Read bahnar Lew 26 Bible Online

Lew 26 - bahnar bible

Lew 26

¹Lu iĕm 'nĕ kơ man rup yang, dah traih pơm păng 'long dah pơm hăm tơmo, 'nĕ kơ pơdơ̆ng minh pôm tơmo ayơ lăm tơring iĕm đei rup na drap kơkuh 'bơ̆t anăp rup noh, yua kơ Inh boih Kră Yang 'Bok Kei-Dei lu iĕm.

²Wei răk bĕ năr pơdơh Sa'bat Inh păng pơyom kơ anih 'lơ̆ng rơgoh Inh, Inh boih Kră Yang.

³Tơdah iĕm yak rok kiơ̆ khôi juăt Inh, wei răk păng pơm kiơ̆ nơ̆r Inh tơtă,

⁴thoi noh Inh gô tơjur ăn đak 'mi trŏ kơ bơyan sư lăm teh gô đei lơ 'long plei sa tơ mir gô đei 'nhot sa.

⁵Bơyan kĕch 'ba oei đei truh tơ bơyan phĕ plei hơmu, oei đei truh tơ bơyan rei, lu iĕm gô sŏng sa phĭ mah, arih hiôk hơđơ̆ng lăm char iĕm.

⁶Inh gô ăn tơdrong rơnŭk rơnua lăm char iĕm, lu iĕm gô tep pơdơh pă đei hli kơ bu, Inh gô puh đĭ lu sem bri nuih kơtang đơ̆ng char iĕm, đao hơlă pă đei truh bơih tơ char iĕm.

⁷Lu iĕm gô druh lu bơngai ayăt kơ lu iĕm, na lu sư gô pơ̆k lôch kơ đao hơlă 'bơ̆t anăp lu iĕm.

⁸Pơđăm 'nu lăm lu iĕm gô druh minh-hrĕng 'nu, minh-hrĕng lăm lu iĕm gô druh mơjĭt-rơbâu 'nu, đơ̆ng noh lu ayăt kơ iĕm gô pơ̆k lôch kơ đao hơlă 'bơ̆t anăp iĕm.

⁹Inh gô 'mêm bơwei lu iĕm ăn kơ iĕm chek lar rai lơ păng pơjing tơdrong pơgơ̆p hăm lu iĕm kơjăp.

¹⁰Lu iĕm oei sa tơmam lu iĕm 'măn lê̆ sơ̆. Đơ̆ng noh tuh hŭt lê̆ tơmam so noh wă 'măn mong tơmam 'nao.

¹¹Inh gô pơm anih oei Inha tŏk-bŏk lu iĕm, Inh ưh kơ đei weh đơ̆ng lu iĕm ôh.

¹²Inh gô oei tŏk-bŏk lu iĕm Inh gô jing Kră Yang 'Bok Kei-Dei lu iĕm păng lu iĕm gô jing kon pơlei pơla Inh.

¹³Inh jing Kră Yang, 'Bok Kei-Dei lu iĕm, Tơ'ngla mă chông anhăk iĕm lĕch jăk đơ̆ng char Êyiptơ, wă kơ iĕm klaih đơ̆ng pơm đĭch đam đe; Inh hlôi gơ̆ lê̆ 'long ăt đơ̆ng lu iĕm păng ăn kơ lu iĕm yak ngơk tơpăt.

¹⁴Mă-lei tơdah lu iĕm mă ưh kơ mơ̆ng Inh păng ưh kơ pơm kiơ̆ nơ̆r Inh tơtă âu,

¹⁵tơdah lu iĕm sơngah kơ nơ̆r Inh tơtă păng jơhngơ̆m iĕm areh kơ khôi juăt Inh, dĭng mah ưh pă pơm kiơ̆ nơ̆r Inh tơtă, pơm glăi kơ tơdrong Inh pơgơ̆p.

¹⁶Mưh lei tơdrong âu Inh gô pơm kơ lu iĕm: Inh gô ăn kơ lu iĕm đei tơdrong hli truh tih, tơdrong jĭ jăn, bơlŏ chĕp tơngiĕt pơm kơ măt iĕm bơbôl, jơhngơ̆m rơmơ̆n rơmok. Lu iĕm rei pơtăm ră mă-lei hŭt đĕch jing tơdrong kơ đei, bơngai ayăt kơ iĕm gô iŏk sa yua đĭ.

¹⁷Inh gô wih rŏng hil mĭl kơ iĕm, lu bơngai ayăt kơ iĕm gô teh dong iĕm, lu bơngai areh kơ iĕm gô pơgơ̆r iĕm, lu iĕm gô kơdâu ôn mă khan ưh kơ đei bu druh.

¹⁸Thoi ei ră mă-lei iĕm oei ưh kơ mơ̆ng Inh, yua kơ tơdrong iĕm pơm yoch glăi noh Inh gô phak tơmal iĕm tơpơh wơ̆t.

¹⁹Inh gô pơglơh lê̆ tơdrong pơang jơhngơ̆m pran lu iĕm, Inh gô pơm kơ plĕnh kơpal lu iĕm arăng dang mam teh đak ala lu iĕm thoi kong.

²⁰Jơhngơ̆m pran lu iĕm gô hiong tơdrong kơ đei, teh đak ưh pă đei chăt lu hla 'nhot, tơm 'long lăm char lu iĕm kư̆m ưh pă đei plei sa.

²¹Tơdah iĕm blơ̆ Inh păng ưh kơ wă mơ̆ng Inh, Inh gô ăn tơdrong gleh truh kơ iĕm tơpơh wơ̆t hloh kiơ̆ kơ tơdrong yoch iĕm pơm.

²²Inh gô ăn sem bri rôp lu kon hơ'lơ̆p iĕm păng kăp sa lu sem dơrong iĕm, pơm kơ kon bơngai iĕm jing kơtuei, tơ trong glung pă đei bu yak năm rơhiăng kơkot.

²³Mă tôm tơdrong Inh bơtho pơjĭ thoi noh ră, mă-lei iĕm oei ưh kơ chu, oei 'maih blơ̆ Inh.

²⁴Inh kư̆m gô pơm tơwih kơ lu iĕm, Inh gô teh tôn lu iĕm tơpơh wơ̆t hloh kơ adrol, yua kơ tơdrong yoch lu iĕm.

²⁵Inh gô ăn đao hơlă pơm kơ lu iĕm. Wă pơm 'mong đêl iĕm pơm glăi tơdrong pơgơ̆p Inh; tơdah lu iĕm akŭm băl lăm pơlei tih lu iĕm, Inh gô ăn tơdrong jĭ hơbuh 'bơm tơ lu iĕm păng jao iĕm lăm ti lu bơngai ayăt kơ iĕm.

²⁶Tơdah inh ăn tơdrong pơngot rơwĕt truh, mơjĭt 'nu adruh gô 'buh 'bĕng lu iĕm lăm minh tơnuh ŭnh păng kŏng 'bĕng noh na wih ăn kơ lu iĕm, lu iĕm sa ră mă-lei ưh kơ phĭ.

²⁷Mă đei tơdrong truh thoi ei ră, mă-lei iĕm oei ưh kơ mơ̆ng Inh 'mơ̆i, oei yak trong pha kơ trong Inh wă,

²⁸na Inh gô hil mĭl kơ iĕm tơpă hăm tơdrong kơtang păng yua kơ tơdrong yoch lu iĕm pơm, na Inh gô bơtho pơjĭ iĕm, hloh kơ tơdrong yoch iĕm tơpơh wơ̆t.

²⁹Lu iĕm gô sa 'nhĕm lu kon drŏ-nglo lu iĕm păng kon drŏ-kăn lu iĕm.

³⁰Inh gô pơrăm đĭ lu chơnang soh tơmam 'bâu phu tơ anih kơjung iĕm, teh pơchah lê̆ rup măt 'năr iĕm păng dan akâu lôch iĕm kơpal lu rup yang iĕm man păng Inh gô hil areh krưp kơ iĕm.

³¹Inh gô pơrăm pơlei tih lu iĕm, ăn anih rơgoh iĕm juơ rơhiăng păng Inh ưh pă hiup rơmă đơ̆ng lu tơmam iĕm pơyơ̆r dơ̆ng.

³²Inh gô pơrăm char iĕm, dĭng lu ayăt oei lăm noh lăng 'bôh 'băi hlĭch kơ tơdrong noh.

³³Inh pơrŭng lu iĕm tơklah tơklang jơ̆p kơ adrĕch adrung bơngai păng Inh gô iŏk đao gưm 'bet lu iĕm; na char lu iĕm gô juơ rơhiăng, pơlei tih lu iĕm hrơ-hrĕng kơkot.

³⁴Kơplah teh đak lê̆ juơ rơhiăng păng lu iĕm oei lăm dêh char bơngai ayăt kơ iĕm kơplah noh teh gô đei pơdơh năr Sa'bat sư.

³⁵Teh đak lê̆ juơ rơhiăng, kơplah noh sư đei tơdrong pơdơh, na yua kơ lu iĕm oei lăm teh noh jing ưh kơ đei tơdrong pơdơh lăm sơnăm Sa'bat.

³⁶Lu bơngai mă oei arih inh gô ăn kơ lu sư rơdu lêl kơplah lu sư oei lăm teh đak bơngai ayăt kơ lu sư. Minh hlak hla kial dơhlu kư̆m pơm kơ sư kơdâu ôn, lu sư kơdâu thoi đe kơdâu kơ đao hơlă păng gô pơ̆k mă ưh kơ đei bu druh sư.

³⁷Bơngai âu pơ̆k kơpal bơngai to, thoi kơdâu kơ đao hơlă, pơ̆k mă ưh kơ đei bu druh 'moi lu sư păng lu iĕm ưh kơ kĕ ôh wă dơ̆ng 'bơ̆t anăp lu bơngai ayăt kơ lu iĕm.

³⁸Lu iĕm gô lôch hiong đĭ tŏk-bŏk lu kon pơlei pơla nai, dêh char lu bơngai ayăt kơ iĕm gô luăn sa iĕm.

³⁹Lu iĕm mă oei arih gô lôch ơh ol lăm char lu bơngai ayăt kơ iĕm. Yua kơ tơdrong yoch lu iĕm, kư̆m thoi tơdrong yoch lu yă 'bok iĕm sơ̆, iĕm gô lôch ơh ol thoi sư mơ̆n.

⁴⁰Kơplah noh sư gô roi tơdrong yoch sư kơdih păng roi tơdrong yoch lu yă 'bok sư, dôm tơdrong sư đei pơm glăi păng tơdrong sư pơm tơwih plơ̆ kơ Inh.

⁴¹Thoi noh Inh kư̆m pơm plơ̆ kơ lu sư, ba lu sư tơ dêh char lu bơngai ayăt kơ lu sư, tơdah jơhngơ̆m lu sư ưh kơ chu kăt tơdra akar, băt chu tơjur akâu lu sư kơdih tơ ala păng chu iŏk tơdrong bơtho pơjĭ yua tơdrong yoch lu sư.

⁴²Lei Inh gô 'blŏk kơ tơdrong Inh pơgơ̆p hăm Jakôp, 'blŏk kơ tơdrong pơgơ̆p hăm Isăk đơ̆ng noh 'blŏk kơ tơdrong Inh pơgơ̆p hăm Abraham păng Inh gô 'blŏk hơdơ̆r kơ dêh char.

⁴³Yua kơ char lu sư hlôi achăng lê̆ bri juơ, gô đei dôm sơnăm Sa'bat, kiơ̆ kơ lu sư đei achăng lê̆ dôm yơ noh; lu sư gô chu iŏk tơdrong bơtho pơjĭ yua kơ tơdrong yoch lu sư kơdih, yua kơ lu sư sơngah ưh kơ kiơ̆ nơ̆r Inh tơtă păng areh kơ tơdrong juăt Inh.

⁴⁴Mă khan thoi ei kơplah lu sư oei lăm char lu bơngai ayăt kơ lu sư, Inh kư̆m ưh kơ đei hŭt lê̆ lu sư ôh, kư̆m ưh kơ areh kơ lu sư mơ̆n dĭng mah Inh pơrăm đĭ lu sư. Păng Inh ưh kơ hŭt lê̆ tơdrong pơgơ̆p hăm lu sư; yua kơ Inh Kră Yang 'Bok Kei-Dei lu sư.

⁴⁵Mă-lei yua kơ đơ̆ng lu sư na Inh 'blŏk kơ tơdrong Inh pơgơ̆p hăm yă 'bok lu sư, lu bơngai mă Inh đei chông anhăk lu sư lĕch đơ̆ng char Êyiptơ, 'bơ̆t anăp măt adrĕch adrung kon bơngai, wă pơm Kră Yang 'Bok Kei-Dei lu sư, Inh boih Kră Yang.

⁴⁶Noh boih chih tơdrong tơtă păng tơdrong khôi juăt Kră Yang đơ̆ng Môis tơ kông Sinai. Wă pơgơ̆p Kră Yang hăm kon pơlei Isơrael.