Read bahnar Lew 21 Bible Online

Lew 21 - bahnar bible

Lew 21

¹Kră Yang khan kơ Môis, khan bĕ kơ lu 'bok soi kon drŏ-nglo Arôn, lu sư 'nĕ kơ hơtŭt 'bơm akâu lăm lu kon pơlei sư lôch, kơnh pơm kơ lu sư kơdih jing kơnê̆ 'mê̆-'mach.

²Lăp pôm kơtum kơtŏng 'nhŏng oh sư jê̆ dêh đĕch, pơtih thoi mĕ sư, 'bă sư, kon drŏ-nglo sư, kon drŏ-kăn sư,

³dah mai oh sư oei adruh hơlai tam mă đei klo; lei huay kơ pơm kơ sư jing kơnê̆ 'mê̆-'mach.

⁴'Bok soi 'nĕ pơm kơdih akâu sư jing kơnê̆ 'mê̆-'mach đơ̆ng lu adrĕch adrung sư oei chă klo kăn nai pơyoch sư kơdih.a

⁵Lu 'bok soi ưh kơ gơh hơkôih sŏk kơ̆l pơm kơ sư jing kơ̆l 'ngôch, 'nĕ kơ hơkôih sŏk kang sư kơdih kư̆m 'nĕ kơ 'bet akâu sư kơdih mơ̆n.

⁶Lu sư athei arih 'lơ̆ng rơgoh kơ Kră Yang 'Bok Kei-Dei, 'nĕ kơ pơm mơgrĭ kơ Anăn Kră Yang 'Bok Kei-Dei lu sư; yua kơ lu sư pơyơ̆r kơ Kră Yang dôm tơmam pơyơ̆r soh hăm ŭnh, wă khan pơyơ̆r 'bĕng tơmam sa kơ Kră Yang, yua kơ noh lu sư jing 'lơ̆ng rơgoh.

⁷'Bok soi ưh kơ gơh ôh oei kơ drŏ-kăn đi, dah drŏ-kăn kơnê̆ bơih; kư̆m ưh kơ gơh oei kơ drŏ-kăn đêl klo sư achăng; yua kơ 'bok soi bơngai 'lơ̆ng rơgoh kơ Kră Yang 'Bok Kei-Dei lu sư.

⁸Thoi noh ih athei lăng jô̆ sư 'lơ̆ng rơgoh, yua kơ sư pơyơ̆r 'bĕng tơmam sa kơ Kră Yang 'Bok Kei-Dei ih. Sư jing rơgoh 'lơ̆ng kơ Inh; yua kơ Inh Kră Yang 'lơ̆ng rơgoh. Tơ'ngla mă pơm kơ lu iĕm jing rơgoh 'lơ̆ng.

⁹Tơdah kon adruh 'bok soi ngôi kư̆ kă, noh jơ̆ pơm kơnê̆ kơ anăn 'bă sư, na đe gô soh sư lăm ŭnh.

¹⁰'Bok soi tơm jing kră tơm hloh lăm lu 'nhŏng oh sư, đêl đei tuh đak rơmă bơih tơ kơ̆l sư, đe pôk sư gơh hrŭk ao rơgoh 'lơ̆ng, na kơ̆l sư ưh kơ lê̆ ôh sŏk ưh kơ păi, b kư̆m ưh kơ hek lê̆ ao sư mơ̆n.

¹¹Sư ưh kơ gơh năm jê̆ bơngai lôch ôh, mă 'bă sư, dah mĕ sư lôch wă pơm kơ sư jing kơnê̆ 'mê̆-'mach.

¹²Sư kư̆m ưh kơ gơh weh đơ̆ng anih 'lơ̆ng rơgoh ôh dah pơm mơgrĭ kơ anih 'lơ̆ng rơgoh Kră Yang 'Bok Kei-Dei sư kơdih jing kơnê̆ 'mê̆-'mach, yua kơ đak 'bâu phu thoi hơgăl đơ̆ng Kră Yang 'Bok Kei-Dei đe tuh oei đei tơ kơ̆l sư, Inh boih Kră Yang.

¹³Sư athei oei kơ drŏ-kăn hơlai oei plơ̆ng.

¹⁴Sư ưh kơ gơh oei kơ drŏ-kăn adro, drŏ-kăn klo sư hrĕch, drŏ-kăn ngôi kư̆ kă pơm đi; mă-lei athei oei kơ drŏ-kăn hơlai oei plơ̆ng đơ̆ng lăm kon pơlei sư kơdih,

¹⁵wă kơ sư ưh kơ gơh pơm kơnê̆ 'mê̆-'mach kơ kon sâu sư lăm kon pơlei pơla sư, yua kơ Inh boih Kră Yang pơm kơ sư jing rơgoh 'lơ̆ng.

¹⁶Kră Yang khan kơ Môis,

¹⁷athei khan bĕ kơ Arôn. Ưh kơ đei bu lăm kon hơ'lơ̆p ih lăm chăl arih sư đei tơdrong jĭ jăn ưh kơ gơh năm jê̆ wă pơyơ̆r tơmam soi kơ Kră Yang 'Bok Kei-Dei ôh.

¹⁸Yua kơ ưh kơ đei bơngai bu mă jĭ jăn gơh năm jê̆ tơ bơsŭn, bơngai măt tol, jopo, muh măt cheng chong dah jơ̆ng sư kơjung kơđeh.

¹⁹Bơngai tơgơ̆ ti dah tơgơ̆ jơ̆ng,

²⁰bơngai kơdŭ grŏn, kơđeh hnang dah jĭ măt, tơ'boch roch, jĭ lak, bŏng sư pơchah minh pôm.

²¹Ưh kơ đei bu lăm kon drŏ-nglo Arôn 'bok soi tơm đei tơdrong jĭ jăn lăm akâu sư ưh kơ gơh năm jê̆ wă pơyơ̆r tơmam soi 'buh ăn kơ Kră Yang; tơdah đei jĭ jăn lăm akâu ưh kơ gơh năm jê̆ wă pơyơ̆r 'bĕng tơmam soi kơ Kră Yang 'Bok Kei-Dei sư.

²²Sư gơh sa tơmam sa Kră Yang 'Bok Kei-Dei sư, mă tơmam 'lơ̆ng rơgoh hloh păng tơmam 'lơ̆ng rơgoh.

²³Mă-lei sư ưh kơ gơh năm jê̆ che pĕng, kư̆m ưh kơ gơh năm jê̆ chơnang soi, yua kơ akâu đei jĭ jăn wă kơ sư huay kơ pơm kơ anih 'lơ̆ng rơgoh Inh jing kơnê̆ 'mê̆-'mach; yua kơ Inh boih Kră Yang, pơm kơ lu sư noh jing rơgoh.

²⁴Môis pơma thoi noh kơ Arôn păng kơ lu kon drŏ-nglo sư păng đĭ-đăng kon pơlei Isơrael.