Read bahnar Esa 24 Bible Online

Esa 24 - bahnar bible

Esa 24

¹'Nâu Kră Yang gô pơrăm teh, pơm kơ teh jing juơ rơhiăng, sư gô blơ̆ pơrăm lê̆ teh đak păng pơm kơ kon pơlei tơklah tơklang.

²'Bok soi kư̆m thoi kon pơlei, yŏng tơ'ngla jing thoi đam sư, yă yŏng tơ'ngla kư̆m thoi đam drŏ-kăn sư, bơngai tĕch kư̆m thoi bơngai răt, bơngai ăn mưng kư̆m thoi bơngai iŏk mưng, bơngai đe hre kư̆m thoi bơngai oei hre.

³Teh đak âu gô pơrăm đĭ ưh pă đei kiơ đe gô plah tơgar iŏk đĭ, yua kơ Kră Yang đei khan bơih nơ̆r 'nâu.

⁴Teh đak kro krĕnh păng jô hŏnh, dêh char âu ơh sơ'ngon păng jô hŏnh, lu bơngai đe ư-ang dêh đĭ rơdu rơmơ̆n.

⁵Teh đak âu jing kơnê̆ 'mê̆ mach, đơ̆ng kon pơlei pơm yoch. Ưh kơ kiơ̆ khôi juăt, pơm yoch hăm nơ̆r tơtă, pơm glăi hăm tơdrong pơgơ̆p ling-lang.

⁶Thoi noh na tơdrong hiap luăn sa teh đak. Lu kon pơlei oei kơpal teh âu, đei pơmat-tat yua kơ tơdrong yoch lu sư kơdih. Yua kơ noh kon bơngai oei kơpal teh ŭnh sa bơih. Păng pă tŏ sĕt đĕch bơngai oei đei.

⁷Sik hơmu 'nao đĭ hrơ̆, tơm hơmu đĭ jô kro, lu bơngai juăt đei jơhngơ̆m chơt đĭ tơtok tơtăm.

⁸Re hơgơ̆r iĕ chơt hiôk ưh pă đei dơ̆ng, jreo 'nă hal ưh pă đei bơih, jơwa đe reh brŏ chơt hiôk kư̆m đĭ tôch.

⁹Đe kư̆m ưh pă đei et sik hơri rah dơ̆ng; lu bơngai hơmui kơ sik et sik đĭ tăng.

¹⁰Pơlei đei tơdrong truh pơchah đĭ bơih, rim hnam tang chơkăl lê̆ 'măng, ưh kơ đei bu gơh mơ̆t.

¹¹Đe ôr tơ rok trong lăm pơlei yua kơ tơdrô ưh pă đei; tơdrong chơt đĭ pă đei. Tơdrong 'nă hal lăm teh đak đĭ hiong!

¹²Lăm pơlei kơkot rơhiăng, 'măng jang pơchah đĭ bơih.

¹³Adrĕch adrung kon bơngai oei kơpal teh âu gô đei thoi noh. Nhen thoi tơm 'long ôliwơ đĭ hơlŭng đơ̆ng đe gơgŭ păng thoi đe chă mok plei hơmu đơ̆ng rŏng kơ bơyan đe phĕ plei.

¹⁴Lu sư gô jreo 'nă hal đơ̆ng đak dơsĭ gah bơmơ̆t, lu sư ư-ang tơdrong hơbŏ rŏ Kră Yang.

¹⁵Thoi noh ư-ang bĕ kơ Kră Yang ơ lu bơngai oei lăm teh đak gah hơlĕch, ư-ang bĕ kơ anăn Kră Yang 'Bok Kei-Dei đe Isơrael ơ lu bơngai oei lăm lu bŏl đak dơsĭ.

¹⁶Lu bơ̆n kơtơ̆ng bơih đơ̆ng tôch kơ teh đak hơri: “Ư-ang kơ Tơ'ngla 'lơ̆ng tơpăt.” Mă-lei inh khan: “Inh hiong bơih! Inh hiong răm-'băm dêh kơ inh! Lu bơngai blơ̆ blĕch hơlĕnh pơdăr, lu bơngai blơ̆ blĕch hơlĕnh pơdăr rai dêh.

¹⁷Ơ kon bơngai oei lăm teh đak, tơdrong hli tơrơ, sơlŭng jrŭ păng poh-'năk hơnhuăl oei răp gô iĕm.

¹⁸Bơngai ayơ kơdâu ôn đơ̆ng tơdrong hli tơrơ gô huŏng lăm sơlŭng; tŏk hlôi đơ̆ng sơlŭng gô hrơ̆p hơnhuăl, lu 'măng-'mŏk tơ kơpal plĕnh pơih lê̆ bơih, lu hơnă tơ ala teh pơpơ̆ đĭ.

¹⁹Plei teh pơchah hĕch hoch đĭ, teh đĭ hơđang phơ̆t, teh đĭ pơpơ̆ dêh.

²⁰Plei teh tơdrŏ 'ma 'ngiĕo nhen bơngai suai, yĕng yŏng thoi pơk gia, tơdrong yoch sư trăp dêh, sư gô pơ̆k huŏng ưh kơ kĕ iung dơ̆ng.

²¹Năr noh kơnh Kră Yang gô phak lu linh jang kơnê̆ tơ kơpal plĕnh ti păng phak lu yŏng pơgơ̆r kơnê̆ lăm teh âu.

²²Đe akŭm lu sư lăm sơlŭng păng chĭt lu sư nhen bơnă lăm hnam phak, đunh năr đe gô phak pơmat lu sư.

²³Măt khei gô ưh pă hơđơ̆ng, măt 'năr gô kơdơ̆, Kră Yang Tih Hloh gô pơgơ̆r kơpal kông Siôn, tơ pơlei Jêrusalem păng tơdrong ư-ang rang mơnhal sư gô pơdah 'bơ̆t anăp lu đe kră.