Read bahnar Je 15 Bible Online

Je 15 - bahnar bible

Je 15

¹Kră Yang khan kơ inh: “Mă khan Môis păng Samuel dơ̆ng 'bơ̆t anăp Inh, Inh kư̆m ưh kơ mơnat kơ kon pơlei 'nâu. Pơpuh tơweh bĕ lu sư đơ̆ng anăp Inh.

²Tơdah lu sư apinh ih: ‘Lu nhôn gô năm tơ yơ?’ Ih khan kơ lu sư: 'Nâu Kră Yang khan: “Bu Inh pơkă ăn kơ sư lôch kơ hơbuh, gô chu lôch kơ hơbuh, Bu Inh pơkă wă pơlôch hăm đao gưm, gô lôch kơ đao gưm. Bu Inh pơkă wă ăn kơ sư lôch pơngot rơwĕt, gô lôch kơ pơngot rơwĕt. Bu Inh pơkă wă ăn pơm bơnă, sư gô pơm bơnă.”

³Kră Yang khan: “Inh wă phak đei puăn tơdrong: Wă pơlôch păng đao gưm, kŏ gô hek sa, sem grơ̆ păng lu sem bri gô kăp sa păng pơrăm đĭ lu sư.

⁴Inh gô pơm ăn kơ lu sư jing bơngai đĭ-đăng kơ dêh char lăm teh âu lăng krưp, yua kơ tơdrong yoch Manase, kon drŏ-nglo Hesekia pơtao đe Juđa, đei pơm yoch boih tơ lăm pơlei Jêrusalem.

⁵Bu gô mơnat kơ ih, ơ pơlei Jêrusalem? Bu gô hmoi kơ ih? Bu chă wơ̆t weh ngôi jet ih?”

⁶Kră Yang khan: “Ih sơngah achăng lê̆ Inh boih. Ih kư̆m oei kơdŭn tơ rŏng, Na Inh gô yơ̆r ti pơrăm ih; Inh ưh pă đei mơnat boih kơ ih.

⁷Inh gô um pơliĕng lu sư hăm kial 'bơ̆t lu 'măng jang pơlei lăm teh âu, Inh gô săi lê̆ lu sư tơ jơ̆p kơ pơlei, Inh gô pơrăm lê̆ kon pơlei pơla Inh, yua kơ lu sư ưh kơ weh đơ̆ng trong yoch, na wih tơ Inh.

⁸Inh gô ăn kơ drŏ-kăn adro rai lơ hloh kơ chuơh đak dơsĭ. Inh gô ăn bơngai năm pơrăm lu sư kơplah 'năr dơ̆ng, pơrăm lê̆ mĕ lu bơngai tơdăm. Inh gô tuh ăn tơdrong gleh truh kơ lu sư, jơhngơ̆m rŭng răng hli tơrơ.

⁹Minh 'nu mĕ tơpŭ kơ tơpơh 'nu kon, sư gô hơngơ̆t păng dui jơhngơ̆m, dĕnh Măt 'năr sư gô jing măng mu kơplah 'năr dơ̆ng, sư gô kơdơ̆ mơlâu. Lu bơngai mă oei arih Inh gô jao kơ lu ayăt pơlôch hăm đao gưm, noh Kră Yang khan.

¹⁰Răm-'băm kơ inh ơ mĕ, yua kơ ih tơpŭ boih kơ inh, Jing minh 'nu bơngai wă pơjah pơjăng hăm bơngai lăm teh đak âu! Inh ưh kơ đei ăn bu mưng, inh kư̆m ưh kơ đei mưng đơ̆ng đe, mă-lei lu sư hiap inh.

¹¹Kră Yang khan: “Tơpă Inh gô dŏng pơklaih ih 'măn kơ tơdrong jang kăl. Inh gô ăn kơ lu ayăt kơ ih năm lung ih, kơplah lu sư đei tơdrong răm truh pơmat-tat.

¹²Hăm đei bu kĕ gơ̆ bơsei dah kong đơ̆ng gah yă-nơ̆m?

¹³Yua kơ đĭ-đăng tơdrong yoch lu iĕm pơm boih tơ jơ̆p-jang kơ dêh char, na Inh gô jao kơ đe plah tơgar iŏk đĭ-đăng mŭk tơmam iĕm, ưh kơ đei bu 'mong kơ iĕm yă kiơ.

¹⁴Inh gô ăn kơ lu iĕm jang kơ lu bơngai ayăt kơ iĕm, lăm dêh char mă lu iĕm ưh tam băt, yua kơ lăm tơdrong Inh hil thoi ŭnh khơ̆ng, Soh chhông sa lu iĕm.”

¹⁵Ơ Kră Yang, Ih băt đĭ boih, apinh Ih 'blŏk kơ inh păng wei-lăng inh, apinh iung kơting bĕ kơ lu bơngai mă pơm kơnê̆ kơ inh. Hăm tơdrong Ih mơnat, 'nĕ kơ hŭt lê̆ inh. Ih kư̆m 'blŏk, yua kơ Ih na inh pŭ iŏk tơdrong đe pơjăm.

¹⁶Inh kơtơ̆ng boih nơ̆r Ih, inh luăn sa boih; nơ̆r Ih pơma jing tơdrong pơhiôk lăm jơhngơ̆m inh, yua kơ inh gah Ih. Ơ Kră Yang 'Bok Kei-Dei Tih Hloh.

¹⁷Inh ưh kơ lah ngôi chơt hiôk hơdai hăm lu bơngai et sa kơnê̆ ôh, Inh kư̆m ưh kơ lah hiôk hơdai lu sư; Inh ngôi minh drô̆ inh yua kơ ti Ih dan kơpal inh, Ih kư̆m tuh kơ jơhngơ̆m inh 'bĕnh kơ tơdrong Ih hil mĭl.

¹⁸Yua kơ kiơ tơdrong chhŭr nuih inh oei đei ling-lang, jĭ rơka lăm jơhngơ̆m inh rai dêh ưh kơ kĕ kơ klaih? Hăm trŏ Ih pơm kơ inh thoi thong đak ro ưh kơ tơpă, thoi tu đak hrĕng kro?

¹⁹Thoi noh 'nâu Kră Yang khan: “Tơdah ih tơbral, Inh gô sơng iŏk ih, ăn kơ ih dơ̆ng 'bơ̆t anăp Inh; dah ih pơma nơ̆r sĭt ưh kơ chă pơma ngôi đĕch, ih gô jing thoi 'bơ̆r Inh pơma. Lê̆ lu kon pơlei pơla âu gô wih tơ ih, mă-lei ih 'nĕ wih tơ lu sư.

²⁰Inh gô ăn kơ ih thoi dur pơgăn kon pơlei pơla âu. Dur kơjăp pơm păng kong; lu sư gô tơblah hăm ih, mă-lei ưh kơ kĕ jei lu sư ôh, Yua kơ Inh oei hơdai ih, wă kơ dŏng pơklaih ih, ăn kơ ih rơngei.” Noh Kră Yang khan.

²¹Inh gô dui iŏk ih đơ̆ng ti lu bơngai pơm kơnê̆, păng gô pơklaih ih rơngei đơ̆ng ti lu bơngai wă pơrăm ih