak đei bơngai pran kơtang, chă tơgar pơjuă pơđep lu sư pơma nơ̆r phara krưp. Dêh char đei lơ chơnglah krong klah asong teh đak sư.

³Ơ đĭ-đăng kon pơlei pơla lăm teh đak oei kơpal teh kơplah đe pơdơ̆ng hla-kơ kơpal kông iĕm gô lăng 'bôh mưh đe hlôm tơgiĕp iĕm gô kơtơ̆ng.

⁴Kră Yang khan bơih kơ inh thoi âu: “Inh gô oei hreh păng Inh gô răp lăng đơ̆ng anih Inh oei, thoi drang tŏ pơchrang hơdah đơ̆ng măt 'năr, thoi hơiuh đak ngom năr tŏ bơyan yuă.”

⁵Adrol kơ bơyan yuă, kơplah pơkao đĭ wă plei. Păng pơkao hơmu đĭ plei wă jê̆ đum, na Kră Yang gô iŏk săng kô kăt lê̆ lu tơ'biĕng păng lu dơng bluh hla dêh.

⁶Đe gô tŭk lê̆ lu sư ăn kơ sem păr tơ lăm kông sa, păng ăn kơ sem bri tơ ala teh sa, lu sem păr gô sa lu sư lăm bơyan phang păng lu sem bri brah gô sa lăm bơyan tơngiĕt.

⁷Lăm kơplah noh, lu adrĕch adrung bơngai kơjung akâu akar rơmuăn, jơ̆ lu adrĕch adrung krưp dêh, kon pơlei mă jê̆ mă ataih hli ngăl, minh pôm teh đak đei bơngai pran kơtang chă tơgar pơjuă pơđep, teh đak đei lơ chơnglah krong klah asong teh đak sư, adrĕch adrung noh bơih gô chĕp ba tơmam pơyơ̆r ăn kơ Kră Yang Tih Hloh, lăm anih 'măn kơ anăn Kră Yang Tih Hloh oei, jơ̆ kông Siôn.