Read bahnar Esa 38 Bible Online

Esa 38 - bahnar bible

Esa 38

¹Kơplah noh pơtao Hesekia jĭ dêh wă jê̆ lôch; Êsai 'bok khan lê̆ adrol kon drŏ-nglo Amôt năm mơ̆t roi kơ pơtao păng khan: “Kră Yang khan thoi âu: Hơmet bĕ dôm tơdrong jang ih lăm hnam ih, yua kơ ih wă lôch, ưh pă arih bơih.”

²Pơtao Hesekia tơwih muh măt sư tơ tơnăr hnam, krao khan kơ Kră Yang:

³“Ơ Kră Yang apinh ih 'blŏk kơ inh, tơdrong inh arih tơnăp đĭ jơhngơ̆m kiơ̆ ih păng pơm 'lơ̆ng tơpăt 'bơ̆t anăp Ih” đơ̆ng noh pơtao Hesekia nhơ̆m ôr.

⁴Kơplah noh đei nơ̆r đơ̆ng Kră Yang khan kơ Êsai:

⁵“Ih năm khan dơ̆ng kơ Hesekia: Kră Yang 'Bok Kei-Dei Đawit 'bok ih khan thoi âu: Inh kơtơ̆ng bơih nơ̆r ih krao khan, Inh 'bôh bơih đak măt ih lĕch, Inh gô asong ăn kơ ih arih thim pă mơjĭt-pơđăm sơnăm dơ̆ng.

⁶Inh gô dŏng pơklaih ih păng pơlei âu đơ̆ng ti pơtao Asiri păng Inh gô bơwei pơlei âu.

⁷Âu jơ̆ tơdra đơ̆ng Kră Yang wă pơsĭt kơ ih; Kră Yang gô pơm pơkeh nơ̆r đêl sư pơkă bơih:

⁸Inh gô pơm kơ ngôi măt 'năr pơchrang kơpal kơnao kung, gô kơdŭn tơ rŏng mơjĭt kơnao, ngôi mă măt 'năr pơchrang tơ kơpal kơnao kung Ahas” thoi noh ngôi mă đơ̆ng măt 'năr pơchrang kơdŭn tơ rŏng dơ̆ng mơjĭt juă, mă đêl măt 'năr đĭ năm hlôi bơih.

⁹Âu jơ̆ nơ̆r Hesekia pơtao Juđa chih kơplah sư klaih đơ̆ng jĭ.

¹⁰Inh khan “'Nao minh puăt chăl arih inh. Na inh năm 'măng jang dêh atâu boih, dôm lu khei sơnăm inh oei arih pă đei boih.

¹¹Inh khan: “Inh gô ưh pă 'bôh bơih Kră Yang, Kră Yang mă oei tơ teh lu bơngai arih, inh ưh pă 'bôh bơih kon bơngai oei arih dah oei hơdai hăm kon bơngai lăm teh đak âu.

¹²Hnam inh đe yuih, pôk lê̆ ataih đơ̆ng inh, thoi đe pôk anih bơsŭn lu bơngai wei triu, inh lôm chăl arih inh nhen bơngai tanh brai. Kră Yang kăt lê̆ inh đơ̆ng hơtơ̆ng wai, Kră Yang pơtôch lê̆ tơdrong arih inh đơ̆ng kơ năr truh kơmăng!

¹³Inh ôr tơngưih truh pơgê, nhen thoi dăm-brang Sư teh pơchah tơgơ̆ đĭ kơting inh, Kră Yang gô pơtôch lê̆ tơdrong arih inh kơ năr păng kơmăng!

¹⁴Inh ôr nhen sem kơdŏng, sem pleng, inh tơngưih nhen sem kơtơp si; măt inh lăng tơ kơpal đĭ rơgah. Ơ Kră Yang inh ơh sơ'ngon dêh, apinh ih dŏng iŏk inh bĕ!”

¹⁵Inh wă pơma kiơ dơ̆ng? Kră Yang pơma hăm inh bơih, na Sư kư̆m gô pơm keh boih tơdrong noh. Đĭ chăl inh arih, inh gô arih sa pơyom, yua kơ lăm jơhngơ̆m chhŭr nuih.

¹⁶Ơ Kră Yang, kon bơngai arih yua kơ đơ̆ng tơdrong ih 'nâu. Bơhngol inh arih kư̆m yua kơ tơdrong noh! Ih pơklaih inh, ăn kơ inh arih.

¹⁷Âu yua kơ đei tơdrong lơi yua kơ inh, na inh đei tơdrong chhŭr nuih lơ. Kră Yang 'mêm kơ inh rôp bơhngol inh kơjăp, wă kơ inh huay kơ huŏng lăm sơlŭng lôch răm; Kră Yang klơ̆m hŭt lê̆ bơih dôm tơdrong yoch inh tơ rŏng Ih.

¹⁸Tơ dêh atâu ưh kơ gơh bơnê kơ Ih păng tơdrong lôch ưh kơ gơh ư-ang kơ Ih ôh, lu bơngai jur lăm sơlŭng jrŭ ưh kơ đei tơdrong chang hơmĕng kơ tơdrong tơpăt đơ̆ng Ih dơ̆ng.

¹⁹Lu bơngai arih, lu bơngai arih đĕch ư-ang kơ Ih. Thoi inh đei pơm năr âu. Lu bơngai pơm 'bă gô bơtho ăn kơ kon hơ'lơ̆p sư băt tơdrong tơpăt Ih.

²⁰Kră Yang bơih Tơ'ngla dŏng pơklaih inh. Đĭ chăl arih nhôn gô reh brŏ păng hơri lăm hnam Kră Yang.

²¹Êsai đei khan: “Iŏk bĕ minh pôm plei hơra dan 'bơ̆t pơtôch ih, na ih gơh klaih.”

²²Hesekia tơl khan: “Đei tơdra kiơ ăn kơ inh băt inh gô tŏk tơ hnam Kră Yang?”