Read bahnar Lew 25 Bible Online

Lew 25 - bahnar bible

Lew 25

²Khan bĕ kơ kon pơlei Isơrael, tơdah lu iĕm mơ̆t lăm char mă Inh ăn kơ lu iĕm, teh athei pơdơh Sa'bat ăn kơ Kră Yang.

³Lăm tơdrâu sơnăm ih gô rei pơtăm lăm chŭn ih păng kăt hơmet pơgar hơmu ih, đơ̆ng noh phĕ plei sư.

⁴Mă-lei sơnăm mă tơpơh jing sơnăm Sa'bat, ăn kơ teh pơdơh wă khan minh sơnăm ăn kơ Kră Yang, ih ưh kơ rei pơtăm lăm chŭn mir ih, dah kăt hơmet pơgar hơmu ih.

⁵Ih ưh kơ kĕch yuă ôh lu 'ba rah kơdih lăm mir chŭn ih; ih kư̆m ưh kơ gơh phĕ plei hơmu mă plei kơdih đơ̆ng so ih ưh kơ đei kăt bơwei hơmet ming; yua kơ noh jơ̆ minh sơnăm kơ teh pơdơh.

⁶Dôm tơmam sa mă chăt tơ teh lăm sơnăm Sa'bat gô ăn pơm tơmam sa kơ iĕm, ăn kơ đĭch đam drŏ-nglo drŏ-kăn, ăn kơ đĭ-đăng bơngai jang kơ ih păng đĭ-đăng bơngai tơmoi mă oei hăm ih

⁷păng kư̆m ăn kơ sem dơrong ih păng sem bri brah oei lăm tơring char ih. Đĭ-đăng plei sa wă pơm tơmam sa ih.

⁸Ih kư̆m athei jô̆ tơpơh jơhnơr wă khan tơpơh wơ̆t tơpơh sơnăm, noh jing puăn-jĭt tơsĭn sơnăm.

⁹Truh tơnăr mơjĭt khei tơpơh noh wă khan năr huai đơ̆ng tơdrong yoch lu iĕm athei hlôm keng tơgiĕp mă re kơtơ̆ng jơ̆p lăm tơring char lu iĕm.

¹⁰Lu iĕm athei iŏk sơnăm mă pơđăm-jĭt, pơm sơnăm 'lơ̆ng rơgoh păng ră roi tơdrong rơngei kơ đĭ-đăng kon pơlei pơla oei lăm char noh jĭ sơnăm hiôk-hian kơ lu iĕm, bu bu kư̆m wơ̆t iŏk teh jang sa sư kơdih đĭ-đăng gô rơngei wih brŏk tơ hnam dơnŏ sư kơdih.

¹¹Sơnăm mă pơđăm-jĭt âu jơ̆ sơnăm hiôk-hian kơ lu iĕm; lu iĕm ưh pă rei pơtăm, kĕch yuă tơmam rah chăt kơdih sư păng kư̆m ưh pă phĕ lu plei hơmu mă đêl ưh pă kăt hơmet.

¹²Yua kơ sơnăm hiôk-hian; gô jing 'lơ̆ng rơgoh ăn kơ lu iĕm; lu iĕm gô sa tơmam kiơ chăt kơdih đơ̆ng chŭn mir lu iĕm.

¹³Lăm sơnăm hiôk-hian âu, đĭ-đăng rim 'nu gô wih tơ mŭk tơmam chŭn mir sư kơdih.

¹⁴Tơdah lu iĕm tĕch dah răt kiơ đơ̆ng rông 'bôt iĕm, iĕm 'nĕ kơ pơgâm sa dih băl.

¹⁵Ih kư̆ jô̆ dôm sơnăm đơ̆ng rŏng kơ sơnăm hiôk-hian na răt đơ̆ng rông 'bôt ih, sư gô tĕch kơ ih kiơ̆ kơ dôm sơnăm sư oei đei kĕch yuă.

¹⁶Kiơ̆ kơ dôm yơ sơnăm, tơdah sơnăm oei lơ ih gô hơtŏk 'long sư păng tơdah oei pă tŏ sĕt sơnăm ih gô tơjur 'long sư, yua kơ kiơ̆ kơ bơyan kĕch yuă sư gô tĕch tơ ih.

¹⁷Lăm lu iĕm 'nĕ kơ pơgâm sa rông 'bôt iĕm kơdih. Sơmă athei băt hli yom kơ Kră Yang 'Bok Kei-Dei yua kơ Inh boih Kră Yang 'Bok Kei-Dei lu iĕm.

¹⁸Thoi noh lu iĕm athei pơm kiơ̆ kơ nơ̆r inh athei, bơwei tơdrong juăt păng rok kiơ̆, thoi noh na lu iĕm gô arih hiôk hơđơ̆ng lăm tơring char iĕm.

¹⁹Teh gô chăt lơ plei 'long sa, lu iĕm gô sa phĭ jơnap păng arih hiôk hơđơ̆ng lăm char iĕm.

²⁰Tơdah lu iĕm khan: Mưh nhôn ưh kơ đei rei pơtăm ưh kơ kĕch yuă, lei lăm sơnăm mă tơpơh lu nhôn gô sa kiơ.

²¹Sơnăm mă tơdrâu Inh gô tuh ăn pŭn hiôk kơ lu iĕm, na sơnăm noh iĕm gô đei phe 'ba plei 'long sa lơ, 'mong kơ pêng sơnăm.

²²Mưh rei pơtăm lăm sơnăm mă tơhngam, lu iĕm gô sa plei bơyan so păng gô sa dĭng truh tơ bơyan kĕch yuă sơnăm mă tơsĭn.

²³Teh ưh kơ gơh tĕch hloi ôh, yua kơ noh teh Inh, iĕm thoi bơngai tơmoi mă oei hơdai Inh đĕch.

²⁴Tơdrong gơh pơdrâu iŏk teh đêl tĕch, athei pơyom jơ̆p kơ lăm teh đak iĕm oei.

²⁵Tơdah 'nhŏng oh lu iĕm hoh kơ'bah, wă tĕch hai 'biơ̆ teh jang sa sư, na bơngai mă 'nhŏng oh tơ jê̆ bơngai noh athei răt huai iŏk teh noh.

²⁶Mă-lei, tơdah ưh kơ đei bu tơgŭm huai iŏk, na đơ̆ng rŏng bơngai noh sư jang sa jing mơdrŏng dơ̆ng đei tôm tơmam wă huai pơdrâu iŏk teh sư kơdih,

²⁷bơngai noh athei jô̆ đơ̆ng sơnăm sư tĕch, păng pơdrâu ăn kơ bơngai mă răt teh sư tơdrong gĭt jên kiơ̆ kơ dôm sơnăm mă oei oei noh, na pơdrâu teh noh jing teh sư kơdih.

²⁸mă-lei tơdah bơngai noh ưh kơ kĕ đei jên wă pơdrâu kơ bơngai mă răt, bơngai răt noh gô bơwei teh dĭng truh tơ sơnăm hiôk-hian, noh sơnăm mă tơmam, teh gô pơdrâu kơ tơ'ngla sư, na bơngai noh gô iŏk tơwih teh sư kơdih.

²⁹Tơdah bơngai bu tĕch hnam lăm minh pôm pơlei đei dur war tăp dăr, bơngai tĕch noh gơh pơdrâu huai iŏk dang kiơ̆ lăm minh sơnăm, jô̆ iŏk đơ̆ng năr sư tĕch. Lăm sơnăm noh, bơngai tĕch gơh pơdrâu huai iŏk hnam sư kơdih.

³⁰Tơdah hlôi kơ minh sơnăm bơih na bơngai tĕch ưh kơ huai pơdrâu iŏk, lei hnam mă lăm tŏk-bŏk pơlei đei dur war tăp dăr noh gô oei hơnơ̆ng gah ti bơngai răt.

³¹Mă-lei lu hnam tơ pơlei iĕ 'nguaih ưh kơ đei dur war jô̆ hloi hăm chŭn mir; tơ'ngla sư gơh pơdrâu iŏk, truh tơ sơnăm hiôk-hian, đe gô pơdrâu tơwih kơ tơ'ngla sư.

³²Mă-lei gah pơlei lu bơngai Lêwi, hnam lu sư lăm pơlei noh, lu bơngai Lêwi ling-lang sư gơh huai iŏk mơ̆ng kơ lu sư wă.

³³Bu răt đơ̆ng bơngai Lêwi minh pôm hnam lăm pơlei bơngai Lêwi, truh tơ sơnăm hiôk-hian hnam noh gô pơdrâu tơwih kơ tơ'ngla sư, yua kơ lu hnam lăm pơlei bơngai Lêwi jing mŭk tơmam teh choh lu sư lăm lu bơngai Isơrael.

³⁴Mă-lei lu tơmăn 'nhĕt rong sem dơrong tăp dăr pơlei tih lu sư, bơngai Lêwi ưh kơ gơh kơ tĕch ôh, yua kơ noh jing teh lu sư jang sa ling-lang.

³⁵Tơdah 'nhŏng oh oei hơdai ih jing dơnuh hin mŭk tơmam 'me sa kơdih akâu ưh kơmah, ih athei tơgŭm 'me rong sư, mă khan sư bơngai tơmoi oei tơ âu, wă kơ sư gơh oei hơdai ih.

³⁶'Nĕ kơ sa lơi kư̆m 'nĕ kơ iŏk yua đơ̆ng sưa sơmă athei hli yom kơ Kră Yang 'Bok Kei-Dei ih, na 'nhŏng oh ih gô oei hơdai ih.

³⁷'Nĕ ăn kơ sư mưng jên ih na iŏk jên kon păng 'nĕ ăn kơ sư mưng phe 'ba na 'mong đei kon.

³⁸Inh boih Kră Yang 'Bok Kei-Dei lu iĕm Tơ'ngla mă chông anhăk iĕm lĕch đơ̆ng dêh Êyiptơ wă năm ba iĕm tơ dêh Kanaan păng pơm Kră Yang 'Bok Kei-Dei lu iĕm.

³⁹Tơdah 'nhŏng oh jing dơnuh hin păng tĕch akâu sư kơ ih, ih 'nĕ kơ pơgŏ sư jang thoi đĭch hŏ.

⁴⁰Sư gô oei hơdai ih thoi minh 'nu bơngai jang kơ ih păng thoi bơngai tơmoi sa tơ ih, sư gô tơgŭm tơdrong jang ih truh tơ sơnăm hiôk-hian.

⁴¹Kơplah noh sư gô tơklah đơ̆ng hnam ih, sư păng hơ'lơ̆p sư wih tơ hnam sư. Gô iŏk chŭn mir yă 'bok sư kơdih.

⁴²Yua kơ lu sư jing đam Inh, mă Inh hlôi chông anhăk lĕch đơ̆ng dêh Êyiptơ; đe ưh kơ gơh tĕch lu sư thoi đe tĕch đĭch ôh.

⁴³Pơgơ̆r sư 'nĕ kơ pơjuă pơđep dêh, sơmă athei hli yom kơ Kră Yang 'Bok Kei-Dei ih.

⁴⁴Na lu đĭch drŏ-nglo đĭch drŏ-kăn mă ih đei, lu iĕm gơh răt đơ̆ng adrĕch bơngai tăp dăr kơ iĕm.

⁴⁵Lu iĕm kư̆m gơh răt đĭch đam đơ̆ng lu kon drŏ-nglo bơngai tơmoi oei lăm char iĕm. Adrĕch adrung lu sư oei hơdai hăm lu iĕm, đe tơpŭ boih kơ lu sư lăm char iĕm, thoi noh lu sư jing tơmam lu iĕm.

⁴⁶Lu iĕm wei sư pơm tơmam thoi kon drŏ-nglo iĕm. Wei sư thoi bơngai đĭch đam ling-lang, mă-lei tơduă 'nhŏng oh iĕm bơngai Isơrael ưh kơ gơh pơjuă pơđep băl.

⁴⁷Tơdah bơngai đơ̆ng teh đak 'nguaih, dah bơngai tơmoi oei lăm teh đak ih jing mơdrŏng na 'nhŏng oh ih oei hơdai sư jing dơnuh, na năm tĕch akâu sư kơdih kơ bơngai tơmoi đơ̆ng teh đak nai oei hăm ih, dah tĕch ăn kơ minh 'nu bơngai bu lăm hnam bơngai tơmoi noh.

⁴⁸Đơ̆ng rŏng kơ hlôi tĕch akâu sư kơdih bơih. Iĕm kư̆m gơh huai pơdrâu iŏk; dah minh 'nu lăm 'nhŏng oh lu sư kư̆m gơh huai pơdrâu iŏk sư.

⁴⁹Mih ma sư, dah kon mih ma sư kơlĕ, dah minh 'nu adrĕch sư kư̆m gơh huai pơdrâu iŏk sư, tơdah sư kơdih kĕ đei mơdrŏng, sư kư̆m gơh huai pơdrâu sư kơdih.

⁵⁰Sư gô tinh jô̆ hăm tơ'ngla răt sư đơ̆ng sơnăm ayơ mă sư tĕch akâu sư kơdih, dĭng truh tơ sơnăm hiôk-hian; păng 'long sư wă huai tinh jô̆ kiơ̆ kơ sơnăm lơ dah tŏ sĕt wă khan tinh jô̆ thoi đe juăt kơ jang apah.

⁵¹Tơdah oei lơ sơnăm bơngai noh athei ăn jên wă jê̆ dôm đe răt sư. Tơmam wă huai sư.

⁵²Tơdah truh sơnăm hiôk-hian oei pă tŏ sĕt athei tinh jô̆ hăm tơ'ngla răt sư, kiơ̆ kơ sơnăm noh na 'mong jên, wă huai iŏk sư.

⁵³Sư hăm tơ'ngla sư, lăng thoi minh 'nu bơngai jang apah kiơ̆ kơ sơnăm, tơ'ngla sư ưh kơ gơh pơjuă pơđep sư ôh 'bơ̆t anăp ih.

⁵⁴Tơdah sư ưh kơ kĕ huai sư kơdih thoi noh, na gô truh sơnăm hiôk-hian, sư păng lu kon sư kư̆m gô rơngei.

⁵⁵Yua kơ lu kon pơlei Isơrael đam Inh. Wă khan lu đam Inh mă đei chông anhăk lĕch đơ̆ng dêh Êyiptơ, Inh boih Kră Yang 'Bok Kei-Dei lu iĕm.