Read bahnar Esa 63 Bible Online

Esa 63 - bahnar bible

Esa 63

¹Bu Tơ'ngla mă truh đơ̆ng char Eđôm. Đơ̆ng pơlei Bôsra? Na hrŭk hơbĕn ao gôh rang hơdah, yak năm hăm tơdrong pran kơtang. Noh Inh bơih Tơ'ngla pơma nơ̆r 'lơ̆ng tơpăt Tơ'ngla mơsêh mơyang tih-tin wă dŏng pơklaih.”

²Yua kơ kiơ ao Ih tong đak 'brê? Ao tai Ih 'brê thoi bơngai pơjuă đak hơmu?

³“Minh 'nu Inh đĕch pơjuă păng hmĕt đak hơmu, ưh kơ đei bu mă đơ̆ng kon pơlei oei hăm Inh. Lăm tơdrong hil Inh pơjuă lu sư, lăm tơdrong Inh mĭl Inh pơjuă bơhlơ̆r lu sư. Pham lu sư tơprah 'bơm ao Inh, ao tai Inh pham klep jơ̆p-jang.

⁴Lăm jơhngơ̆m Inh pơkă bơih kơ năr wă pơm 'mong, păng sơnăm mă Inh dŏng pơklaih truh bơih.

⁵Inh chă lăng mă-lei ưh kơ đei bu tơgŭm. Inh lăng hlĭch yua kơ ưh kơ đei bu dŏng. Na Inh yua kơkŏng ti Inh wă dŏng jei gah Inh. Păng tơdrong Inh hil mĭl dŏng tơgŭm Inh.

⁶Inh pơjuă gơhlơ̆r bơih lu kon pơlei lăm tơdrong hil mĭl. Inh ăn kơ lu sư suai hăm tơdrong Inh hil mĭl, păng pơlôch bơih pham lu sư lĕch tơ kơpal teh.

⁷Inh gô roi tơ'blŏk tơdrong Kră Yang 'mêm mơnat, păng hơri bơnê ư-ang kơ Kră Yang kơ dôm lu tơdrong mă Kră Yang pơm bơih kơ lu bơ̆n păng tơdrong 'lơ̆ng tih Sư ăn kơ adrĕch Isơrael, dôm lu tơdrong mă Sư đei ăn kơ bơ̆n, kiơ̆ kơ tơdrong Sư 'mêm Kră Yang dŏng pơklaih lu sư bơih.

⁸Kră Yang đei khan: “Tơpă lu sư jơ̆ kon pơlei Inh lu kon mă ưh kơ đei pơma hơlĕnh ôh.” Păng Kră Yang boih Tơ'ngla dŏng pơklaih lu sư.

⁹Lăm lu sư đei tơdrong pơmat-tat, Kră Yang kư̆m wang pơmat-tat, păng linh jang 'lơ̆ng 'bơ̆t anăp lu sư dŏng pơklaih lu sư boih. Đơ̆ng jơhngơ̆m mơnat păng 'mêm kơeng na huai iŏk lu sư. Kră Yang pôk kơ'mĭn lu sư ling-lang rim năr đơ̆ng sơ̆.

¹⁰Mă-lei lu sư oei ayăt plơ̆, păng pơm ăn kơ Yang Bơhngol 'Lơ̆ng Kră Yang sơ'ngon. Na Kră Yang jing ayăt hăm lu sư; Kră Yang kơdih tơblah hăm lu sư.

¹¹Na kon pơlei 'blŏk hơdơ̆r dơ̆ng kơ đơ̆ng sơ̆, 'blŏk kơ Môis păng kon pơlei Kră Yang na jet: Tơ'ngla mă hơtŏk lu sư păng bơngai wei khŭl sem dơrong Kră Yang, hlôi đơ̆ng đak dơsĭ tơ yơ bơih? Tơ'ngla ăn Yang Bơhngol Sư oei hơdai hăm kon pơlei tơ yơ bơih?

¹²Tơ'ngla mă pơm kơ kơkŏng ti ư-ang pran kơtang Kră Yang năm gah ti 'ma Môis. Mă pơm kơ đak dơsĭ tơklah 'bơ̆t anăp lu sư? Wă kơ anăn Kră Yang oei đei ling-lang ưh kơ đei tôch.

¹³Mă Tơ'ngla dui ba lu sư tŏk hlôi đơ̆ng lăm sơlŭng jrŭ? Nhen thoi aseh kơdâu tơ char glă, ưh kơ đei pơ̆k.

¹⁴Yang Bơhngol 'Lơ̆ng Kră Yang ăn bơih kơ lu sư pơdơh. Nhen thoi khŭl sem dơrong jur tơ anih thŭng Kră Yang dui ba kon pơlei Sư kư̆m thoi noh. Wă pơm kơ anăn Sư ư-ang.

¹⁵Apinh Kră Yang đơ̆ng kơpal plĕnh ti nger tơ ala. Lăng bĕ đơ̆ng anih 'lơ̆ng rơgoh păng ư-ang Ih oei! Jơhngơ̆m hưch hanh pran kơtang Ih tơ yơ? Jơhngơ̆m 'maih wă păng tơdrong 'mêm mơnat Kră Yang ưh pă đei dơ̆ng bơih hăm lu nhôn.

¹⁶Mă-lei Ih bơih 'Bă lu nhôn mă khan Abraham ưh kơ băt kơ lu nhôn Isơrael kư̆m ưh kơ jô̆ lu nhôn; Ơ Kră Yang Ih jơ̆ 'Bă lu nhôn. Anăn Ih jơ̆ Tơ'ngla dŏng pơklaih lu nhôn ling-lang đơ̆ng sơ̆.

¹⁷Ơ Kră Yang liơ Ih pơm ăn kơ lu nhôn tơklah jrok ataih kơ trong gơlong Ih? Liơ Ih pơm ăn lăm jơhngơ̆m lu nhôn arăng ưh kơ hli kơ Ih? Apinh Ih wih hơlơ̆k bĕ yua kơ lu đĭch đam Ih, păng yua kơ lu adrĕch adrung jing mŭk tơmam Ih.

¹⁸Kon pơlei 'lơ̆ng rơgoh Kră Yang 'nao đei anih 'nâu ưh tăm mă đunh; mă-lei bơngai ayăt kơ nhôn pơjuă lê̆ bơih anih 'lơ̆ng rơgoh Ih.

¹⁹Đunh bơih, lu nhôn nhen thoi minh khŭl kon pơlei, mă Kră Yang ưh tam mă pơgơ̆r păng đe ưh tam mă krao hăm anăn Ih.