Read bahnar Lew 14 Bible Online

Lew 14 - bahnar bible

Lew 14

²'Nâu bơih tơdrong juăt lu bơngai jĭ chin lăm năr wă pơm rơgoh sư đe gô chông ba sư tơ 'bok soi.

³'Bok soi gô lĕch tơ 'nguaih kơ kơđông na sư lăng bơngai noh. Tơdah rơka jĭ chin sư klaih bơih,

⁴'bok soi tơtă kơ lu sư, chĕp 'bar tŏ sem oei arih păng rơgoh hăm 'long hơngo bri, che hơhĭm păng hla 'long pơgang (Hisôp).a

⁵'Bok soi gô athei lu sư pơlôch minh lăm 'bar tŏ sem noh, lăm gŏ 'bei tơ đak ro hlăng.

⁶Đơ̆ng noh 'bok soi iŏk sem mă oei arih hơbĭ 'long hơngo bri, che 'brê hơhĭm păng hla 'long pơgang, năm djrŭ tơ pham sem đêl pơlôch tơ đak ro hlăng.

⁷'Bok soi athei tơtraih pham tơpơh wơ̆t tơ bơngai mă wă kơ goh kơ jĭ chin păng jô̆ sư 'lơ̆ng rơgoh, đơ̆ng noh achăng sem oei arih păr tơ chŭn mir.

⁸Bơngai wă kơ đei rơgoh noh athei pih hơbĕn ao tai sư, hơkôih đĭ sŏk sư, hum lăm đak na sư gơh rơgoh, đơ̆ng noh sư gơh mơ̆t lăm kơđông, mă-lei gô oei 'nguaih kơ bơsŭn lăm tơpơh năr.

⁹Truh năr mă tơpơh sư gô hơkôih đĭ sŏk sop, sŏk kơ̆l, sŏk kang, gơnur măt sư, pih hơbĕn ao sư păng hum lăm đak, na gơh jing rơgoh.

¹⁰Truh năr mă tơhngam, sư gô rôp 'bar tŏ kon triu tơno ưh kơ đei jĭ kiơ, b minh pôm kon triu akăn mă tơ'bưh kơ đêl, ưh kơ đei jĭ kiơ, iŏk pêng lăm mơjĭt tơpŭng hĕch, tuh hrâu đak rơmă ôliwơ.c

¹¹'Bok soi tơ'ngla mă pơm rơgoh kơ sư, gô chông ba bơngai mă wă kơ rơgoh noh păng dôm lu tơmam noh 'bơ̆t anăp Kră Yang, năm tơ Bơsŭn Anih Akŭm.

¹²Đơ̆ng noh 'bok soi gô rôp minh lăm 'bar tŏ kon triu tơno wă pơyơ̆r huai đơ̆ng tơdrong hơch 'bơm kơ pơm yoch, hăm đak rơmă ôliwơ, na ba pơm tơmam soi pơyơ̆r 'ma 'ngiĕo 'bơ̆t anăp Kră Yang.

¹³Sư gô pơlôch kon triu noh lăm anih đe juăt kơ pơlôch sem dơrong tơmam soi, wă pơm tơmam soi huai đơ̆ng yoch. Păng tơmam soi 'buh, tơ minh anih 'lơ̆ng rơgoh, yua kơ tơmam soi huai đơ̆ng tơdrong hơch 'bơm pơm yoch, 'nâu mơ̆ng kơ 'bok soi ngăl kư̆m thoi tơmam soi huai đơ̆ng yoch mơ̆n, noh jơ̆ minh tơmam 'lơ̆ng rơgoh hloh.

¹⁴'Bok soi gô iŏk pham tơmam pơyơ̆r huai đơ̆ng tơdrong hơch 'bơm pơm yoch noh, na pik tơ đon gah 'ma bơngai mă wă kơ rơgoh, tơ hơnglâu yŏng ti gah 'ma păng hơnglâu yŏng jơ̆ng gah 'ma bơngai noh.

¹⁵'Bok soi iŏk tŏ sĕt đak rơmă ôliwơ hling tơ tơpang ti 'ngiĕo sư kơdih.

¹⁶Djrŭ hơnglâu ti gah 'ma sư lăm đak rơmă ôliwơ tơ tơpang ti 'ngiĕo sư kơdih na tơtraih tơpơh wơ̆t 'bơ̆t anăp Kră Yang.

¹⁷Đak rơmă oei oei lăm tơpang ti 'bok soi gô pik tơ hla đon gah 'ma, tơ hơnglâu yŏng ti 'ma păng hơnglâu yŏng jơ̆ng 'ma bơngai wă kơ rơgoh noh păng dan tơ kơpal pham tơmam soi pơyơ̆r huai đơ̆ng tơdrong hơch 'bơm pơm yoch.

¹⁸Đak rơmă oei oei lăm tơpang ti, 'bok soi gô hling tơ kơ̆l bơngai wă kơ rơgoh noh. Thoi noh 'bok soi gô soi sơmah pơm rơgoh ăn kơ sư 'bơ̆t anăp Kră Yang.

¹⁹'Bok soi gô pơyơ̆r tơmam soi huai đơ̆ng yoch, wă soi sơmah ăn kơ bơngai noh, gơh rơgoh đơ̆ng tơdrong yoch sư. Đơ̆ng noh 'bok soi gô 'bet pơlôch sem dơrong tơmam soi, pơm tơmam soi 'buh.

²⁰'Bok soi gô pơyơ̆r tơ kơpal chơnang soi tơmam soi 'buh păng tơmam soi tơpŭng. Thoi noh 'bok soi gô pơm rơgoh ăn tơdrong yoch sư na tơdrong yoch bơngai âu gơh rơgoh.

²¹Mă-lei tơdah bơngai 'noh dơnuh hin ưh kơ kĕ đei dôm tơmam noh ôh, ăn kơ sư rôp minh pôm kon triu tơno, yua lăm tơdrong soi sơmah huai đơ̆ng tơdrong hơch 'bơm pơm yoch, pơyơ̆r 'ma 'ngiĕo, wă pơm tơmam soi wă rơgoh đơ̆ng yoch sư păng minh lăm mơjĭt kĭ tơpŭng bơlah, hrâu hăm đak rơmă ôliwơ, pơm tơmam soi phe 'ba păng minh puăt lit đak ôliwơ.

²²Kŭm thoi noh mơ̆n, kiơ̆ kơ sư đei athei chĕp ba 'bar tŏ kon sem pơgâm dah kon sem kơtơp, sem minh pôm âu pơm tơmam soi huai đơ̆ng yoch, sem minh pôm noh pơm tơmam soi 'buh.

²³Lăm năr mă tơhngam, sư gô chĕp ba kơ 'bok soi tơmam âu wă pơm rơgoh kơ sư, tơ 'măng jang Bơsŭn Anih Akŭm.

²⁴'Bok soi gô iŏk kon triu tơno, pơm tơmam soi huai đơ̆ng hơch 'bơm pơm yoch păng minh puăt lit đak ôliwơ đơ̆ng noh 'bok soi pơyơ̆r 'ma 'ngiĕo 'bơ̆t anăp Kră Yang.

²⁵Sư gô 'bet pơlôch kon triu pơm tơmam soi huai đơ̆ng hơch 'bơm pơm yoch; 'bok soi iŏk pham pik tơ hla đon gah 'ma bơngai mă wă kơ rơgoh tơ hơnglâu yŏng ti gah 'ma tơ hơnglâu yŏng jơ̆ng 'ma sư.

²⁶Đơ̆ng noh 'bok soi hling đak rơmă ôliwơ tơ tơpang ti gah 'ngiĕo sư kơdih,

²⁷tôt hơnglâu ti 'ma sư tơ đak ôliwơ, mă tơ tơpang ti 'ngiĕo sư noh, na tơtraih tơpơh wơ̆t 'bơ̆t anăp Kră Yang.

²⁸Păng pik tơ hla đon gah 'ma bơngai mă wă kơ rơgoh noh, tơ hơnglâu yŏng ti 'ma păng hơnglâu yŏng jơ̆ng 'ma sư. Tơ anih đe dan pham tơmam pơyơ̆r huai đơ̆ng tơdrong yoch hơch 'bơm.

²⁹Đak rơmă ôliwơ mă oei oei lăm ti 'bok soi tuh tơ kơ̆l bơngai wă kơ rơgoh noh, wă pơm rơgoh kơ sư đơ̆ng yoch 'bơ̆t anăp Kră Yang.

³⁰Păng 'bok soi sư kư̆m gô pơyơ̆r, minh lăm 'bar tŏ kon sem kơtơp dah minh lăm 'bar tŏ sem pơgâm kiơ̆ kơ sư kĕ đei.

³¹Pơyơ̆r minh pôm kon sem 'nâu pơm tơmam soi huai đơ̆ng yoch, minh pôm kon sem noh pơm tơmam soi 'buh, hăm tơmam soi phe 'ba; thoi noh 'bok soi gô soi sơmah ăn kơ bơngai mă wă kơ đei rơgoh noh, 'bơ̆t anăp Kră Yang.

³²Noh minh tơdrong juăt gah bơngai jĭ chin dơnuh hin ưh kơ đei tơmam pơyơ̆r, wă kơ rơgoh đơ̆ng tơdrong jĭ sư.

³³Kră Yang khan kơ Môis păng Arôn:

³⁴Layơ lu iĕm mơ̆t tơ char Kanaan, mă Inh gô ăn kơ lu iĕm jang sa păng Inh ăn tơdrong jĭ phơ̆k lăm minh pôm hnam, lăm char mă lu iĕm đei iŏk oei jang sa,

³⁵tơ'ngla hnam noh athei năm roi kơ 'bok soi thoi âu: Inh đei 'bôh tơdrong jĭ phơ̆k tơ hnam nhôn.

³⁶'Bok soi tơtă athei wơh lu sư iŏk đĭ dôm mŭk tơmam đơ̆ng lăm hnam tơlĕch đĭ tơ 'nguaih, adrol kơ wă lăng tơdrong jĭ phơ̆k noh, wă kơ tơdrong jĭ kơnê̆ 'mê̆-'mach noh huay kơ apoh, đang kơ iŏk hơmet bơih 'bok soi gô mơ̆t lăng.

³⁷Sư gô lăng tơdrong jĭ noh, tơdah tơdrong jĭ phơ̆k klep tơ tơnăr hnam 'bôh đei lơ anih phơ̆k kơmưt dah 'brê, tơdah tơdrong jĭ noh sa jrŭ tơ lăm tơnăr.

³⁸Na 'bok soi gô lĕch tơ 'nguaih kơ 'măng hnam, tang chĭt lê̆ 'măng hnam noh lăm tơpơh năr.

³⁹Lăm năr mă tơpơh, 'bok soi wơ̆t lăng dơ̆ng, tơdah 'bôh tơdrong jĭ sa lanh tơ tơnăr hnam.

⁴⁰Thoi noh, 'bok soi gô athei đe iŏk lê̆ tơmo hnam 'bơm jĭ phơ̆k noh, na klơ̆m lê̆ tơ anih 'mê̆-'mach 'nguaih kơ pơlei.

⁴¹Păng athei đe hơkôih đĭ lăm hnam, jum dăr kơ hnam păng chup đĭ 'bruih đêl hơkôih ei tuh tơ anih 'mê̆-'mach 'nguaih kơ pơlei.

⁴²Đơ̆ng noh iŏk tơmo plơ̆ng, tah pơklep đêl tơmo noh păng lŭk chuơh na man bah tơnăr hnam noh.

⁴³Tơdah tơdrong jĭ phơ̆k đei dơ̆ng đơ̆ng rŏng kơ iŏk tơmo noh, hơkôih lăm hnam păng man ming tơnăr, hnam noh.

⁴⁴'Bok soi gô năm lăng dơ̆ng, tơdah 'bôh tơdrong jĭ phơ̆k lanh rai să, lei noh jơ̆ jĭ phơ̆k thoi sa lanh lăm hnam, na hnam noh jing kơnê̆ 'mê̆-'mach.

⁴⁵Thoi noh athei đe yuih đĭ hnam noh, tơmo, 'long păng chuơh, tŏng pơdŭ đĭ tuh lê̆ tơ anih 'mê̆-'mach 'nguaih kơ pơlei.

⁴⁶Bu mơ̆t lăm hnam mă đe tang lê̆ boih, bơngai noh jing kơnê̆ 'mê̆-'mach truh kơmăng.

⁴⁷Bu 'bĭch dah sŏng sa lăm hnam noh athei pih hơbĕn ao sư.

⁴⁸Mă-lei đơ̆ng rŏng kơ hnam mă đei man bah ming tơdah 'bok soi wơ̆t lăng, ưh pă đei 'bôh tơdrong jĭ phơ̆k sa lanh lăm hnam, 'bok soi gô khan hnam noh rơgoh, yua kơ tơdrong jĭ phơ̆k klaih bơih.

⁴⁹Tơdrong wă pơm rơgoh kơ hnam 'noh, sư athei iŏk 'bar tŏ sem iĕ, hăm 'long hơngo, che brai 'brê hơhĭm păng hla 'long pơgang.

⁵⁰Sư gô pơlôch minh pôm sem lăm gŏ teh, tơ đak ro hlăng.

⁵¹Đơ̆ng noh iŏk 'long hơngo bri Sêđar, hla pơgang Hisôp, che brai 'brê hơhĭm păng sem arih, djrŭ lu tơmam âu, tơ lăm pham sem mă kăt hơko pơlôch lăm gŏ teh tơ đak ro hlăng păng tơtraih tơpơh wơ̆t tơ hnam.

⁵²Thoi noh wă pơm rơgoh kơ hnam noh, sư iŏk pham sem, đak ro hlăng, sem oei arih, 'long hơngo Sêđar, hla 'long pơgang Hisôp, che brai 'brê hơhĭm.

⁵³Đơ̆ng noh sư achăng sem oei arih păr 'nguaih kơ pơlei truh tơ chŭn mir. Thoi âu sư soi sơmah kơ hnam noh wă kơ rơgoh, na hnam noh gô jing rơgoh.

⁵⁴Noh jing tơdrong juăt kơ đĭ-đăng tơdrong jĭ phơ̆k păng đơđik.

⁵⁵Tơdrong jĭ phơ̆k đei phơ̆k tơ hơbĕn ao dah tơ hnam oei.

⁵⁶'Bơ̆t anih pơ'ngeh, djah, rơka tơlŏng.

⁵⁷Bơtho tơ'bôh wă kơ băt, liơ mă jing kơnê̆ 'mê̆-'mach păng liơ mă jing rơgoh 'lơ̆ng, noh jơ̆ khôi juăt tơdrong jĭ phơ̆k.