Read bahnar Esa 32 Bible Online

Esa 32 - bahnar bible

Esa 32

¹'Nâu gô đei minh 'nu pơtao pơgơ̆r 'lơ̆ng tơpăt, lu kră pơgơ̆r gô wei-lăng tơpăt hơnơ̆ng.

²Rim 'nu bơngai nhen thoi anih kơ'nơp kơ kial, thoi anih pĕng kơ hơbŭt, nhen glung đak ro lăm anih hrĕng kro, nhen thoi yơ̆p tơmo tih lăm teh đak kro krĕnh.

³Kơplah noh măt lu bơngai lăng gô 'bôh ưh pă bơbôl, đon lu bơngai kơtơ̆ng gô pơgling mơ̆ng.

⁴Kơ̆l 'ngok lu bơngai hăt hot gô băt păng hlôh wao, hơpiĕt lu bơngai pơma hơrăk gô gơh pơma rơđah.

⁵Lu bơngai kơhlôh kơwao đe ưh pă krao sư bơngai đe pơyom, đe kư̆m ưh kơ pơyom mơ̆n bơngai hơlĕnh pơdăr.

⁶Na lu bơngai kơwao sư pơma lu nơ̆r kơtul kơwao; jơhngơ̆m đon sư pơm tơdrong yoch, 'maih pơm lu tơdrong kơnê̆, pơma tơdrong glăi gah Kră Yang, pơm kơ bơngai pơngot klak hoh, ưh kơ ăn đak nhă kơ lu bơngai rơhing.

⁷Lu bơngai hơlĕnh pơdăr yua tơdrong kơnê̆; pơđâu pơm tơdrong kơnê̆, wă pơrăm lu bơngai dơnuh hăm nơ̆r pơma hơlĕnh Mă khan lu bơngai dơnuh hoh roi khan trŏ.

⁸Mă-lei lu bơngai 'lơ̆ng sư chă đon 'lơ̆ng, sư ling-lang jang hăm tơdrong 'lơ̆ng sư.

⁹Ơ lu drŏ-kăn hiôk-hian iung bĕ mơ̆ng nơ̆r Inh! Ơ lu drŏ-kăn mă huay kơ tơtăm, pơđêng đon lu iĕm mơ̆ng nơ̆r Inh!

¹⁰Lăm minh sơnăm dơ̆ng, lu iĕm jơ̆ bơngai mă ưh kơ tơtăm, gô hli tơtơ̆ păng rŭng răng yua kơ bơyan phĕ plei hơmu iĕm ưh pă đei, păng bơyan phĕ plei nai ưh pă đei dơ̆ng mơ̆n.

¹¹Lu drŏ-kăn oei hiôk-hian, tơtơ̆ bĕ, ơ lu kon drŏ-kăn ưh kơ tơtăm hli bĕ Plôh bĕ ao lu iĕm, lê̆ akâu hoh tơ̆n bĕ 'bi tơ kơiĕng lu iĕm.

¹²Tŭr bĕ kơtơh nhơ̆m hmoi, yua kơ chŭn mir 'lơ̆ng, 'long hơmu đei plei trem pă đei boih

¹³'Long jơla hro chăt lăm teh mir kon pơlei pơla Inh, nhơ̆m hmoi kơ rim hnam chơt hiôk, kơ pơlei tih hơdrŭm ơ-ôs ơ-as.

¹⁴Đe gô lê̆ hnam pơtao kơkot rơhiăng, pơlei tih gô jing juơ, kông groi păng hnam thôt đơ̆ng âu tơ anăp gô păk răm truh tơ ning-mônh jing anih lu aseh bri păng tơmăn 'nhĕt kơ lu kon sem brem.

¹⁵Dĭng truh kơ Yang bơhngol đơ̆ng kơpal plĕnh jur tơ lu bơ̆n, char glă gô jing chŭn mir teh mơ̆r 'lơ̆ng, chŭn mir teh mơ̆r 'lơ̆ng noh chăt jing dang lĕ kơ bri brah.

¹⁶Kơplah noh tơ rim anih oei tơ char glă, oei tơ chŭn teh mơ̆r 'lơ̆ng đĭ-đăng bơngai kiơ̆ tơdrong tơpăt hơnơ̆ng păng tơdrong 'lơ̆ng tơpăt.

¹⁷Tơdrong jang 'lơ̆ng tơpăt gô jing tơdrong hiôk-hian, plei tơdrong 'lơ̆ng tơpăt gô đei hiôk hơđơ̆ng ling-lang.

¹⁸Kon pơlei Inh gô pơdơh oei lăm anih hiôk-hian, lăm hnam hiôk hơđơ̆ng, lăm anih pơdơh rơnŭk rơnua.

¹⁹Mă đơ̆ng 'mi prĕl jruh lăm bri brah păng pơlei tih gô pơchah răm.

²⁰Pŭn dêh kơ lu iĕm rei adrĕch jê̆ tơter đak, achăng rơmo aseh chă sa mơ̆ng kơ wă.