Read bahnar Lew 17 Bible Online

Lew 17 - bahnar bible

Lew 17

¹Kră Yang khan kơ Môis thoi âu:

²Khan bĕ kơ Arôn, lu kon drŏ-nglo sư păng đĭ-đăng kon pơlei Isơrael: 'Nâu nơ̆r Kră Yang tơtă boih.

³Tơdah minh 'nu bơngai drŏ-nglo, đơ̆ng lăm hnam Isơrael koh pơlôch minh pôm rơmo, minh pôm kon triu dah minh pôm bơbe lăm anih kơđông dah 'nguaih kơ anih kơđông,

⁴na ưh kơ dui ba tơ 'măng Bơsŭn Anih Akŭm, wă pơyơ̆r kơ Kră Yang 'bơ̆t anăp Bơsŭn Anih Akŭm kơkuh kơ Kră Yang, pham noh gô tuh tơpŭ tơdrong yoch kơ bơngai drŏ-nglo noh; sư 'bet tuh pham bơih; đe gô tơlĕch sư đơ̆ng kon pơlei Isơrael.

⁵Tơdrong noh wă kơ kon pơlei Isơrael iŏk tơmam soi lu sư mă đei 'bet pơlôch tơ bri tơ mir, na anhăk ba kơ 'bok soi, 'bơ̆t anăp Kră Yang tơ 'măng Bơsŭn Anih Akŭm. Wă 'bet pơyơ̆r soi sơmah kơ tơdrong 'blŏk bơnê kơ Kră Yang.

⁶'Bok soi gô tơtraih pham tơmam soi tơ kơpal chơnang soi kơ Kră Yang 'bơ̆t 'măng Bơsŭn Anih Akŭm păng soh pơyơ̆r rơmă đei 'bâu phu ăn kơ Kră Yang.

⁷Kon pơlei Isơrael ưh pă pơyơ̆r tơmam soi lu sư kơ yang kơnê̆ păng ưh pă tơ'bưh pơm pơyô kư̆ kă hăm lu sư dơ̆ng. Noh jing tơdrong juăt ling-lang kơ lu sư lăm đĭ chăl đơ̆ng rŏng.

⁸Thoi noh ih athei khan kơ lu sư: Tơdah bu mă lăm bơngai Isơrael, dah bơngai tơmoi oei lăm lu kon pơlei, sư pơyơ̆r minh pôm tơmam soi 'buh dah pơyơ̆r tơmam soi kiơ,

⁹na ưh kơ chĕp ba tơ 'măng Bơsŭn Anih Akŭm wă pơyơ̆r kơ Kră Yang, lei bơngai noh đe gô puh tơweh sư đơ̆ng kon pơlei Isơrael.

¹⁰Tơdah bơngai bu mă đơ̆ng lăm adrĕch Isơrael, dah bơngai tơmoi oei hăm sư, sa pham kiơ bưh, lei Inh gô iung hil mĭl kơ bơngai sa pham noh, Inh gô puh tơhiong lê̆ sư đơ̆ng bơngai Isơrael sư.

¹¹Yua kơ tơdrong ariha sĕch akar oei tơ lăm pham; Inh ăn boih kơ lu iĕm pham tơtraih tơ chơnang soi wă soi sơmah huai đơ̆ng yoch bơhngol lu iĕm; yua kơ pham jing tơdrong arih.

¹²Yua kơ tơdrong noh na Inh khan boih kơ bơngai Isơrael, Lăm lu iĕm ưh kơ gơh minh 'nu bơngai bu mă sa pham, bơngai tơmoi oei hăm iĕm kư̆m ưh kơ gơh sa pham.

¹³Thoi noh mơ̆n tơdah đei minh 'nu bơngai lăm kon pơlei Isơrael dah đơ̆ng lăm bơngai tơmoi, chă hơnguang đei minh pôm jĭl juei dah sem păr mă bơ̆n juăt kơ sa, 'bet lê̆ pham lĕch na iŏk teh 'bŭ lê̆.

¹⁴Yua kơ tơdrong arih đĭ-đăng lu kon sem brem lăm pham ngăl, yua kơ thoi noh na Inh khan boih kơ đĭ-đăng kon pơlei Isơrael, lu iĕm ưh kơ gơh sa pham dôm lu kon sem brem, yua kơ tơdrong arih lu sem brem noh jơ̆ lăm pham sư, bu sa đe gô puh tơweh lê̆ sư.

¹⁵Bơngai bu đơ̆ng pơlei kơtă dah đơ̆ng tơmoi, na sa 'nhĕm sem brem lôch kơmăp kơdih dah lôch đơ̆ng đêl sem bri kăp bơngai noh athei pih hơbĕn ao sư, hum lăm đak păng gô đei kơnê̆ 'mê̆-'mach truh kơmăng, klaih kơ noh sư jing rơgoh.

¹⁶Tơdah sư ưh kơ pih hơbĕn ao sư păng ưh kơ hum, sư gô pŭ tơdrong yoch sư.