Read bahnar Lew 18 Bible Online

Lew 18 - bahnar bible

Lew 18

¹Kră Yang khan kơ Môis:

²Khan bĕ kơ kon pơlei Isơrael, Inh jing Kră Yang lu iĕm.

³Lu iĕm 'nĕ kơ pơm rok ôh tơdrong lu sư pơm tơ lăm char Êyiptơ, char mă đêl lu iĕm oei, dah tơ char Kanaan, đơ̆ng char noh mă Inh chông ba lu iĕm. Lu iĕm kư̆m 'nĕ kơ yak kiơ̆ tơdrong juăt lu sư ôh.

⁴Lu iĕm athei pơm kiơ̆ kơ nơ̆r Inh đei tơtă boih, bơwei tơdrong juăt Inh na yak kiơ̆ tơdrong noh, Inh jing Kră Yang lu iĕm.

⁵Thoi noh lu iĕm athei wei răk tơdrong juăt Inh păng nơ̆r Inh tơtă, bu mă pơm kiơ̆ tơdrong noh, sư gô arih, Inh boih Kră Yang.

⁶'Nĕ kơ ăn minh 'nu lăm lu iĕm năm jê̆ bơngai drŏ-kăn kơtum kơtŏng iĕm kơdih na hưch pơm kư̆ kă, Inh boih Kră Yang.

⁷'Nĕ kơ pơm pơ'brơh kơ 'bă ih, hưch pơm kư̆ kă hăm mĕ ih kơdih, yua kơ bre sư mĕ 'bă ih.

⁸'Nĕ kơ hưch pơm kư̆ kă hăm akăn 'bă ih; tơdrong noh pơm mơlâu pơ'brơh kơ 'bă ih.

⁹'Nĕ kơ hưch pơm kư̆ kă kơ mai oh ih kơdih, mă khan pôm 'bă mĕ phara, dah minh pôm mĕ, 'bă phara, mă khan tơpŭ lăm hnam dah tơpŭ phara hnam.

¹⁰'Nĕ kơ hưch pơm kư̆ kă hăm mon drŏ-kăn ih, mă khan mon gah mĕ dah gah 'bă, mưh ih hưch pơm kư̆ kă noh pơm mơlâu pơ'brơh kơdih akâu.

¹¹'Nĕ kơ hưch pơm kư̆ kă hăm kon adruh akăn 'bă ih, đơ̆ng 'bă ih pơjing, yua kơ sư jing mai oh ih kơdih.

¹²'Nĕ hưch pơm kư̆ kă hăm duch nă gah 'bă, yua kơ sư jing mai oh 'bă ih.

¹³'Nĕ hưch pơm kư̆ kă hăm duch nă gah mĕ, yua kơ sư jing mai oh mĕ ih.

¹⁴'Nĕ hưch pơm kư̆ kă hăm akăn mih dah ma ih, wă khan akăn lu sư; yua kơ sư jing duch nă mĕ tơm ih.

¹⁵'Nĕ hưch pơm kư̆ kă hăm mŏ mai ih; yua kơ sư jing akăn kon drŏ-nglo ih, 'nĕ hưch kơ sư.

¹⁶'Nĕ hưch pơm kư̆ kă hăm mi dah duch; yua kơ sư akăn 'nhŏng păng oh ih.

¹⁷'Nĕ hưch pơm kư̆ kă hăm minh 'nu bơngai drŏ-kăn păng kon adruh sư. Kŭm 'nĕ hưch kơ sâu drŏ-kăn gah kon drŏ-nglo dah hưch kơ sâu drŏ-kăn gah kon drŏ-kăn sư. Lu sư noh jing adrĕch adrung sư jê̆ dêh; pơm thoi noh kơnê̆ tơpă.

¹⁸'Nĕ iŏk mŏ mai dah oh akăn ih, wă plah tơgar iŏk hưch pơm kư̆ kă, kơplah akăn ih oei arih.

¹⁹Kơplah drŏ-kăn oei 'bôh jơ̆ng 'nĕ kơ năm jê̆ na 'bĭch hăm sư.

²⁰'Nĕ kơ 'bĭch hăm akăn rông 'bôt ih, kơnh pơm kơ ih jing kơnê̆ 'mê̆-'mach ih hăm sư.

²¹'Nĕ kơ pơyơ̆ra kon hơ'lơ̆p ih kơ yang Mơlŏk, b 'nĕ kơ pơm 'mê̆-'mach kơ anăn Kră Yang 'Bok Kei-Dei ih, inh bơih Kră Yang.

²²'Nĕ kơ 'bĭch pơm tơduă drŏ-nglo, thoi 'bĭch hăm bơngai drŏ-kăn;c tơdrong noh jing tơdrong Kră Yang 'Bok Kei-Dei hil mĭl dêh.

²³'Nĕ kơ 'bĭch pơm kư̆ kă hăm kon sem brem. Na pơm kơdih akâu 'mê̆-'mach hăm sư, bơngai drŏ-kăn kư̆m 'nĕ ăn akâu sư kơ kon sem brem wă 'bĭch pơm kư̆ kă hăm sư; noh jing minh tơdrong pơm kơnê̆ dêh.

²⁴Lu iĕm 'nĕ kơ pơm minh tơdrong kiơ lăm dôm tơdrong noh na pơm kơ akâu iĕm kơdih jing kơnê̆ 'mê̆-'mach, lu kon pơlei mă Inh puh tơweh đơ̆ng anăp măt lu iĕm, lu sư jing kơnê̆ 'mê̆-'mach bơih.

²⁵Teh âu, yua kơ lu sư na kơnê̆ 'mê̆-'mach boih, Inh gô phak tơdrong kơnê̆ lu sư, teh gô hăk tơlĕch lê̆ kon pơlei sư.

²⁶Gah lu iĕm, kon pơlei kơtă dah đơ̆ng tơmoi oei hơdai lu iĕm, athei bơwei răk khôi juăt păng nơ̆r Inh tơtă 'nĕ kơ pơm minh tơdrong kơnê̆ chư̆ tơdrong mă Inh areh,

²⁷yua kơ dôm tơdrong kơnê̆ 'mê̆ brư̆ Inh areh noh, lu bơngai oei lăm char âu hlôi pơm, lu bơngai mă oei adrol kơ lu iĕm, yua kơ thoi noh na char âu jing kơnê̆ 'mê̆-'mach boih;

²⁸thoi noh 'nĕ pơm kơ teh đak jing kơnê̆ 'mê̆-'mach, kơnh hli kơ teh đak gô hăk tơlĕch lê̆ lu iĕm, thoi đei hăk lê̆ bơih kon pơlei mă oei tơ lăm char âu adrol kơ lu iĕm.

²⁹Yua kơ adrĕch bu pơm minh lăm dôm lu tơdrong kơnê̆ mă Inh areh noh, đe gô puh tơweh sư lĕch đơ̆ng kon pơlei lu sư.

³⁰Thoi noh na lu iĕm athei wei răk bĕ tơdrong Inh tơtă, 'nĕ kơ pơm ôh minh lăm tơdrong juăt kơnê̆ mă Inh areh âu, mă lu oei adrol kơ iĕm lu sư pơm boih păng lu iĕm 'nĕ yua tơdrong kơnê̆ noh na pơm kơ iĕm jing kơnê̆ 'mê̆-'mach, Inh boih Kră Yang 'Bok Kei-Dei lu iĕm.