Read bahnar Lew 19 Bible Online

Lew 19 - bahnar bible

Lew 19

¹Kră Yang khan kơ Môis:

²Roi tơbăt ăn bĕ kơ đĭ-đăng kon pơlei Isơrael khŭl akŭm, lu iĕm athei oei sa mă 'lơ̆ng rơgoh bĕ, yua kơ Inh Kră Yang lu iĕm 'lơ̆ng rơgoh.

³Rim 'nu lu iĕm athei lui yom kơ mĕ 'bă păng răk năr Sa'bat Inh, Inh boih Kră Yang 'Bok Kei-Dei lu iĕm.

⁴'Nĕ kơ man rup yang păng kư̆m 'nĕ kơ tuh hling pơm rup yang, Inh boih Kră Yang 'Bok Kei-Dei lu iĕm.

⁵Tơdah lu iĕm pơyơ̆r tơmam soi 'blŏk bơnê kơ Kră Yang, lu iĕm pơyơ̆r thoi yơ trŏ lăp na Inh iŏk.

⁶Iĕm athei sa lăm năr iĕm pơyơ̆r noh, dah năr dơning đĕch; lu tơmam mă rơkah truh năr mă pêng athei tuh soh lê̆ tơ ŭnh.

⁷Tơdah đe sa 'nhĕm 'măn truh kơ năr mă pêng noh jơ̆ minh tơdrong kơnê̆ Inh Kră Yang areh dêh; ưh kơ iŏk ôh.

⁸Bu sa tơmam soi thoi noh gô pŭ iŏk tơdrong yoch sư kơdih, yua kơ sư pơm 'mê̆-'mach kơ tơmam rơgoh 'lơ̆ng Kră Yang bơngai noh; đe gô puh tơlĕch đơ̆ng kon pơlei pơla sư.

⁹Tơdah lu iĕm kĕch yuă 'ba lăm tơring iĕm, 'nĕ kơ yuă truh tơ tôch mum chŭn. Păng kư̆m 'nĕ kơ chă dônh mok lu ba oei đei.

¹⁰Iĕm kư̆m 'nĕ kơ phĕ hơlơ̆k plei hơmu 'bar wơ̆t, kư̆m 'nĕ kơ dônh lu plei hơmu đêl huŏng, iĕm athei lê̆ kơ lu bơngai dơnuh hin păng bơngai tơmoi 'bĭch ngôi dônh. Inh boih Kră Yang lu iĕm.

¹¹Lu iĕm kư̆m 'nĕ kơ tơtông, kư̆m 'nĕ kơ pơhlŭ hơlĕnh 'nĕ kơ chă plêl pơdăr kơ đe.

¹²Lu iĕm 'nĕ kơ yua anăn Inh na pơkă hơlĕnh, yua kơ ih pơm kơnê̆ kơ Kră Yang 'Bok Kei-Dei ih, Inh boih Kră Yang.

¹³'Nĕ kơ pơjăm pơjuă bơngai oei cheng pleh kơ ih, 'nĕ kơ tơtông tơgar tơmam lu sư. Tơmam apah bơngai jang kơ iĕm, 'nĕ kơ wei lê̆ tơ hnam iĕm truh tơnăr dơning.

¹⁴'Nĕ kơ hiap bơngai klĭk, kư̆m 'nĕ kơ dan lê̆ tơmam kiơ 'bơ̆t anăp bơngai măt tol, wă pơm kơ sư kơtơih pơ̆k, ih athei hli yom kơ Kră Yang 'Bok Kei-Dei ih, Inh bơih Kră Yang.

¹⁵Lăm iĕm sek tơlang 'nĕ kơ pơm glăi tơdrong tơpăt. 'Nĕ kơ mơ̆t bơngai dơnuh hin dah bơngai pơm yŏng tih ôh, na athei sek tơlang tơpăt kơ bơngai rông 'bôt bơ̆n.

¹⁶'Nĕ kơ roi sa pơma 'bơm, 'nĕ chă tơdrong wă pơm kơnê̆ kơ rông 'bôt ih, Inh bơih Kră Yang.

¹⁷'Nĕ kơ đei jơhngơ̆m areh arĕnh kơ 'nhŏng oh bơ̆n, athei bơtho pơlung rông 'bôt ih, 'nĕ kơ ăn kơdih akâu puh yoch yua kơ lu sư pơm glăi.

¹⁸'Nĕ kơ pơm 'mong răk rong mong găr hăm rông 'bôt kơtum kơtŏng 'nhŏng oh ih, athei 'mêm kơ lu sư thoi ih 'mêm akâu ih kơdih, Inh boih Kră Yang.

¹⁹Lu iĕm athei bơwei răk nơ̆r Inh tơtă, 'nĕ kơ ăn kon sem dơrong phara adrĕch tơkiơ̆ băl, 'nĕ kơ rei lăm chŭn ih 'bar tŏ anăn adrĕch păng 'nĕ kơ hrŭk ao đe tanh hăm lơ brai phara.

²⁰Tơdah minh 'nu bơngai drŏ-nglo 'bĭch hăm minh 'nu bơngai drŏ-kăn đĭch, mă hơkơ̆t bơih hăm minh 'nu bơngai drŏ-nglo nai, mă-lei đe tam mă huai răt iŏk sư dah pơklaih sư rơngei đơ̆ng đĭch, na đe gô sek tơlang kơ măr sư, mă-lei ưh kơ truh kơ pơlôch ôh, yua kơ bơngai drŏ-kăn tam mă rơngei đơ̆ng đĭch.

²¹Yua kơ tơdrong yoch sư bơngai drŏ-nglo athei năm ba minh pôm triu tơno pơyơ̆r tơ anăp Kră Yang, tơ 'măng Bơsŭn Anih Akŭm, na pơm tơmam soi sơmah huai đơ̆ng tơdrong yoch.

²²'Bok soi gô iŏk triu tơno noh pơm tơmam soi wă kơ goh đơ̆ng tơdrong hơch 'bơm pơm yoch, 'bơ̆t anăp Kră Yang wă soi sơmah ăn kơ bơngai mă đêl pơm glăi noh, thoi noh tơdrong yoch sư gơh mơnat ăn.

²³Tơdah lu iĕm mơ̆t bơih lăm char Kanaan păng đei pơtăm boih lu plei 'long sa iĕm athei lăng lu plei noh ưh kơ rơgoh;a lăm pêng sơnăm đe khă lu iĕm, 'nĕ kơ sa plei noh ôh.

²⁴Mă-lei truh kơ sơnăm mă puăn, lu plei noh jing rơgoh 'lơ̆ng, jing tơmam pơyơ̆r kơ Kră Yang.

²⁵Truh lăm sơnăm mă pơđăm lu iĕm gơh sa plei noh, wă kơ plei rai lơ hloh ăn kơ iĕm, inh boih Kră Yang 'Bok Kei-Dei lu iĕm.

²⁶Lu iĕm 'nĕ kơ sa 'nhĕm mă oei đei pham, 'nĕ kơ pơm pơjâu chă tơwir lăng tơdra.

²⁷'Nĕ kơ yuă sŏk klĕng păng 'nĕ kơ yuă sŏk kang ôh.

²⁸Kơplah bơngai lôch iĕm 'nĕ kơ 'bet akâu, 'nĕ kơ chhơ̆ săm akâu iĕm, Inh boih Kră Yang.

²⁹'Nĕ kơ pơm pơ'mê̆ kơ kon adruh ih, 'nĕ kơ lê̆ sư pơm đi kư̆ kă, kơnh lăm tơring bơ̆n jing pơm đi păng 'bĕnh kơ tơdrong kơnê̆.

³⁰Lu iĕm athei bơwei năr Sa'bat păng pơyom kơ Anih 'Lơ̆ng Rơgoh Inh, Inh boih Kră Yang lu iĕm.

³¹'Nĕ kơ năm tơ lu bơngai mă juăt kơ pơma hăm yang kơnê̆ dah lu pơjâu, 'nĕ kơ chă apinh lu sư ôh kơnh pơm kơ iĕm jing kơnê̆ đơ̆ng lu sư, Inh boih Kră Yang 'Bok Kei-Dei lu iĕm.

³²Lu iĕm athei iung dơ̆ng 'bơ̆t anăp bơngai sŏk ko, lu iĕm athei pơyom kơ bơngai kră păng hli yom kơ 'Bok Kei-Dei Inh boih Kră Yang.

³³Tơdah bơngai tơmoi oei hơdai lăm tơring lu iĕm, 'nĕ kơ pơjuă pơm kơnê̆ kơ sư.

³⁴Bơngai tơmoi mă chă oei pơdơh hơdai lu iĕm, athei lăng sư thoi kon pơlei iĕm kơdih. Athei 'mêm kơ lu sư thoi iĕm 'mêm akâu kơdih; yua kơ lu iĕm kư̆m đêl jing bơngai tơmoi oei tơ char Êyiptơ sơ̆. Inh boih Kră Yang 'Bok Kei-Dei lu iĕm.

³⁵Lu iĕm 'nĕ kơ pơm glăi kơplah iĕm đei sek tơlang kơ đe, dah hơgăt tơdrong kiơ kơjung dah kơđeh, 'lơ̆ng dah kơnê̆, trăp dah hơiơch.

³⁶Lu iĕm athei đei 'long kŏng tơpăt, plei kŏng athei trŏ, athei trŏ kơ êphab păng trŏ kơ hnŏng (Hin)c tơpă, Inh Kră Yang 'Bok Kei-Dei lu iĕm, tơ'ngla mă chông anhăk iĕm đơ̆ng char Êyiptơ.

³⁷Thoi noh lu iĕm athei bơwei răk pơm kiơ̆ dôm tơdrong juăt Inh păng nơ̆r Inh tơtă, Inh boih Kră Yang.