Read bahnar Je 10 Bible Online

Je 10 - bahnar bible

Je 10

¹Ơ bơngai Isơrael mơ̆ng bĕ Kră Yang khan kơ lu iĕm.

²Kră Yang khan: “'Nĕ kơ arih kiơ̆ trong lu bơngai dêh nai, 'nĕ kơ hli mă đei tơdra tơ plĕnh, mă khan lu sư bơngai dêh nai ngăl hli kơ tơdra noh.

³Yua kơ tơdrong juăt lu sư noh tơdrong kơ đei. Đe kăl 'long lăm bri, yua ti thơ̆ traih hơmet hăm sung.

⁴Đe pơgong pơrŏ 'long noh hăm hu hăm maih; iŏk mut kơđĭnh pơ̆ng kơjăp, wă huay kơ păk.

⁵Rup yang lu sư nhen thoi ngu hơtol kơ sem lăm pơgar pia mơkai; Ưh kơ gơh pơma; đe tung đĕch, yua kơ ưh kơ gơh nơnăm. 'Nĕ kơ hli kơ lu rup yang noh, yua kơ lu sư ưh kơ gơh pơrăm bơ̆n ôh, kư̆m ưh kơ gơh pơm 'lơ̆ng kơ bơ̆n mơ̆n.

⁶Ưh kơ đei yang kiơ thoi Ih ơ Kră Yang. Ih boih Kră Yang Tih Dêh, Ih mơsêh mơyang pran kơtang hloh.

⁷Bu mă ưh kơ hli yom kơ Ih, ơ Pơtao kơ đĭ-đăng dêh char! Ih trŏ tơpă thoi noh, lăm đĭ-đăng lu bơngai hơgei rim adrĕch adrung kon bơngai, lăm jơ̆p-jang kơ dêh char, ưh kơ đei bu thoi Ih.

⁸Lu sư jing kơtul kơwao ngăl; rup yang hăm 'long đe traih bơtho lu sư,

⁹Đe chĕp ba hu tơtang hơtăng đơ̆ng pơlei Tarsis, păng maih đơ̆ng char Uphas. Noh tơdrong jang lu thơ̆ hơjơ̆m, hăm ti thơ̆ hling maih, sĭt sôr pơgong lăm ao che jơk hơhĭm, noh đơ̆ng ti lu bơngai thơ̆ hơgei tanh.

¹⁰Mă-lei Kră Yang jơ̆ 'Bok Kei-Dei sĭt; Sư jơ̆ Kră Yang 'Bok Kei-Dei arih; Pơtao ling-lang. Mưh Sư hil teh đak pơpơ̆; đĭ-đăng dêh char ưh kơ kĕ pŭ iŏk ôh dôm tơdrong Sư hil mĭl.”

¹¹'Nâu, khan bĕ kơ lu sư: Lu yang âu ưh kơ pơjing plĕnh teh ôh. Lu sư gô hiong tôch ala plĕnh kơpal teh âu đĕch.”

¹²Mă-lei Kră Yang boih pơjing teh âu hăm tơdrong mơsêh mơyang Sư; Sư tơiung pơdơ̆ng hăm tơdrong hơgei Sư, bơyar boih plĕnh hăm tơdrong hlôh wao Sư.

¹³Mưh Sư ăn grơ̆m, lu tu đak re jơwa lăm plĕnh. Sư ăn tŭk hơyuh đak tŏk đơ̆ng tôch kơ teh đak. Sư ăn kơmlat đơ̆ng lăm hơmơ̆l 'mi, păng kial lĕch đơ̆ng anih hnam Sư.

¹⁴Đĭ-đăng bơngai jing kơtul kơwao păng ưh kơ hlôh tơdrong kiơ. Rim 'nu bơngai thơ̆ hling rup yang mơlâu yua kơ rup yang lu sư, yang lu sư hling noh chă hơlĕnh đĕch, ưh kơ gơh dui jơhngơ̆m.

¹⁵Lu rup yang ưh kơ đei yua kiơ, chă hơlĕnh đĕch, Truh năr sek tơlang kơnh gô pơrăm đĭ.

¹⁶Tơmam Kră Yang 'Bok Kei-Dei 'măn kơ Jakôp ưh kơ trŏ thoi noh ôh, yua kơ Sư boih pơjing kơ đĭ-đăng tôm tơmam, mă bơngai Isơrael kư̆m adrĕch adrung Sư; Kră Yang Tih Hloh noh anăn Sư.

¹⁷Kon Pơlei mă đe oei wang, Iŏk pơpôi bĕ mŭk tơmam iĕm lĕch đơ̆ng dêh char âu.”

¹⁸'Nâu Kră Yang khan: “Lăm năr âu Inh gô pơpuh lu bơngai mă oei lăm char âu, Inh gô ăn tơdrong truh, wă kơ đe rôp lu sư pơm bơnă.”

¹⁹Răm-'băm dêh kơ inh yua kơ inh jĭ rơka! Rơka inh ưh kơ gơh klaih. Inh khan: “'Nâu lăp tơdrong jĭ đĕch, na inh athei pŭ tơdrong noh.”

²⁰Bơsŭn inh răm đĭ boih, Tơlei chô̆ bơsŭn kơtĕch đĭ boih; Lu đe kon inh weh boih đơ̆ng inh, ưh pă đei 'bôh lu sư boih, Ưh pă đei bu boih tơgŭm pơdơ̆ng ming bơsŭn inh. Kŭm ưh pă đei pĕng che anih inh oei.

²¹Lu bơngai yŏng kơhlôh. Ưh kơ đei apinh Kră Yang ôh na lu sư răm đĭ, Na kon pơlei lu sư tơklah tơklang.

²²Mơ̆ng bĕ, đei tơdrong 'nao truh! Đei tơdrong rŭng răng đơ̆ng char gah yă-nơ̆m, Wă pơm ăn kơ pơlei tih Juđa jing juơ, Jing anih kŏ bri oei.

²³Ơ Kră Yang! Inh băt kon bơngai ưh kơ gơh pơm yŏng kơ sư kơdih, Kŭm ưh kơ gơh bơwei kơnao yak lu sư kơdih mơ̆n.

²⁴Hơmet inh bĕ, ơ Kră Yang, mă-lei kiơ̆ thoi tơdrong trŏ lăp, 'Nĕ kơ phak inh kiơ̆ tơdrong Ih hil. Kơnh hli kơ Ih pơrăm inh.

²⁵Tuh bĕ tơdrong Ih hil mĭl kơ lu dêh char, Lu dêh char mă ưh kơ băt kơ Ih, Păng lu adrĕch adrung mă ưh kơ krao khan hăm anăn Ih. Yua kơ lu sư pơrăm boih Jakôp, Lu sư pơlôch pơrăm sư, Lu sư pơrăm dêh char sư.