Read bahnar Lew 7 Bible Online

Lew 7 - bahnar bible

Lew 7

¹'Nâu tơdrong juăt gah tơmam soi huai đơ̆ng yoch jơ̆ tơmam 'lơ̆ng rơgoh hloh.

²Lăm anih đe pơlôch kon sem pơm tơmam soi 'buh na athei pơlôch kon sem pơm tơmam soi huai đơ̆ng yoch, đơ̆ng noh tơtraih pham sư jum dăr tơ chơnang soi.

³Păng đe pơyơ̆r đĭ tơmam kiĕng păng rơmă dôm klak mot sư,

⁴'bar tŏ boh-lăn hăm rơmă sư klep tơ rơhiĕo păng mơ'nhao hơtăng lom klơm, na pleh hơdai hăm 'bar tŏ boh-lăn.

⁵'Bok soi gô 'buh pơyơ̆r đĭ tơ chơnang soi, noh pơm tơmam soi 'buh ŭnh sa pơyơ̆r kơ Kră Yang jơ̆ tơmam soi huai đơ̆ng yoch.

⁶Lu drŏ-nglo lăm adrĕch 'bok soi gơh sa 'nhĕm noh, tơ minh anih rơgoh. Na noh jing tơmam 'lơ̆ng rơgoh hloh.

⁷Tơmam soi huai iŏk đơ̆ng pơm glăi kơ tơdrong juăt kư̆m thoi tơmam soi huai iŏk đơ̆ng pơm yoch, đei tơdrong juăt kơ lu sư 'bok soi gô soi sơmah wă sut tơdrong yoch păng 'bok soi yua sư.

⁸'Bok soi pơyơ̆r tơmam soi kơ bu sư gô đei akar đơ̆ng kon sem mă sư pơyơ̆r pơm tơmam soi 'buh noh

⁹Dôm tơmam pơyơ̆r tơpŭng mă pơtŏ bơih tơ bơmur ŭnh dah đĭ-đăng tơmam hơtŭk lăm gŏ dah đei hơdrĕng tơ gŏ gang dah phang tơ adring. Gô ăn kơ 'bok soi mă pơyơ̆r noh.

¹⁰Mă dôm lu tơmam pơyơ̆r tơpŭng phe 'ba đei jrâu đak rơmă dah lê̆ hrĕng kro gô 'măn lê̆ klah asong lei-lăi ăn kơ lu kon drŏ-nglo Arôn.

¹¹'Nâu boih tơdrong juăt gah tơmam soi 'blŏk bơnê gô pơyơ̆r kơ Kră Yang.

¹²Tơdah bu pơyơ̆r tơmam noh wă bơnê, sư athei pơyơ̆r tơmam soi lu 'bĕng ưh kơ đei hrâu hăm 'buih, dah jrâu hăm đak ôliwơ ôh. 'Bĕng klang ưh kơ hrâu hăm 'buih, jrâu hăm đak rơmă ôliwơ păng 'bĕng tơpŭng wă pơm 'bĕng hrâu hăm đak rơmă ôliwơ.

¹³'Bĕng tơpŭng hrâu hăm 'buih, na pơyơ̆r hơdai hăm tơmam soi 'blŏk bơnê.

¹⁴Sư gô iŏk minh pôm 'bĕng dơ̆ng lăm rim tơmam pơyơ̆r hăm phe 'ba pơyơ̆r kơ Kră Yang tơmam soi noh gô 'măn kơ 'bok soi, mă đêl tơtraih pham kon sem tơmam soi 'blŏk bơnê.

¹⁵'Nhĕm sĕch tơmam soi 'blŏk bơnê băt bơnê athei sa pơđĭ hloi lăm năr mă pơyơ̆r noh, ưh kơ gơh 'măn lê̆ oei đei truh pơgê ôh.

¹⁶Tơdah tơmam pơyơ̆r âu yua kơ tơdrong pơkă dah tơmam pơyơ̆r 'maih wă, đe gô sa tơmam soi noh lăm năr mă pơyơ̆r tơdah oei rơkah gơh sa năr dơning dơ̆ng.

¹⁷Mă-lei 'nhĕm sĕch oei rơkah truh năr mă pêng, đe gô soh lê̆ hăm ŭnh.

¹⁸Tơdah bu sa 'nhĕm soi noh lăm năr mă pêng, Kră Yang ưh kơ lăp ôh kơ bơngai pơyơ̆r păng Kră Yang kư̆m lăng ưh kơ yua kiơ kơ sư mơ̆n; noh jing tơmam soi Kră Yang areh, na bu sa tơmam noh gô pŭ iŏk tơdrong kư̆ kă sư.

¹⁹Ưh kơ gơh sa ôh 'nhĕm ayơ mă đei hơtŭt 'bơm tơmam 'mê̆-'mach, 'nhĕm noh athei 'buh hŭt lê̆ tơ ŭnh. 'Nhĕm ayơ mă gơh sa lu bơngai rơgoh đĕch gơh sa 'nhĕm noh.

²⁰Bu mă đei tơdrong kơnê̆ 'mê̆-'mach na sa tơmam soi 'blŏk bơnê pơyơ̆r kơ Kră Yang, bơngai noh đe gô puh tơlĕch sư đơ̆ng kon pơlei pơla.

²¹Tơdah bơngai bu hơtŭt 'bơm tơmam kơnê̆ 'mê̆-'mach dah đơ̆ng kon bơngai 'mê̆-'mach, đơ̆ng kon sem brem ưh kơ rơgoh dah đơ̆ng tơdrong kiơ mă Kră Yang areh na sa 'nhĕm tơmam soi 'blŏk bơnê pơyơ̆r kơ Kră Yang, bơngai noh đe gô puh tơlĕch sư đơ̆ng kon pơlei pơla.

²²Kră Yang khan kơ Môis.

²³Khan bĕ kơ kon pơlei Isơrael: Iĕm ưh kơ gơh sa ôh dôm rơmă rơmo, triu dah bơbe.

²⁴Rơmă lu kon sem brem lôch kơmăp dah lôch đơ̆ng kon sem bri kăp hek gơh yua lăm tơdrong nai, mă-lei iĕm ưh kơ gơh sa ôh;

²⁵bơngai bu sa rơmă lu kon sem brem yua 'buh hăm ŭnh sa pơyơ̆r kơ Kră Yang, đe gô puh tơlĕch sư đơ̆ng lăm kon pơlei sư kơdih.

²⁶Tơ anih ayơ mă lu iĕm oei, lu iĕm 'nĕ kơ sa pham lu sem păr dah lu sem bri.

²⁷Bu mă sa lu pham noh đe gô puh tơlĕch sư đơ̆ng lăm kon pơlei sư kơdih.

²⁸Kră Yang khan kơ Môis thoi âu:

²⁹Roi tơbăt bĕ kơ kon pơlei Isơrael bơngai bu mă pơyơ̆r tơmam soi 'blŏk bơnê ăn kơ Kră Yang athei anhăk ba kơ Kră Yang tơmam soi mă đơ̆ng lăm tơmam soi 'blŏk bơnê sư.

³⁰Sư athei chĕp ba hăm ti sư kơdih tơmam soi yua 'buh hăm ŭnh ăn kơ Kră Yang; sư athei chĕp ba rơmă hăm sĕch kơtơh, sĕch kơtơh wă yua lăm tơmam pơyơ̆r chro to, âu 'bơ̆t anăp Kră Yang;

³¹'bok soi gô soh rơmă tơ kơpal chơnang soi, na sĕch kơtơh gô 'măn kơ Arôn păng lu kon drŏ-nglo sư.

³²Iĕm gô ăn kơ 'bok soi blu gah 'ma wă pơm tơmam pơyơ̆r gah tơmam soi 'blŏk bơnê.

³³Bu lăm lu kon drŏ-nglo Arôn pơyơ̆r pham păng rơmă kon sem tơmam soi pơyơ̆r 'blŏk bơnê, bơngai noh gô đei iŏk blu gah 'ma.

³⁴Yua kơ lăm lu tơmam pơyơ̆r 'blŏk bơnê chro to âu bơngai Isơrael Inh iŏk blu kon sem tơmam soi noh ăn kơ 'bok soi Arôn păng lu kon drŏ-nglo sư, kiơ̆ kơ tơdrong juăt oei ling-lang mă lu kon sâu bơngai Isơrael athei pơm kiơ̆.

³⁵Noh tơmam soi 'măn đơ̆ng lăm lu tơmam soi yua 'buh hăm ŭnh pơyơ̆r kơ Kră Yang jao ăn kơ Arôn păng lu kon drŏ-nglo sư lăm năr mă đe tuh đak rơmă pôk sư pơm 'bok soi 'bơ̆t anăp Kră Yang.

³⁶Noh tơdrong mă Kră Yang tơtă kơ kon pơlei Isơrael ăn kơ lu sư lăm năr sư chu tuh đak rơmă, noh jing minh tơdrong juăt wei ling-lang đơ̆ng jơhnơr âu truh tơ jơhnơr nai.

³⁷Noh jơ̆ tơdrong juăt gah tơmam soi 'buh, gah tơmam soi phe 'ba, gah tơmam soi huai đơ̆ng yoch păng hơch 'bơm pơm yoch, gah tơmam soi pôk tơdrong jang păng tơmam soi 'blŏk bơnê.

³⁸Kră Yang tơtă boih kơ Môis tơ kơpal kông Sinai, năr mă Sư tơtă kơ kon pơlei Isơrael pơyơ̆r tơmam soi lu sư kơ Kră Yang lăm char glă Sinai.