Read bahnar Esa 47 Bible Online

Esa 47 - bahnar bible

Esa 47

¹Ơ kon adruh hơlai Babilôn, jur hơ-oei tơ 'mui teh bĕ! Ơ kon adruh bơngai Kalđê, jur hơ-oei tơ teh bĕ iĕm ưh kơ đei tang-dŏ pơtao bơih! Đơ̆ng dang ei đe ưh pă krao lu iĕm bơngai 'lơ̆ng hơbŏ rŏ liĕm dơ̆ng bơih.

²Iŏk bĕ tơpăl peh pơm tơpŭng bơlah; plôh lê̆ bĕ che gom muh măt ih, plôh lê̆ ao tai 'nguaih, mă klơ̆p blu na tŏk găn đak krong.

³Akâu hoh ih gô pơdah tơ 'nguaih Tơdrong mơlâu ih gô 'bôh! Inh gô pơm 'mong plơ̆, ưh kơ đei lon minh 'nu bu ôh.

⁴Tơ'ngla dŏng pơklaih lu bơ̆n, anăn Sư Kră Yang Tih Hloh, Tơ'ngla 'Lơ̆ng Rơgoh Isơrael.

⁵Ơ kon adruh bơngai Kalđê, hơ-oei hreh bĕ, năm bĕ lăm anih măng mu! Yua kơ đơ̆ng dang ei đe ưh pă krao ih drŏ-kăn pơtao kơ teh đak dơ̆ng bơih.

⁶Inh hil mĭl kơ kon pơlei Inh, Inh pơm kơ mŭk tơmam Inh jing 'mê̆-'mach, Inh pơjao đĭ lu sư lăm tơpang ti ih. Mă-lei ih ưh kơ đei 'mêm mơnat kơ lu sư; Ih tơ'băk bơih 'long ăt trăp kơpal bơngai kră pă kĕ.

⁷Ih khan bơih: Inh gô jing pơtao drŏ-kăn ling-lang. Ih ưh kơ đei tơchĕng ih pơm kiơ dang ei păng kư̆m ưh kơ đei tơchĕng tơdrong gô truh dơning dơmônh.

⁸“Thoi noh, ơ lu bơngai 'maih hiôk đĕch. Tơchĕng khan ưh pă đei tơdrong anat kiơ đơ̆ng âu tơ anăp, mơ̆ng bĕ âu: Ih khan lăm jơhngơ̆m. ‘Inh âu, adrĕch yŏng mơng ưh pă đei bơngai bu dang inh, inh gô ưh kơ đei layơ sơ'ngon thoi yă adro kư̆m ưh kơ đei nhơ̆m hmoi thoi bơngai hiong kon hơ'lơ̆p.’

⁹Kŭm lăm minh năr. Ih gô đei 'bar tơdrong âu truh kơ ih. Tơdrong hiong kon hơ'lơ̆p păng jing yă adro. Gô truh tôm tơdrong 'noh. Mă khan ih pơjâu pơm lơ tơdrong tơwir dah đei hĭ nơ̆r yang mơsêh pơma hơlĕnh!

¹⁰Ih gơnang tơdrong ih pơm kơnê̆ ih Ih khan: ‘Ưh kơ đei bu 'bôh inh.’ Tơdrong gơh hơgei hlôh wao ih gô pơm kơ ih wơ̆l jrok. Ih pơma lăm jơhngơ̆m: ‘Inh âu, 'nguaih kơ inh ưh kơ đei bơngai bu.’

¹¹Na tơdrong gô truh tơ ih. Mă ih ưh kơ gơh kơ weh. Tơdrong pơmat-tat gô truh tơ ih mă ih ưh kơ gơh puh tơ nai. Tơdrong pơrăm blư truh ưh kơ tam băt. Mă ih ưh kơ băt adrol ôh.

¹²Pơm dơ̆ng bĕ, pơm dôm tơdrong tơwir pơm pơjâu mơsêh hơlĕnh, mă ih nŏng kơ adrin pơhrăm đơ̆ng oei 'lơ̆p nge! Rŏ lăng gô pơyua kơ ih; rŏ lăng đơ̆ng tơdrong 'noh na ih gô tơhli đe?

¹³Jơhngơ̆m ih gleh glăn yua kơ đơ̆ng iĕm chă pơđâu tơ'bôh lơ tơdrong. Iung bĕ ơ lu bơngai mă băt hlôh gah plĕnh, lăng sơnglŏng, lăng khei tơ'bang blŭng-a, na tơng khan lê̆ adrol. Lê̆ lu sư pơklaih ih đơ̆ng dôm tơdrong gô truh kơ ih 'noh.

¹⁴To lu sư gô nhen thoi hơnong 'ba; ŭnh sa pơđĭ; lu sư ưh kơ gơh pơklaih kơdih lu sư đơ̆ng pla ŭnh. Ŭnh noh ưh kơ đei ngar wă nhur tơnŏ ôh, ưh pă đei tơnuh ŭnh wă ngôi nhur.

¹⁵Đĭ dôm lu bơngai jang gleh hrat hơdai ih jing thoi noh: Dôm lu bơngai mơdro mơchan hăm ih đơ̆ng oei 'lơ̆p. Rim 'nu jrok kiơ̆ trong kơdih, ưh kơ đei bu dŏng pơklaih ih!