Read bahnar Lew 2 Bible Online

Lew 2 - bahnar bible

Lew 2

¹Layơ bu wă pơyơ̆r ăn kơ Kră Yang tơmam soi phe 'ba, bơngai noh athei iŏk tơpŭng hĕch lŭk hrâu hăm đak rơmă ôliwơ păng dan tơmam 'bâu phu tơ kơpal.

²Sư gô ba ăn kơ lu 'bok soi kon drŏ-nglo Arôn; lu 'bok soi gô chup iŏk minh kơđôp tơpŭng mă hrâu hăm đak rơmă ôliwơ noh păng hơdai hăm đĭ-đăng tơmam 'bâu phu sư; păng wă soh đĭ tơmam soi noh tơ kơpal chơnang soi, pơm 'blŏk hơdơ̆r minh tơdrong soi pơyơ̆r 'buh soh hăm ŭnh wă kơ 'bâu phu 'lơ̆ng ăn kơ Kră Yang.

³Dôm tơmam kiơ oei đei, đơ̆ng tơmam pơyơ̆r tơpŭng lê̆ đĭ kơ lu 'bok soi kon drŏ-nglo Arôn. Noh jơ̆ tơmam 'lơ̆ng rơgoh lăm lu tơmam pơyơ̆r soh hăm ŭnh sa mă pơyơ̆r ăn kơ Kră Yang.

⁴Layơ ih ba tơmam pơyơ̆r tơpŭng pơtŏ boih tơ lăm tơnuh ŭnh athei iŏk tơpŭng hĕch man pơm 'bĕng ưh kơ đei 'buih pông hrâu đak rơmă ôliwơ dah 'bĕng klang ưh kơ đei 'buih pông pik đak rơmă ôliwơ mơ̆n.

⁵Tơdah tơmam pơyơ̆r hăm tơpŭng hĕch hơdrĕng tơ lăm gŏ gang ih athei man hăm tơpŭng ưh kơ đei hrâu 'buih pông hăm đak rơmă ôliwơ.

⁶Phĕ sư iĕ iĕ păng tuh đak rơmă tơ kơpal, noh jơ̆ tơmam soi phe 'ba.

⁷Tơdah tơmam soi ih pơyơ̆r hăm tơpŭng hơdrĕng tơ lăm gŏ gang tih ih athei pơm hăm tơpŭng hĕch hăm đak rơmă ôliwơ.

⁸Tơmam soi tơpŭng phe 'ba hơmet lê̆ bơih, ih năm ba pơyơ̆r kơ Kră Yang, jao tơmam soi noh ăn kơ 'bok soi, sư gô chĕp ba dan tơ kơpal chơnang soi.

⁹'Bok soi sư gô iŏk tơmam soi wă pơyơ̆r noh pơm tơmam soi 'blŏk hơdơ̆r, soh tơ chơnang soi noh pơm tơmam soi soh hăm ŭnh sa đei 'bâu phu 'lơ̆ng ăn kơ Kră Yang.

¹⁰Dôm tơmam soi phe 'ba mă oei đei gô lê̆ đĭ kơ Arôn păng kon drŏ-nglo sư; noh jơ̆ tơmam soi 'lơ̆ng rơgoh hloh lăm lu tơmam soi soh hăm ŭnh sa pơyơ̆r kơ Kră Yang.

¹¹Dôm tơmam soi pơyơ̆r hăm tơpŭng phe 'ba mă lu iĕm pơyơ̆r kơ Kră Yang 'nĕ kơ hrâu hăm 'buih pông; yua kơ iĕm ưh kơ soh 'buih pông hăm đak sut ôh lăm tơmam soi pơyơ̆r soh hăm ŭnh sa wă pơyơ̆r ăn kơ Kră Yang.

¹²Lu iĕm gơh pơyơ̆r tơmam soi noh ăn kơ Kră Yang thoi tơmam soi pơyơ̆r plei blŭng-a. Mă-lei iĕm 'nĕ kơ 'buh tơ ŭnh tơ kơpal chơnang soi thoi tơmam soi đei 'bâu phu.

¹³Ih athei tah 'boh lăm dôm tơmam pơyơ̆r tơpŭng; 'nĕ ăn tơmam tơpŭng pơyơ̆r mă ưh kơ đei 'boh ôh. Yua kơ 'boh wă tơ'bôh kơ tơdrong pơgơ̆p hăm Kră Yang 'Bok Kei-Dei ih lăm dôm lu tơmam ih pơyơ̆r athei đei 'boh.

¹⁴Tơdah ih wă pơyơ̆r tơmam soi hăm tơpŭng plei 'long, phe 'ba blŭng-a lăm bơyan ăn kơ Kră Yang athei iŏk hơie 'ba oei adrih peh pơhĕch păng hơdrĕng lê̆ sư.

¹⁵Ih athei tuh đak rơmă ôliwơ păng tơmam 'bâu phu tơ kơpal sư, noh bơih tơmam soi tơpŭng phe 'ba ưh kơ đei pham.

¹⁶Đơ̆ng noh 'bok soi iŏk minh puăt lăm lu tơpŭng mă đei hrâu hăm đak rơmă ôliwơ păng tơmam 'bâu phu na soh. Wă pơm 'blŏk hơdơ̆r, noh jơ̆ tơmam soi phe 'ba hle soh lăm ŭnh pơyơ̆r ăn kơ Kră Yang.