Read bahnar Esa 39 Bible Online

Esa 39 - bahnar bible

Esa 39

¹Kơplah noh Mêrôđak Balađan, kon Balađan, pơtao Babilôn wơh bơngai năm ba hla kơthơ păng tơmam pơyơ̆r ăn kơ Hesekia, yua kơtơ̆ng ang sư jĭ dêh păng klaih bơih.

²Hesekia hiôk sơng iŏk lu sư, na sư ăn năm lăng lăm hnam pơtao, anih lê̆ tơmam gĭt thoi kơ: Hu, maih, pơgang 'bâu phu, đak plei ôliwơ gĭt hăm năm lăng anih 'măn lu tơmam tơblah păng dôm lu tơmam gĭt lăm anih hnam sư, mă tơmam kiơ kiơ lăm anih pơtao păng lăm jơ̆p kơ dêh char pơtao sư, ưh kơ đei minh pôm tơmam yă kiơ mă Hesekia ưh kơ ăn kơ lu bơngai tang măt ăn kơ dêh char Babilôn lăng.

³Êsai bơngai khan lê̆ adrol năm tơ pơtao Hesekia păng jet sư: “Lu bơngai noh pơma yă kiơ hăm ih? Păng lu sư đơ̆ng yơ năm ngôi tơ ih?” Hesekia tơl khan: “Lu sư đơ̆ng dêh ataih truh tơ âu, đơ̆ng dêh char Babilôn.”

⁴Êsai jet: “Lu sư lăng kiơ lăm hnam pơtao?” Hesekia tơl khan: “Lu sư lăng đĭ dôm lu tơmam lăm anih hnam pơtao inh, ưh kơ đei anih tơmam gĭt kiơ lăm anih mă inh ưh kơ tơ'bôh ăn kơ lu sư lăng.”

⁵Êsai khan kơ Hesekia: “Apinh ih mơ̆ng nơ̆r Kră Yang Tih Hloh khan:

⁶Âu, năr gô truh, dôm tơmam lăm anih hnam pơtao ih, dôm tơmam mă 'bok ih 'măn lê̆ lăm hnam đơ̆ng sơ̆ truh năr 'nâu, gô chĕp ba pơđĭ tơ dêh char Babilôn, ưh pă đei lê̆ minh pôm tơmam kiơ dơ̆ng, Kră Yang khan thoi noh.

⁷Lu kon sâu drŏ-nglo ih, lĕch đơ̆ng ih pơjing đei lu mơ'nah đe gô rôp pơm linh krĕo lăm hnam pơtao Babilôn.”

⁸Hesekia tơl nơ̆r Êsai khan: “Nơ̆r Kră Yang mă ih 'nao roi kơ inh noh 'lơ̆ng tơpă. Yua kơ lăm năr inh oei arih inh tơchĕng gô đei hiôk-hian rơnŭk rơnua.”