Read bahnar Lew 16 Bible Online

Lew 16 - bahnar bible

Lew 16

¹Đơ̆ng rŏng kơ 'bar 'nu kon drŏ-nglo Arôn lôch kơplah măr sư năm jê̆ 'bơ̆t anăp Kră Yang,

²Kră Yang khan kơ Môis thoi âu: Khan bĕ kơ Arôn 'nhŏng ih 'nĕ kơ mơ̆t ling-lang tơ anih 'lơ̆ng rơgoh tơ lăm kơ che đe pĕng 'bơ̆t anăp tơnglơ̆p mơnat ăn 'măn tơ kơpal kơ hom tơdrong pơgơ̆p, kơnh hli kơ sư lôch, yua kơ Inh gô oei lăm hơmơ̆l tơ'bôh tơ anih mơnat ăn.

³Arôn gô mơ̆t lăm anih 'lơ̆ng rơgoh thoi âu: Sư dui ba minh pôm rơmo dăm wă pơm tơmam soi huai đơ̆ng yoch păng minh pôm triu tơno wă pơm tơmam soi 'buh.

⁴Sư gô hrŭk ao tai che hơtăng rơgoh păng hơbĕn che, tơ̆n tơlei tơ̆n che păng yơ̆l môk che tơ kơ̆l sư, noh jơ̆ hơbĕn ao 'lơ̆ng rơgoh mă-lei sư gô hrŭk đang kơ sư hum.

⁵Ăn kơ sư iŏk đơ̆ng lăm tơpôl kon pơlei Isơrael 'bar tŏ bơbe tơno wă pơm tơmam soi huai đơ̆ng yoch păng minh pôm triu tơno yua pơm tơmam soi 'buh.

⁶Arôn gô pơyơ̆r rơmo dăm pơm tơmam soi huai đơ̆ng yoch sư kơdih, sư gô soi sơmah wă kơ rơgoh đơ̆ng yoch sư păng hnam dơnŏ sư.

⁷Na sư gô rôp 'bar tŏ bơbe tơno, dan 'bơ̆t anăp Kră Yang tơ 'măng Bơsŭn Anih Akŭm.

⁸Arôn gô hlang lăng kơ 'bar tŏ bơbe tơno noh, mă minh wă 'măn kơ Kră Yang, minh dơ̆ng kơ Asasên wă khan pŭ iŏk đĭ tơdrong yoch.

⁹Arôn gô pơyơ̆r bơbe tơno, trŏ 'măn kơ Kră Yang, na pơyơ̆r sư pơm tơmam soi huai đơ̆ng yoch.

¹⁰Gah bơbe mă trŏ kơ Asasên wă pŭ iŏk đĭ tơdrong yoch sư pơyơ̆r oei arih lê̆ 'bơ̆t anăp Kră Yang wă pơm rơgoh tơdrong yoch, đơ̆ng noh achăng lê̆ sư tơ tơmăn glă wă kơ sư pŭ iŏk đĭ tơdrong yoch kon pơlei.

¹¹Arôn pơyơ̆r rơmo dăm, pơm tơmam soi huai đơ̆ng yoch, sư pơlôch rơmo noh soi sơmah wă kơ goh đơ̆ng yoch sư kơdih păng hnam dơnŏ sư.

¹²Sư iŏk bô̆i kep ngar ŭnh ngŭr 'brê kơpal chơnang soi 'bơ̆t anăp Kră Yang păng iŏk 'bar chup tah tơmam 'bâu phu hĕch, na chĕp ba tơ gah lăm kơ che pĕng.

¹³Sư gô dan tơmam 'bâu phu kơpal ŭnh 'bơ̆t anăp Kră Yang wă kơ 'nhui đơ̆ng rơmă gom lê̆ tơnglơ̆p tơdrong mơnat ăn, tơ kơpal hom tơdrong pơgơ̆p. Na sư huay kơ lôch.

¹⁴Sư gô iŏk pham rơmo tơno noh, djrŭ hơnglâu ti sư tơtraih tơ tơnglơ̆p tơdrong mơnat ăn păng tơtraih tơpơh wơ̆t gah anăp tơnglơ̆p tơdrong mơnat ăn noh.

¹⁵Đơ̆ng noh sư gô pơlôch bơbe tơno pơm tơmam soi yua huai đơ̆ng yoch kon pơlei pơla; sư chĕp ba pham bơbe noh tơ lăm che pĕng, kư̆m thoi yua pham rơmo dăm mơ̆n, tơtraih tơ kơpal tơnglơ̆p tơdrong mơnat ăn păng tơ anăp tơ'bơ̆p mơnat ăn.

¹⁶Thoi noh sư năm soi sơmah tơ lăm anih 'Lơ̆ng rơgoh yua kơ đơ̆ng tơdrong kơnê̆ 'mê̆-'mach, pơm glăi, yoch kon pơlei Isơrael na sư athei soi sơmah huai đơ̆ng tơdrong yoch. Sư kư̆m soi sơmah huay đơ̆ng yoch kơ Bơsŭn Anih Akŭm, yua kơ anih akŭm oei tơ tŏk-bŏk tơdrong kơnê̆ 'mê̆-'mach lu sư.

¹⁷Kơplah 'bok soi mơ̆t lăm Bơsŭn Anih Akŭm wă soi sơmah huai đơ̆ng tơdrong yoch lăm anih 'lơ̆ng rơgoh, 'nĕ kơ ăn minh 'nu bơngai bu oei lăm noh, dĭng truh tơ sư lĕch, đơ̆ng rŏng kơ sư soi sơmah huai đơ̆ng yoch sư kơdih, hnam dơnŏ sư păng đĭ-đăng kon pơlei Isơrael.

¹⁸Đơ̆ng noh sư gô lĕch năm tơ chơnang soi 'bơ̆t anăp Kră Yang, soi sơmah kơ chơnang soi wă kơ rơgoh; sư iŏk pham rơmo dăm păng pham bơbe tơno pik jum dăr lu ake chơnang soi.

¹⁹Păng iŏk hơnglâu ti sư tơtraih pham tơpơh wơ̆t tơ chơnang soi, pơm kơ chơnang soi jing 'lơ̆ng rơgoh păng ôp lê̆ đơ̆ng tơdrong kơnê̆ 'mê̆-'mach kon pơlei Isơrael.

²⁰Layơ 'bok soi, soi sơmah huai yoch ăn kơ anih 'lơ̆ng rơgoh, kơ Bơsŭn Anih Akŭm, kơ chơnang soi đang boih, lei sư gô pơyơ̆r bơbe tơno oei arih.

²¹Arôn dan 'bar pah ti sư kơpal kơ̆l bơbe tơno mă oei arih, na roi đĭ-đăng dôm tơdrong yoch kơnê̆ pơm glăi lu kon pơlei Isơrael păng dan đĭ-đăng tơdrong yoch lu sư pơm boih kơpal kơ̆l bơbe tơno. Đơ̆ng noh yua minh 'nu bơngai đei jao boih tơdrong jang 'nâu na puh achăng bơbe noh tơ tơmăn glă.

²²Kon bơbe noh gô pŭ tơ akâu sư dôm tơdrong yoch kon pơlei Isơrael, lĕch tơ bri brah ưh kơ đei bơngai, đe achăng bơbe noh tơ tơmăn glă.

²³Arôn gô mơ̆t lăm Bơsŭn Anih Akŭm, plôh lê̆ hơbĕn ao đêl sư hrŭk mơ̆t tơ anih 'lơ̆ng rơgoh păng sư gô lê̆ hloi hơbĕn ao tơ noh.

²⁴Sư gô hum tơ lăm minh anih 'lơ̆ng rơgoh, hrŭk ao sư, lĕch tơ 'nguaih, pơyơ̆r tơmam soi 'buh kơ sư kơdih păng tơmam soi 'buh kơ kon pơlei pơla, soi sơmah kơ sư kơdih păng kon pơlei pơla wă kơ rơgoh.

²⁵Sư gô iŏk rơmă tơmam soi huai tơdrong yoch na soh pơyơ̆r tơ kơpal chơnang soi.

²⁶Bơngai mă dui tơlĕch bơbe tơno gah pŭ tơdrong yoch kon pơlei athei pih hơbĕn ao sư păng hum lăm đak, đơ̆ng noh sư gơh brŏk mơ̆t tơ gơđông.

²⁷Đe gô anhăk ba rơmo tơno păng bơbe tơno tơ 'nguaih kơ gơđông, tơmam mă hlôi pơyơ̆r bơih pơm tơmam soi huai iŏk đơ̆ng yoch, pham sư đe anhăk ba tơ anih 'lơ̆ng rơgoh wă soi sơmah huai tơdrong yoch; đơ̆ng noh sư gô iŏk soh lê̆ lăm ŭnh, akar, sĕch păng ĭch, tơmam soi noh tơ 'nguaih kơ gơđông.

²⁸Bơngai mă soh athei pih hơbĕn ao sư păng hum; đơ̆ng noh na gơh brŏk mơ̆t tơ gơđông.

²⁹'Nâu jing tơdrong juăt kơ lu iĕm ling-lang khŏm khŏm truh tơ năr mơjĭt lăm khei tơpơh, lu iĕm athei pơmat akâu lu iĕm kơdih, ưh kơ gơh pơm minh tơdrong kiơ, mă kon pơlei pơla iĕm kơdih, dah tơmoi nai bơngai đơ̆ng ataih oei hăm lu iĕm.

³⁰Yua kơ lăm năr noh đe gô soi sơmah ôp rơgoh lu iĕm đơ̆ng yoch, wă kơ lu iĕm gơh rơgoh, na lu iĕm gô rơgoh tơdrong yoch lu iĕm 'bơ̆t anăp Kră Yang.

³¹Noh jing thoi năr Sa'bat kơ lu iĕm, minh năr pơdơh pơyom, lu iĕm athei pơmat akâu iĕm kơdih, noh jing tơdrong juăt ling-lang.

³²'Bok soi gô tuh rơmă păng pôk sư pơm 'bok soi tơplih kơ 'bă sư, wă soi sơmah huai đơ̆ng tơdrong yoch, gô hrŭk hơbĕn ao che wă khan hơbĕn ao 'lơ̆ng rơgoh, na soi sơmah huai iŏk tơdrong yoch.

³³Sư mă soi sơmah pơm rơgoh ăn kơ anih rơgoh păng kơ Bơsŭn Anih Akŭm păng soi sơmah kơ chơnang soi, soi sơmah kơ lu 'bok soi păng soi sơmah kơ đĭ-đăng kon pơlei Isơrael.

³⁴Minh sơnăm minh wơ̆t athei soi sơmah huai đơ̆ng yoch kon pơlei Isơrael, wă pơm rơgoh tơdrong yoch lu sư, noh gô jing tơdrong juăt lu iĕm ling-lang khŏm khŏm. Arôn pơm rok kiơ̆ thoi Kră Yang khan pơkă bơih kơ Môis.