Read bahnar Lew 3 Bible Online

Lew 3 - bahnar bible

Lew 3

¹Tơdah bu wă pơyơ̆r tơmam 'blŏk bơnê kơ Kră Yang hăm rơmo tơno dah akăn, athei rơih rơmo 'lơ̆ng huay kơ đei jĭ kiơ.

²Sư gô dan ti sư tơ kơpal kơ̆l kon rơmo mă sư pơyơ̆r noh na 'bet pơlôch hloi, 'bơ̆t 'măng tơm mơ̆t tơ Bơsŭn Anih Akŭm. Lu 'bok soi kon drŏ-nglo Arôn gô tơtraih pham noh tăp dăr kơ chơnang soi.

³Đơ̆ng tơmam pơyơ̆r 'blŏk bơnê 'nâu sư gô pơyơ̆r pơm tơmam soi yua hăm ŭnh na pơyơ̆r kơ Kră Yang lu rơmă, mă dôm klak păng lu rơmă dơwir klep tơ klak sư,

⁴'bar tŏ boh-lăn rơmă lom 'bar tŏ boh-lăn cheng rơhiĕo sư păng mơ'nhao hơtăng lom klơm, pleh lê̆ đơ̆ng 'bar tŏ boh-lăn.

⁵Lu kon drŏ-nglo Arôn gô 'buh pơyơ̆r dôm tơmam noh tơ kơpal chơnang soi tơ kơpal tơmam soi 'buh mă đei dan kơpal 'long ŭnh, ŭnh oei sa, noh jơ̆ tơmam soi ăn ŭnh sa 'bâu phu ăn kơ Kră Yang.

⁶Tơdah tơmam sư pơyơ̆r wă 'blŏk bơnê kơ Kră Yang hăm triu tơno dah akăn athei rơih triu 'lơ̆ng huay kơ đei jĭ kiơ ôh.

⁷Tơdah sư pơyơ̆r hăm kon triu pơm tơmam soi, sư athei pơyơ̆r 'bơ̆t anăp Kră Yang.

⁸Dan ti sư tơ kơpal kơ̆l kon triu đơ̆ng noh 'bet pơlôch hloi 'bơ̆t anăp 'măng Bơsŭn Anih Akŭm. Lu kon drŏ-nglo Arôn gô tơtraih pham jum dăr kơ chơnang soi.

⁹Đơ̆ng tơmam soi pơyơ̆r 'blŏk bơnê noh, sư athei soi 'buh pơyơ̆r kơ Kră Yang: Rơmă, kiĕng chơ̆ng iŏk 'bơ̆t kơting chơđui, đĭ-đăng lu rơmă lom klak.

¹⁰'Bar tŏ boh-lăn hăm rơmă lom sư 'bơ̆t kơiĕng păng mơ'nhao lom klơm (bơngai noh athei lŏng rơmă gom hơdai hăm boh-lăn).

¹¹Lu 'bok soi gô soh pơyơ̆r đĭ tơmam âu tơ chơnang soi, noh tơmam sa pơyơ̆r soh hăm ŭnh ăn kơ Kră Yang.

¹²Tơdah tơmam sư pơyơ̆r păng bơbe sư athei pơyơ̆r 'bơ̆t anăp Kră Yang.

¹³Dan ti sư tơ kơpal kơ̆l kon bơbe noh. Na sư pơlôch hloi 'bơ̆t anăp Bơsŭn Anih Akŭm. Lu kon drŏ-nglo Arôn gô tơtraih pham jum dăr kơ chơnang soi.

¹⁴Sư gô pơyơ̆r pơm tơmam soi 'buh ŭnh sa ăn kơ Kră Yang, lu rơmă lom klak hăm đĭ-đăng rơmă klep tơ klak sư.

¹⁵'Bar tŏ boh-lăn, hăm rơmă lom tơ boh-lăn 'bơ̆t kơiĕng păng mơ'nhao hơtăng lom klơm lu sư gô iŏk ba hơdai hăm 'bar tŏ boh-lăn.

¹⁶'Bok soi gô soh pơyơ̆r dôm tơmam noh tơ kơpal chơnang soi pơm tơmam sa pơyơ̆r soh hăm ŭnh, đei 'bâu phu đĭ-đăng rơmă noh jing tơmam 'Bok Kei-Dei ngăl.

¹⁷'Nâu bơih jing tơdrong juăt ăn kơ lu adrĕch adrung iĕm ling-lang lăm đĭ-đăng jơhnơr lu iĕm oei arih tơ lăm đĭ-đăng anih tơ yơ lu iĕm oei, lu iĕm ưh kơ gơh sa rơmă dah pham.