Read bahnar Lew 20 Bible Online

Lew 20 - bahnar bible

Lew 20

¹Kră Yang khan kơ Môis:

²Ih athei khan kơ kon pơlei Isơrael. Tơdah bơngai bu lăm kon pơlei Isơrael dah bơngai tơmoi oei lăm char Isơrael jao minh 'nu kon hơ'lơ̆p sư ăn kơ yang Mơlŏk, a bơngai noh đe gô pơlôch sư, kon pơlei lăm char noh gô klơ̆m pơlôch sư hăm tơmo.

³Inh kơdih gô hil mĭl kơ bơngai noh păng pơtôch lê̆ sư đơ̆ng kon pơlei pơla sư, yua kơ sư jao kon hơ'lơ̆p sư kơ yang Mơlŏk, pơm kơ anih 'lơ̆ng rơgoh Inh jing kơnê̆ 'mê̆-'mach păng pơ'mê̆ kơ anăn 'lơ̆ng rơgoh Inh.

⁴Tơdah kon pơlei lăm char âu đơ̆p muh măt sư ưh kơ wă lăng dah ưh kơ pơlôch bơngai noh, kơplah bơngai noh jao kon hơ'lơ̆p sư kơ yang Mơlŏk,

⁵thoi noh Inh gô hil mĭl kơ bơngai noh păng hnam dơnŏ sư păng puh tơweh lê̆ sư păng lu bơngai mă kiơ̆ sư đei pơm pơyô ngôi kư̆ kă hăm yang Mơlŏk,

⁶Tơdah bu năm lăng tơ pơjâu păng bơngai pơma hăm yang kơnê̆ lui kiơ̆ na pơm pơyô ngôi kư̆ kă hăm lu sư, Inh gô hil mĭl kơ bơngai noh păng gô puh tơweh sư lĕch đơ̆ng kon pơlei pơla sư.

⁷Lu iĕm athei wei akâu iĕm jing 'lơ̆ng rơgoh, yua kơ Inh jơ̆ Kră Yang 'Bok Kei-Dei lu iĕm.

⁸Lu iĕm athei bơwei pơm kiơ̆ tơdrong juăt Inh, Inh boih Kră Yang Tơ'ngla mă pơm kơ lu iĕm jing rơgoh.

⁹Tơdah bơngai bu blei hiap mĕ dah 'bă sư đe gô pơlôch. Sư hiap boih mĕ 'bă sư na pham sư gô tuh tơ sư kơdih.

¹⁰Tơdah bơngai bu pơm kư̆ kă hưch kơ akăn đe dah pơm kư̆ kă hưch kơ akăn rông 'bôt, bre sư noh đe gô pơlôch sư.

¹¹Tơdah bơngai bu mă 'bĭch hăm akăn 'bă sư kơdih, noh jơ̆ pơm mơlâu pơ'brơh kơ 'bă sư. Bre sư pơm kư̆ kă noh đe gô pơlôch đĭ, pham lu sư gô tuh tơ kơ̆l lu sư kơdih.

¹²Tơdah bơngai bu 'bĭch hăm mŏ mai sư kơdih đĭ kơ măr sư noh đe gô pơlôch, yua kơ măr sư pơm tơdrong kơnê̆ hơgăm dêh, pham lu sư gô tuh tơ lu sư kơdih.

¹³Tơdah bơngai drŏ-nglo 'bĭch pơm kư̆ kă hăm tơduă bơngai drŏ-nglo thoi 'bĭch pơm kư̆ kă hăm bơngai drŏ-kăn, 'bar 'nu bre sư đe gô pơlôch đĭ. Yua kơ pơm boih tơdrong kơnê̆ mă Inh hil mĭl krưp dêh, pham lu sư gô tuh tơ lu sư kơdih.

¹⁴Tơdah minh 'nu bơngai drŏ-nglo iŏk bre mĕ kon na pơm akăn, noh jing tơdrong kơnê̆ chư̆ dêh; đe gô soh pơđĭ pêng 'nu lu sư, wă kơ tơdrong kơnê̆ chư̆ noh huay pă đei lăm lu iĕm.

¹⁵Tơdah đei bơngai drŏ-nglo pơm kư̆ kă hăm kon sem brem, đe gô pơlôch sư; na iĕm kư̆m athei pơlôch kon sem brem noh mơ̆n.

¹⁶Tơdah bơngai drŏ-kăn năm 'bĭch pơm kư̆ kă hăm kon sem brem ih athei pơlôch lê̆ bơngai drŏ-kăn hăm kon sem brem noh hloi. Pham lu sư gô tuh tơ lu sư kơdih.

¹⁷Tơdah minh 'nu bơngai drŏ-nglo, iŏk mŏ dah oh sư kơdih minh pôm 'bă, na mĕ phara dah pôm mĕ na 'bă pha, na sư ngôi kư̆ kă, noh jing tơdrong kơnê̆ pơm kư̆ kă đe gô puh tơlĕch sư đơ̆ng anăp kon pơlei lu sư, bơngai pơm kơnê̆, pơ'brơh kơ mŏ oh sư, sư gô pŭ iŏk tơdrong glăi kơnê̆ sư.

¹⁸Tơdah bơngai drŏ-nglo 'bĭch hăm bơngai drŏ-kăn kơplah oei 'bôh jơ̆ng; bơngai drŏ-nglo pơm kơ pham bơngai drŏ-kăn lĕch, na bơngai drŏ-kăn tơlĕch pham sư kơdih, 'bar 'nu sư noh, đe gô puh tơlĕch weh đơ̆ng kon pơlei lu sư.

¹⁹'Nĕ kơ hưch pơm kư̆ kă hăm mai oh gah mĕ dah mai oh gah 'bă ih, yua kơ tơdrong noh pơm mơlâu pơ'mê̆ kơ adrĕch adrung jê̆ bơ̆n; 'bar 'nu bre noh gô pŭ tơdrong glăi sư.

²⁰Tơdah minh 'nu drŏ-nglo 'bĭch hăm duch akăn ma, nă akăn mih sư kơdih, noh jơ̆ pơm pơ'brơh kơ mih ma sư, bre sư noh gô pŭ tơdrong kơnê̆ sư, măr sư gô lôch ưh kơ đei kon ôh.

²¹Tơdah minh 'nu bơngai drŏ-nglo hưch kơ akăn 'nhŏng oh sư kơdih, noh jơ̆ tơdrong kơnê̆ 'mê̆-'mach. Bơngai noh pơm kơnê̆ kơ 'nhŏng oh sư kơdih, bre sư gô ưh kơ đei kon ôh.

²²Lu iĕm athei bơwei pơm kiơ̆ tôm tơdrong juăt Inh păng nơ̆r Inh tơtă păng pơm kiơ̆ tơdrong noh; wă kơ tơring char Inh ăn kơ iĕm oei huay kơ hăk tơlĕch tŭk iĕm.

²³'Nĕ kơ pơm kiơ̆ tơdrong juăt lu kon pơlei mă Inh gô puh tơweh sư đơ̆ng anăp lu iĕm; yua kơ lu sư pơm dôm tơdrong kơnê̆ noh na Inh hil mĭl dêh kơ lu sư tơpă.

²⁴Inh khan kơ lu iĕm, lu iĕm gô iŏk teh đêl lu sư oei, Inh ăn kơ lu iĕm đei teh noh, wă pơm tơmam iĕm kơdih, noh jơ̆ teh đak toh, đak sut kơdrot, Inh boih Kră Yang 'Bok Kei-Dei lu iĕm, plah iŏk lu iĕm đơ̆ng kon pơlei nai.

²⁵Thoi noh lu iĕm athei jô̆ klah phara lu kon sem brem rơgoh păng kon sem brem ưh kơ rơgoh, lu sem păr rơgoh păng sem păr ưh kơ rơgoh, 'nĕ kơ pơm kơ iĕm kơdih jing kơnê̆ na Inh hil areh, yua kơ kon sem brem, sem păr, 'bih kơep lep-ler, tơmam mă Inh đei jô̆ phara lu sư jing kơnê̆.

²⁶Ăn kơ lu iĕm arih hăm Inh 'lơ̆ng rơgoh; yua kơ Inh boih Kră Yang 'lơ̆ng rơgoh, Inh klah lu iĕm bơih đơ̆ng kon pơlei âu, wă kơ lu iĕm jing khŭl kon pơlei gah Inh.

²⁷Bơngai drŏ-nglo dah drŏ-kăn pơm pơjâu dah pơm pơma hăm yang kơnê̆, đe gô pơlôch sư, klơ̆m sư păng tơmo, pham lu sư gô tuh tơ lu sư kơdih.