Read bahnar Esa 36 Bible Online

Esa 36 - bahnar bible

Esa 36

¹Lăm sơnăm măt mơjĭt-puăn chăl pơtao Hesekia pơgơ̆r, Senakêrip pơtao dêh char Asiri, năm blah lu pơlei kơjăp lăm dêh char Juđa păng iŏk đĭ.

²Pơtao dêh char Asiri wơh 'bok yŏng anăn sư Rapsaka hăm lu linh sư lơ, đơ̆ng pơlei Lakis truh tơ Jêrusalem wă kơ pơtao Hesekia yơ̆r ti kiơ̆ Sư, Rapsaka dơ̆ng 'bơ̆t hơbong đak ro mơ̆t tơ Dơnâu kơpơ̆ng, trong năm tơ dơnih đak lu bơngai tong brai.

³Kơplah noh Êliakim, kon drŏ-nglo Hilkia pơm 'bok wei-lăng hnam pơtao, Sepna bơngai chih hla bơar păng Jôa kon drŏ-nglo Asap kiơ̆ chih tơdrong truh boih, năm tơ'bơ̆p sư.

⁴Rapsaka khan kơ lu sư: “Akhan bĕ kơ pơtao Hesekia, pơtao tih, pơtao char Asiri thoi âu: Lĕch đơ̆ng yơ, mă lu iĕm gơnang noh?

⁵Ih, tơchĕng wă tơblah hăm inh hăm nơ̆r pơma 'bơ̆r hoh đĕch hă? Ih gơnang kơ bu mă pơ̆n tơblah hăm inh.

⁶'Nâu ih gơnang kơ dêh char Êyiptơ, noh thoi 'long jra gơlăr đĭ tơgơ̆ bơih bu mă gơnang kơ sư, sư gô trŏ 'bet ti bơngai noh hlôh. Pharaôn, pơtao Êyiptơ đe bu mă gơnang kơ sư kư̆m gô thoi noh mơ̆n.

⁷Păng tơdah ih khan kơ inh, “Lu nhôn gơnang kơ Kră Yang 'Bok Kei-Dei lu nhôn, “Hăm trŏ ưh kơ pơtao Hesekia yuih hŭt lê̆ bơih lu anih tơ kơpal păng chơnang soi Sư, na khan kơ lu đe Juđa păng pơlei Jêrusalem: “Lu iĕm athei kơkuh 'bơ̆t anăp chơnang soi âu dah kiơ?”

⁸Na dang ei iĕm athei pơma pơkăm bĕ hăm yŏng tơ'ngla inh, pơtao char Asiri. Tơdah ih chă đei tôm lu linh hao aseh, lei inh gô ăn kơ ih 'bar-rơbâu tŏ aseh.

⁹Ih ưh kơ gơh puh tơweh lê̆ minh 'nu yŏng linh iĕ hloh lăm lu yŏng tơ'ngla inh, mă khan ih gơnang kơ dêh Êyiptơ wă kơ đei gre aseh păng lu linh kư̆m ưh kơ kĕ.

¹⁰Hloh kơ noh dơ̆ng, ưh kơ trŏ đơ̆ng Kră Yang athei inh tŏk blah dêh âu păng wă pơlôch pơrăm sư hă? Kră Yang 'mơ̆i athei inh năm blah dêh âu păng athei pơrăm pơlôch đĭ sư.”

¹¹Êliakim hăm Sepna păng Jôa khan kơ Rapsaka: “Apinh ih pơma hăm đĭch đam ih âu hăm nơ̆r Aram, yua kơ lu nhôn hlôh nơ̆r noh. Ih 'nĕ pơma nơ̆r Juđa hăm lu nhôn kơnh kon pơlei pơla oei tơ kơpal dur pơlei âu hlôh.”

¹²Mă-lei Rapsaka tơl: “Yŏng inh, wơh inh roi dôm nơ̆r noh, hăm trŏ roi ăn kơ yŏng iĕm hăm lu iĕm đĕch? Ưh kơ trŏ ôh hă kư̆m roi ăn kơ lu bơngai oei tơ kơpal dur pơlei, lu bơngai mă wă jê̆ lôch hơdai hăm lu iĕm, sa ĭch kơdih, nhă đak hơyô kơdih?”

¹³Đơ̆ng noh Rapsaka iung pơma rơ̆n hăm nơ̆r Juđa khan: “Mơ̆ng bĕ nơ̆r pơma đơ̆ng pơtao tih mơng, jơ̆ pơtao dêh char Asiri.

¹⁴Pơtao khan thoi âu: 'Nĕ ăn pơtao Hesekia hơlĕnh lu iĕm yua kơ sư ưh kơ gơh dŏng pơklaih lu iĕm ôh.

¹⁵Kŭm 'nĕ ăn pơtao Hesekia pơdrŭt lu iĕm gơnang kơ Kră Yang na khan: ‘Kră Yang gô dŏng pơklaih lu bơ̆n ngei păng pơlei âu gô ưh kơ đei jao ăn lăm ti pơtao Asiri ôh!

¹⁶'Nĕ pă mơ̆ng pơtao Hesekia, 'nâu nơ̆r pơtao Asiri pơma khan: Pơm hiôk hăm inh păng yơ̆r ti kơ inh bĕ, na lu iĕm mă bu bu kư̆m gô đei sa plei hơra, plei hơmu iĕm kơdih păng nhă đak sơlŭng iĕm kơdih,

¹⁷Dĭng truh tơ layơ, inh truh chông ba lu iĕm mơ̆t tơ dêh char, nhen dêh lu iĕm kơdih, noh jơ̆ dêh char đei 'ba, tơ'bâu păng sik hơmu 'nao, 'ba mi păng plei hơmu.

¹⁸Kơchăng bĕ, kơnh hli kơ pơtao Hesekia pơhlŭ pơlung lu iĕm khan: ‘Kră Yang gô dŏng pơklaih lu bơ̆n hăm đei ưh yang lu teh đak đe nai, gơh dŏng pơklaih teh đak lu sư đơ̆ng ti pơtao Asiri?

¹⁹Tơ yơ yang pơlei Hamat păng yang pơlei Arpat? Tơ yơ yang pơlei Sepharwaim? Lu yang noh tam đei dŏng pơklaih pơlei Samari klaih đơ̆ng ti inh ưh?

²⁰Lăm lu yang dêh char noh tam đei yang ayơ dŏng pơklaih bơih dêh char sư klaih đơ̆ng ti inh ưh? Na liơ Kră Yang gơh dŏng pơklaih Jêrusalem đơ̆ng ti inh lĕ?

²¹Lu sư oei hreh đĕch, ưh kơ đei tơl tơwih minh nơ̆r, yua kơ pơtao Hesekia đei pơkă khan: Lu iĕm 'nĕ tơl tơwih.”

²²Êliakim kon drŏ-nglo Hilkia, 'bok wei-lăng hnam pơtao, hăm Sepna bơngai chih hla bơar, Jôa kon drŏ-nglo Asap bơngai răp chih tơdrong đei truh, hek ao lu sư kơdih, wơ̆t brŏk roi kơ pơtao Hesekia dôm nơ̆r đêl Rapsaka pơma.