Read bahnar Lew 11 Bible Online

Lew 11 - bahnar bible

Lew 11

¹Kră Yang khan kơ Môis păng Arôn:

²Khan bĕ kơ kon pơlei Isơrael: 'Nâu dôm lu kon sem brem arih kơpal teh noh iĕm gơh sa đĭ-đăng.

³Kon sem brem ayơ mă đei kơchôp blah, kơchôp jơ̆ng blah 'bar păng gơh mơkan noh lu iĕm gơh sa.

⁴Mă-lei tơdah kon sem brem ayơ mă lăp pôm gơh mơkan đĕch, dah lăp đei kơchôp blah đĕch lu kon sem brem noh iĕm ưh kơ gơh sa ôh, thoi kơ aseh lăk-đa sư mơkan 'nhĕt mă-lei ưh kơ đei kơchôp blah jing ưh kơ rơgoh.

⁵Kơne bri sư mơkan mă-lei ưh kơ đei kơchôp blah jing ưh kơ rơgoh.

⁶Tơpai bri sư mơkan mă-lei ưh kơ đei kơchôp blah jing ưh kơ rơgoh kơ iĕm, ưh kơ gơh sa.

⁷Nhŭng sư đei kơchôp blah, jơ̆ng ti 'bar pah hơtuch adrol mă-lei ưh kơ mơkan, jing ưh kơ rơgoh.

⁸Lu iĕm ưh kơ gơh sa 'nhĕm lu sem noh păng ưh kơ gơh hơtŭt 'bơm akâu lu kon sem brem noh dah sư lôch boih; ưh kơ rơgoh kơ iĕm ôh.

⁹Dôm lu kon sem oei lăm đak lu iĕm gơh sa, noh lu kon sem mă đei hla đon păng đei kơchap mă oei lăm đak dơsĭ dah oei lăm đak krong.

¹⁰Dôm sem brem kiơ lăm đak dơsĭ dah lăm đak krong dôm lu adrĕch arih lăm đak mă ưh kơ đei hla đon păng ưh kơ đei kơchap lu iĕm ưh kơ gơh sa ôh, lu iĕm athei lăng krưp sem noh.

¹¹Dôm lu adrĕch sem brem âu; iĕm athei areh lăng krưp dêh 'nĕ kơ sa 'nhĕm sư păng athei lăng akâu sư lôch noh krưp dêh.

¹²Đĭ-đăng lu sem brem lăm đak mă ưh kơ đei hla đon păng ưh kơ đei kơchap jing tơmam mă lu iĕm lăng areh krưp dêh.

¹³Lăm dôm lu kon sem păr, lu adrĕch mă lu iĕm trŏ kơ areh lăng krưp dêh noh jơ̆ klang, grơ̆, klang kok ưh kơ gơh kơ sa ôh.

¹⁴Klang kơtơp păng klang gơsum, kiơ̆ kơ adrĕch sư.

¹⁵Đĭ-đăng ak kiơ̆ kơ adrĕch sư.

¹⁶Sem chhơng, sem đak dơsĭ sem tre-wĕt, koch lĕk, kiơ̆ kơ adrĕch;

¹⁷sem ditdut, klang kok, sem bơrơ̆m.

¹⁸Iĕr đak, sem hơkiĕng, klang sa tơmam ôm.

¹⁹Bôngko, hơda, kiơ̆ kơ adrĕch sư, tre-yang păng hơmiĕt.

²⁰Đĭ-đăng lu kon sem đei pơnăr mơmŏ hăm puăn pah jơ̆ng noh jing tơmam lu iĕm areh lăng krưp.

²¹Mă-lei kon sem ayơ mă đei pơnăr mơmŏ hăm puăn pah jơ̆ng na gơh pơplŏng kơpal, noh lu iĕm gơh sa.

²²'Nâu lu iĕm gơh sa, noh lep ba kiơ̆ kơ adrĕch sư, adro kiơ̆ kơ adrĕch sư, lep tung-nut kiơ̆ kơ adrĕch sư, ler kiơ̆ kơ adrĕch sư.

²³Đĭ-đăng lu kon sem nai, đei pơnăr nơnăm hăm puăn pah jơ̆ng jing tơmam mă lu iĕm areh lăng krưp.

²⁴Yua kơ lu kon sem 'nâu bơih na lu iĕm jing 'mê̆-'mach, bu mă hơtŭt 'bơm akâu lôch lu kon sem âu gô đei 'mê̆-'mach truh kơmăng.

²⁵Bu chĕp akâu lôch kon sem noh, athei pih hơbĕn ao tai sư păng jing kơnê̆ 'mê̆-'mach truh kơmăng.

²⁶Lu kon sem brem ayơ đei kơchôp blah mă-lei ưh kơ đei 'bar pah jơ̆ng ti păng ưh kơ đei mơkan, noh trŏ kơ pơm kơ lu iĕm kơnê̆ 'mê̆-'mach bơih, na bu hơtŭt 'bơm gô kơnê̆ 'mê̆-'mach.

²⁷Lu adrĕch ayơ mă đei puăn pah jơ̆ng ti na yak nơnăm hăm tơpang jơ̆ng noh jing tơmam ưh kơ rơgoh kơ lu iĕm, bu mă hơtŭt 'bơm akâu lôch lu sem brem noh gô đei tơdrong kơnê̆ 'mê̆-'mach truh kơmăng.

²⁸Na bơngai bu mă chĕp ba akâu lôch lu kon sem brem noh athei pih hơbĕn ao tai sư păng gô kơnê̆ 'mê̆-'mach truh kơmăng, dôm lu adrĕch tơmam noh ưh kơ rơgoh kơ lu iĕm.

²⁹Lăm lu adrĕch mă mơmŏ kơpal teh, 'nâu lu adrĕch mă ưh kơ rơgoh kơ lu iĕm: Kur, kơne, makuey kiơ̆ kơ adrĕch sư.

³⁰Păkkê, morkung, chŭ-chă, makuey păr.

³¹Lăm lu adrĕch noh pơm kơ lu iĕm ưh kơ rơgoh, bu hơtŭt 'bơm akâu lôch sư gô đei kơnê̆ 'mê̆-'mach truh kơmăng.

³²Dôm lu adrĕch tơmam 'nâu, akâu lôch sư mă huŏng 'bơm tơ kơpal tơmam kiơ, pơm kơ tơmam noh jing kơnê̆ 'mê̆-'mach, lu tơmam pơm hăm 'long, hơbĕn ao, tơmam pơm păng akar, kơdŭng wă khan tơmam mă bơ̆n juăt kơ yua, athei tong tơmam noh lăm đak, sư gô kơnê̆ 'mê̆-'mach truh kơmăng păng đơ̆ng noh gô jing rơgoh dơ̆ng.

³³Tơdah akâu noh huŏng lăm ge, dôm tơmam tah lăm noh jing kơnê̆ 'mê̆-'mach đĭ iĕm athei teh pơchah lê̆ ge noh.

³⁴Dôm tơmam sa, nhă, dah đak đơ̆ng ge noh 'bơm, tơmam noh jing kơnê̆ 'mê̆-'mach đĭ mă khan tơmam noh tah lăm ge dah đak kơnê̆ noh 'bơm kư̆m jing kơnê̆ mơ̆n.

³⁵Dôm tơmam dah đei akâu lôch huŏng 'bơm tŏ sĕt sư gô kơnê̆ đĭ. Mă tơnuh gŏ mă chơđah gŏ athei teh pơchah lê̆; sư jing kơnê̆ 'mê̆-'mach bơih, iĕm athei lăng sư kơnê̆ 'mê̆-'mach bơih.

³⁶Minh pôm tu đak glung dah đak dơnâu iĕm lăng sư thoi rơgoh; tơdah đei akâu lôch kon sem brem huŏng đak noh jing kơnê̆ 'mê̆-'mach.

³⁷Tơdah akâu lôch kon sem kiơ mă huŏng 'bơm lăm adrĕch găr đe wă rei, na adrĕch găr noh đe oei jô̆ sư rơgoh.

³⁸Mă-lei tơdah đe tuh đak kơpal găr adrĕch păng tơdah đei akâu kon sem lôch mă huŏng 'bơm gar, adrĕch noh gô jing kơnê̆ 'mê̆-'mach kơ lu iĕm.

³⁹Tơdah minh pôm kon sem brem iĕm gơh sa na lôch hĭ, bu mă hơtŭt 'bơm akâu sư kư̆m jing kơnê̆ 'mê̆-'mach truh kơmăng.

⁴⁰Bu mă sa 'nhĕm lôch noh athei pih hơbĕn ao tai sư păng gô 'bơm 'mê̆-'mach truh kơmăng păng bu mă chĕp ba akâu lôch noh kư̆m athei pih hơbĕn ao sư gô đei 'mê̆-'mach truh kơmăng.

⁴¹Đĭ-đăng kon sem ayơ mă mơmŏ kơpal teh tă kơ lăng kơnê̆ krưp ngăl, ưh kơ gơh kơ sa 'nhĕm sư ôh.

⁴²Thoi noh ưh kơ gơh sa 'nhĕm sư ôh lu kon sem mă mơmŏ kơpal teh, kon sem ayơ mă mơmŏ hor hăm klak yak nơnăm hăm puăn pah jơ̆ng ti dah nơnăm hăm lơ jơ̆ng, yua kơ noh lăng krưp dêh.

⁴³Lu iĕm 'nĕ kơ ăn minh pôm kon sem mă 'bơm tơ akâu lu iĕm pơm kơ lu iĕm 'mê̆-'mach, kơnh lu iĕm jing ưh kơ rơgoh. Athei lăng krưp dêh tơdrong noh.

⁴⁴Yua kơ Inh boih Kră Yang 'Bok Kei-Dei lu iĕm, Inh 'lơ̆ng rơgoh, lu iĕm kư̆m athei oei rơgoh, na gơh rơgoh tơpă. Lu iĕm 'nĕ kơ ăn minh pôm kon sem kiơ mơmŏ kơpal teh mă pơm kơ lu iĕm jing kơnê̆ 'mê̆-'mach.

⁴⁵Yua kơ Inh boih Kră Yang Tơ'ngla mă anhăk ba lu iĕm lĕch đơ̆ng char Êyiptơ jing Kră Yang 'Bok Kei-Dei lu iĕm, lu iĕm athei rơgoh 'lơ̆ng, yua kơ Inh 'lơ̆ng rơgoh.

⁴⁶Noh jơ̆ tơdrong juăt gah kon sem brem, gah lu sem păr tơ kơpal, lu ka kon sem lăm đak păng lu kơep lep-ler mơmŏ kơpal teh.

⁴⁷Klah lê̆ pha wă kơ băt kon sem brem ayơ mă ưh kơ rơgoh păng ayơ mă rơgoh, kon sem arih đe gơh sa păng ưh kơ gơh sa.