Read bahnar Esa 50 Bible Online

Esa 50 - bahnar bible

Esa 50

¹Kră Yang khan: “Hla bơar achăng mĕ lu iĕm tơ yơ bơih? Bơngai mă Inh hrĕch achăng bơih. Dah bu mă tơ'ngla Inh hre. Mă đêl inh tĕch lu iĕm ăn kơ tơ'ngla noh? Inh tĕch iĕm yua kơ đơ̆ng tơdrong yoch iĕm kơdih: Hrĕch achăng lê̆ mĕ lu iĕm yua kơ đơ̆ng tơdrong kơnê̆ lu iĕm pơm.

²Lơliơ mưh Inh truh ưh kơ đei 'bôh bơngai bu? Mưh Inh krao ưh kơ đei bơngai bu tơl? Ti Inh kơđeh hă na ưh kơ gơh dŏng pơklaih? Dah Inh ưh kơ đei jơhngơ̆m pran wă dŏng pơklaih iĕm hă? 'Nâu wă Inh chrih na đak dơsĭ hrơ̆ hloi. Inh ăn kơ đak krong jing char glă; ka tơ ala đak krong gô lôch đĭ jing 'bâu ôm yua ưh kơ đei đak.

³Inh pơhrŭk ăn kơ plĕnh hăm tơdrong măng mu, păng klơ̆p gom lê̆ sư hăm minh blah 'bi.”

⁴Kră Yang ăn kơ inh hơpiĕt lu bơngai gơh bơtho tơ'bôh wă kơ inh băt yua nơ̆r pơma tơiung lu bơngai rơdu tơrăn. Kră Yang râu inh rim pơgê đơ̆ng hrôih tơ'blŏk ăn kơ đon inh wă mơ̆ng nơ̆r Sư bơtho nhen thoi bơngai đei hŏk pơhrăm.

⁵Kră Yang Tih Hloh pơih đon inh, inh ưh pă kơchu, kư̆m ưh kơ đei kơdŭn.

⁶Inh ăn bơih kơ đe teh rŏng inh, păng ăn tơ'bŏk inh kơ đe buch sŏk kang inh. Lu bơngai pơ'brơh kơ inh gơsoh đak hai, inh ưh kơ đei ôn muh măt ôh.

⁷Kră Yang Tih Hloh tơgŭm inh, inh ưh kơ mơlâu ôh. Na inh pơm kơ măt inh lăng tơ anăp, inh băt kơ inh gô ưh kơ đei tơdrong kiơ mơlâu.

⁸Tơ'ngla mă jô̆ inh 'lơ̆ng tơpăt oei jê̆; bơngai bu pơ̆n ayăt hăm inh Bĕ bơ̆n iung dơ̆ng hơdai hăm inh. Bu wă jâu inh Athei năm jê̆ inh bĕ!

⁹Kră Yang Tih Hloh năm tơgŭm inh. Bơngai bu jâu inh khan yoch? Lăng to đĭ-đăng lu sư gô so thoi ao, mă mua reh hiah.

¹⁰Bơngai bu lăm lu iĕm băt hli yom kơ Kră Yang, păng chu kiơ̆ kơ nơ̆r đĭch đam Sư Mă năm lăm măng mu păng ưh kơ đei hơdah. Gơnang bĕ kơ Anăn Kră Yang păng gơnang kơ Kră Yang 'Bok Kei-Dei sư kơdih.

¹¹'Nâu, đĭ-đăng lu iĕm bơngai tơkuh ŭnh păng tơ̆k ŭnh hơchô̆ hơpaih. Năm rok bĕ gah hơdah ŭnh hơchô̆ hơpaih mă iĕm tơ̆k, Tơdrong 'nâu lu iĕm gô pŭ iŏk đơ̆ng ti Inh, lu iĕm gô 'bĭch lăm tơdrong pơmat-tat!