Read bahnar Esa 34 Bible Online

Esa 34 - bahnar bible

Esa 34

¹Ơ lu dêh char năm mă jê̆ mơ̆ng bĕ, ơ kon pơlei pơla pơđêng đon iĕm mơ̆ng bĕ! Ơ teh đak păng lu tơmam 'bĕnh-'bang kơpal teh ơ dêh char păng lu tơmam lĕch đơ̆ng lăm noh mơ̆ng bĕ.

²Yua Kră Yang hil mĭl wă pơrăm đĭ-đăng dêh char; Kră Yang hil kơ đĭ-đăng linh lu sư, gô ăn kơ lu sư lôch hiong păng pơjao lê̆ kơ đe pơlôch.

³Lu bơngai đe pơlôch, đe gô klơ̆m hŭt lê̆ lu sư. 'Bâu ôm atâu bơngai lôch jơ̆p-jang, rim kơ kông 'bĕnh-'bang kơ pham.

⁴Đĭ-đăng lu măt khei sơnglŏng kơpal plĕnh gô hach lek, plĕnh gô tơlôm nhen đe lôm sơnôm hla bơar. Đĭ-đăng lu măt khei sơnglŏng sư gô hiong đĭ, nhen thoi hla hơmu hơlŭng, nhen thoi plei hơra hơlŭng huŏng đơ̆ng tơm sư.

⁵Mưh đao gưm Inh huch suai bơih tơ kơpal plĕnh. Na 'nâu sư gô jur tơ Eđôm, jur tơ kon pơlei mă Inh đei sek wă pơrăm lu sư.

⁶Đao gưm Kră Yang 'bĕnh kơ pham păng rơmă, thoi pham triu păng bơbe. Hăm rơmă đơ̆ng boh-lăn triu tơno. Yua kơ Kră Yang đei tơdrong soi sơmah tơ pơlei Bôsra, tơdrong pơlôch tih dêh tơ dêh char Eđôm.

⁷Lu kon pơlei thoi rơmo bri tơno gô wang pơ̆k hơdai lu sư; đĭ lu rơmo bri dăm păng lu rơmo tơno pran kơtang. Teh đak lu sư 'bĕnh kơ pham. 'Mui teh hơiuh rơbơ̆r yua kơ rơmă.

⁸Yua kơ Kră Yang đei minh năr wă pơm 'mong. Đei sơnăm Sư wă pơm tơwih yua kơ pơlei Siôn.

⁹Lu thong đak Eđôm gô jing chai tơmo arăng 'mui teh sư jing tơmo ŭnh, teh sư gô jing chai tơmo ŭnh sa hơnơ̆ng.

¹⁰Măng năr ưh kơ đei layơ păt, 'nhui ŭnh bluh hơnơ̆ng. Teh gô jing juơ đơ̆ng chăl âu truh tơ chăl nai, ling-lang hlŏng hloi ưh pă đei bu oei dah chă găn brih rok trong noh.

¹¹Sem bơrơ̆m păng jơma oei tơ anih noh, sem bơrơ̆m, sem ak gô oei tơ noh. Kră Yang 'Bok Kei-Dei gô dăng hăm tơlei tơdrong pơrăm lu sư păng pơtŏ hăm 'long thưk tơdrong tơhiong lu Sư.

¹²Dêh char Êđôm noh ưh pă đei krao dêh char pơtao dơ̆ng bơih. Đĭ-đăng lu kră pơgơ̆r lu sư gô lôch hiong đĭ.

¹³Lu 'long jơla gô chăt lăm anih pơtao, 'long jơla chăt hro 'bĕnh lăm kơđông kơjăp noh jing anih lu kŏ bri păng anih pơdơh lu sem grơ̆-ă.

¹⁴Sem bri păng lu kŏ bri tơ'bơ̆p băl tơ noh. Bơbe bri tơno tơ krao băl, lu sem bơrơ̆m chă sa kơmăng pơdơh tơ noh păng pơm anih pơdơh hiôk.

¹⁵Sem bơrơ̆m gô pơm tơpu kơtăp tơ noh, 'nơ̆m cheh kon păng krôm lu kon sư tơ lăm pơnăr. Tơ noh lu, grơ̆ akŭm băl, tơmông păng akăn.

¹⁶Chă lăng bĕ lăm sơ̆p hla bơar Kră Yang păng đŏk: Lăm lu kon sem 'nâu ưh kơ đei minh pôm sem ayơ mă ưh kơ đei, kư̆m ưh kơ đei minh pôm sem ayơ mă ưh kơ tôm hơgrop, yua kơ đơ̆ng 'bơ̆r Kră Yang pơkă bơih păng Yang Bơhngol Sư đei akŭm bơih lu sư.

¹⁷Kră Yang hlang lăng bơih ăn kơ lu sư, Ti Kră Yang dăng tơlei klah asong ăn teh âu. Lu sư gô oei tơ noh ling-lang păng oei tơ noh đơ̆ng chăl âu truh chăl nai khŏm khŏm.