Read bahnar Esa 22 Bible Online

Esa 22 - bahnar bible

Esa 22

¹Nơ̆r khan lê̆ adrol gah thŭng tơdrong tơ'bôh. Lu iĕm đei tơdrong kiơ mă đĭ-đăng lu iĕm tŏk hao bơbŭng hnam thoi noh?

²Ơ pơlei ôr tơkĕch, ơ-ôs ơ-as, pơlei mă chơt hiôk, pơm kư̆ kă lu khŭl iĕm lôch ưh trŏ kơ lôch yua kơ đao gưm kư̆m ưh kơ trŏ lôch yua kơ tơblah.

³Đĭ-đăng lu kră pơgơ̆r lu iĕm lu sư wang kơdâu chă ôn, đe rôp chô̆ lu sư, ưh kơ đei yua hră ôh. Đe rôp đĭ bơih lu kon pơlei iĕm, mă đe đei chă 'bôh, mă khan lu sư kơdâu ataih bơih ră.

⁴Thoi noh na inh khan: “Iĕm 'nĕ lăng tơ inh, lê̆ inh nhơ̆m ơh ol, 'nĕ chă pơlung inh yua kơ tơdrong pơrăm lu kon pơlei inh!

⁵Kră Yang Tih Hloh pơkă bơih, gô đei minh năr tơdrong rŭng răng, pơjuă pơđep iung blah lăm anih thŭng tơdrong tơ'bôh, lu dur pơlei pơchah hơlih, nơ̆r krao ôr dŏng jơwa truh tơ kông.

⁶Lu đe Êlam tơ̆n jŏ 'brơ̆m hră, năm kiơ̆ đei gre aseh hăm lu linh hao aseh, lu bơngai Kir chĕp khêl.

⁷Rim anih thŭng ih 'lơ̆ng hloh đĭ-đăng noh tă 'bĕnh-'bang kơ gre aseh, păng lu linh hao aseh pơrĕng bơih wă tơblah tơ 'măng jang pơlei.

⁸Sư iŏk lê̆ bơih tơmam bơwei dêh char Juđa, păng lăm năr noh iĕm gơnang kơ tơmam wă tơblah đơ̆ng hnam mong lăm bri.

⁹Lu iĕm 'bôh lơ trong hơđang pơchah lăm pơlei Đawit; na iĕm mong đak đơ̆ng dơnâu gah ala.

¹⁰Lu iĕm jô̆ hnam lăm pơlei Jêrusalem, teh pơchah lu hnam noh, wă hơmet ming dur pơlei kơjăp.

¹¹Lu iĕm pơm sơlŭng dơnâu plah sơlam dur pơlei wă mong iŏk đak đơ̆ng đak dơnâu so. Mă-lei iĕm ưh kơ gơnang ôh kơ Tơ'ngla pơm tơdrong noh, iĕm kư̆m ưh kơ lăng ôh tơ Tơ'ngla hơmet lê̆ wă pơm tơdrong noh đơ̆ng sơ̆.

¹²Lăm năr noh Kră Yang Tih Hloh krao lu iĕm athei nhơ̆m hmoi, ơh sơ'ngon, hơkôih sŏk, hrŭk ao 'bi.

¹³Mă-lei lăng to lăm lu iĕm đei tơdrong chơt hiôk kư̆ kă 'bet sa rơmo, 'buh sa triu, sa 'nhĕm, et tơdrô: “Et sa bĕ yua kơ dơning bơ̆n gô lôch!”

¹⁴Kră Yang Tih Hloh roi tơbăt lăm đon inh: “Tơdrong yoch 'nâu ưh kơ gơh mơnat ăn ôh dĭng truh năr lu iĕm lôch.” Kră Yang Tih Hloh khan thoi noh.

¹⁵Kră Yang Tih Hloh khan: Ih năm bĕ truh tơ noh, Sepna bơngai bơ̆jang wei-lăng hnam pơtao păng khan kơ sư:

¹⁶Ih oei tơ âu pơm kiơ? Bu ăn kơ ih oei tơ âu? Mă ih mah sir anih pơm bơsat kơ ih tơ âu? Ih sir bŏk kơ ih minh anih tơ kơpal, sir bŏk anih ih lăm tơmo.

¹⁷'Nâu, ơ bơngai pran kơtang Kră Yang gô klơ̆m lê̆ ih kơtang mơ̆n. Sư gô rôp ih kơjăp.

¹⁸Sư gô lôm ih, lôm kơjăp thoi 'bŏng-lŏng klơ̆m ih tơ dêh char să rơhơi ih gô lôch tơ noh, anih mă lu gre aseh ih, ih jơ̆ bơngai pơm kơ hnam tơ'ngla ih mơlâu.

¹⁹Inh gô tơlĕch lê̆ ih, gô puh tơweh lê̆ ih đơ̆ng anih ih jang.

²⁰Lăm năr noh, Inh gô krao đam Inh Êliakim kon drŏ-nglo Hilkia.

²¹Iŏk ao ih pơhrŭk ăn kơ sư, tơ̆n ăn kơ sư tơlei tơ̆n ih, iŏk tơdrong pơgơ̆r đơ̆ng ih pơjao ăn lăm ti sư, sư gô pơm 'bă kơ kon pơlei oei lăm Jêrusalem păng bơngai Juđa.

²²Inh gô dan khuă hnam Đawit kơpal hơngiĕng sư, mưh sư pơih ưh kơ đei bu gơh tang, mưh sư tang ưh kơ đei bu gơh pơih.

²³Inh gô pơ̆ng sư thoi đe pơ̆ng kơđĭnh 'bơ̆t anih kơjăp păng sư gô jing minh 'nu đe ư-ang ăn kơ hnam 'bă sư.

²⁴Đe gô hơtol kơpal sư dôm tơdrong ư-ang hnam 'bă sư, đơ̆ng kon hơ'lơ̆p, adrĕch adrung păng đĭ-đăng tơmam yua tih iĕ đơ̆ng pơnhan kơthao truh tơ ge gŏ.

²⁵Kră Yang Tih Hloh khan: Lăm năr noh, kơđĭnh đêl pơ̆ng 'bơ̆t anih kơjăp gô tơtoh, đe gô lê̆ sư, sư gô huŏng, tơmam trăp hơtol kơpal sư gô koh kơtĕch lê̆. Kră Yang khan thoi noh.