Read bahnar Esa 25 Bible Online

Esa 25 - bahnar bible

Esa 25

¹Ơ Kră Yang Ih bơih Kră Yang 'Bok Kei-Dei inh! Inh ư-ang kơ Ih, inh bơnê pôk pơư kơ anăn Ih, Ih đei pơm boih tơdrong hlĭch, tơdrong Ih pơkă lê̆ đơ̆ng sơ̆, hăm tơdrong tơpăt sĭt.

²Ih pơm bơih kơ lơ pơlei jing anih pôi teh rơ̆m rĕk, pơlei tih kơjăp jing pơchah hĕch. Pơlei hnam kơjăp lu yŏng pơtao lu bơngai tơmoi ưh pă jing pơlei dơ̆ng bơih, ưh pă đei layơ wă gơh man tơiung ming dơ̆ng.

³Noh bơih na lu kon pơlei đơ̆ng dêh char pran kơtang gô ư-ang kơ Ih, pơlei tih lu adrĕch adrung bơngai pơm kơnê̆ krưp gô hli yom kơ Ih.

⁴Ih boih Kră Yang jing anih kơjăp lu bơngai dơnuh gơnang. Pơlei hơđơ̆ng ăn kơ lu bơngai hoh kơđei kơplah năr pơmat-tat, pơm anih kơ'nơp năr kial hơbŭt, pơm yơ̆p wă huay kơ tŏ, kơplah lu bơngai pơm kơnê̆ khĕnh lu sư lĕch thoi hơyuh kial hơbŭt tơthu bah tơ dur pơlei.

⁵Thoi tŏ lăm char glă, Ih chĭt lê̆ nơ̆r ôr jơwa lu bơngai tơmoi. Ih găn lê̆ hreh nơ̆r hơri 'nă hal lu bơngai pơm kơnê̆, nhen thoi hơyuh tŏ hiong kơ yơ̆p hơmơ̆l.

⁶Tơ kơpal kông âu Kră Yang Tih Hloh gô hơmet ăn kơ rim adrĕch adrung, tơmam et sa tih. Hăm tơdrô hơmu 'lơ̆ng hloh, tơmam sa 'nhĕm rơmă bek đei 'ngăl, tơdrô hơmu 'lơ̆ng rơgoh.

⁷Tơ kơpal kông âu, Sư gô pơrăm lê̆ che pĕng măt đĭ-đăng kon pơlei pơla păng che pĕng măt đĭ-đăng teh đak.

⁸Kră Yang pơtôch lê̆ bơih tơdrong lôch hiong ling-lang, Kră Yang gô sŭt lê̆ đak măt đơ̆ng muh măt rim 'nu, păng iŏk lê̆ tơdrong mơlâu đơ̆ng kon pơlei pơla Sư đơ̆ng jơ̆p-jang kơ teh đak. Kră Yang khan thoi noh.

⁹Lăm năr noh kơnh, đe gô khan: “Âu bơih Kră Yang 'Bok Kei-Dei bơ̆n, mă lu bơ̆n đei chang gô Sư dŏng pơklaih bơ̆n. 'Nâu bơih Kră Yang mă lu bơ̆n chang gô Sư. Bĕ lu bơ̆n 'nă hal chơt hiôk kơ tơdrong Sư dŏng pơklaih!”

¹⁰Ti Kră Yang gô dan kơpal kông âu. Mă-lei teh đak Môap đe gô pơjuă pơđep tơ anih lu sư, thoi đe pơjuă hơnong lăm anih pơm 'mê̆.

¹¹Mă lu sư gô pơdăng ti lu sư lăm noh, thoi bơngai glơi đak pơdăng ti sư wă glơi, mă-lei Kră Yang gô tơhuŏng lê̆ tơdrong pơang lu sư, Mă ti lu sư yơ̆r hơwơi ră.

¹²Kră Yang gô pơrăm lê̆ dur man kơjung kơjăp noh, hơlih đĭ tơ ala, bơlih tơhuŏng lê̆ tơ teh, lăm 'mui teh.