Read bahnar Je 18 Bible Online

Je 18 - bahnar bible

Je 18

¹'Nâu nơ̆r Kră Yang khan kơ Jêrêmi:

²“Iung bĕ, ih jur năm tơ hnam bơngai thơ̆ man gŏ teh sŭng, tơ noh Inh gô ăn kơ ih kơtơ̆ng nơ̆r Inh khan.”

³Inh jur năm hloi tơ hnam bơngai thơ̆ man gŏ teh ei, sư oei man kơpal gơ'bang tơroi dăr.

⁴Đei minh pôm bô̆i sư oei man hăm lơ̆n mă-lei glăi lăm ti thơ̆ man, na sư iŏk lơ̆n noh man dơ̆ng bô̆i kiơ̆ thoi sư wă man.

⁵Kră Yang khan kơ inh:

⁶Ơ adrĕch bơngai Isơrael, Inh hăm lu iĕm, Inh hăm gơh pơm thoi thơ̆ man gŏ teh noh dah ưh? Ơ adrĕch bơngai Isơrael, teh lơ̆n lăm ti bơngai man thoi yơ, na lu iĕm lăm tơpang ti Inh kư̆m thoi noh.

⁷Tơdah Inh pơma 'bơm kơ minh adrĕch adrung noh gô buch hŭt, pơrăm lê̆, pơlôch lê̆.

⁸Mă-lei tơdah adrĕch adrung mă Inh roi noh achăng lê̆ tơdrong yoch lu sư kơdih, lei Inh gô tơplih đon Inh mă wă pơrăm lu sư noh.

⁹Păng tơdah Inh pơma 'bơm kơ minh pôm, adrĕch adrung Inh wă man pơdơ̆ng, oei wă pơtăm ming sư,

¹⁰Tơdah adrĕch adrung noh pơm yoch ưh kơ wă mơ̆ng nơ̆r Inh, na Inh kư̆m tơplih tơdrong Inh pơkă khan wă tuh ăn pŭn hiôk kơ lu sư noh.

¹¹Na dang ei, khan bĕ kơ bơngai Juđa păng kon pơlei Jêrusalem, Kră Yang khan: ‘'Nâu, Inh wă iung pơrăm lu iĕm, Inh hơmet wă pơrăm lu iĕm. Rim 'nu athei weh đơ̆ng trong kơnê̆, hơmet ming tơdrong arih sa păng tơdrong pơm kơdih!’

¹²Mă-lei lu sư oei khan: ‘Măk ai kơ nhôn. Lu nhôn oei kiơ̆ kơ đon nhôn kơdih, rim 'nu kư̆ kiơ̆ kơ jơhngơ̆m đon arăng kơnê̆ kơdih.’ ”

¹³Lei na, Kră Yang khan: “Apinh lăng bĕ lăm lu teh đak, Bu mă kơtơ̆ng boih tơdrong thoi noh? Bơngai Isơrael 'lơ̆ng rơgoh pơm boih tơdrong kơnê̆ krưp.

¹⁴Kông Liban. Hăm đei layơ prĕl ưh kơ gom? Đak tơngiĕt ro rok tơmo cheng kông hăm đei oei ro khan hrơ̆ đĭ hă?

¹⁵Mă-lei kon pơlei Inh hiơt kơ Inh; Soh 'long 'bâu phu kơ rup yang kư̆ kă. Sơ̆ lu sư kiơ̆ trong so, mă-lei pơ̆k huŏng yua kơ rup yang, Na weh kiơ̆ trong nai, lu trong tam mă hơmet.

¹⁶Na teh đak lu sư jing bri juơ, pơm kơ đe hiĕk ling-lang; lu bơngai yak rok ei lăng chrơp, Na tơtreh kơ̆l.

¹⁷Inh gô pơm kơ lu sư kơdâu tơklah tơklang 'bơ̆t anăp lu bơngai ayăt, thoi kial bah đơ̆ng hơlĕch; Inh gô tơwih rŏng, ưh pă tơwih muh măt, lăm năr lu sư tơ'bơ̆p pơmat-tat.”

¹⁸Na lu sư khan: “Năm bĕ, chă đon blah Jêrêmi. Yua kơ bơ̆n oei đei 'bok soi bơtho khôi juăt oei đei lu bơngai hơgei, chă pơđâu, oei đei lu bơngai khan lê̆ adrol bơtho nơ̆r Kră Yang kơ lu bơ̆n. Bĕ bơ̆n chă sư pơma glăi păng 'nĕ pă mơ̆ng nơ̆r sư pơma kiơ kiơ.”

¹⁹Ơ Kră Yang, mơ̆ng inh bĕ. Apinh Ih pơgling đon mơ̆ng nơ̆r lu bơngai ayăt kơ inh pơma.

²⁰Đe pơm 'lơ̆ng hăm trŏ apah tơdrong kơnê̆? Lei liơ lu sư sir boih sơlŭng wă tơhuŏng inh. Apinh Ih 'blŏk kơ inh ngăl dơ̆ng 'bơ̆t anăp Ih apinh Ih ăn kơ lu sư tơdrong 'lơ̆ng, apinh Ih 'nĕ pă hil kơ lu sư.

²¹Mă-lei ăn kơ kon sâu sư pơngot rơwĕt, ăn kơ lu sư lôch kơ đao gưm. Lê̆ lu drŏ-kăn hiong kon, sư păng adro po, Klo lu sư lôch hơbuh, ăn kơ lu kon tơdăm lu sư lôch kơ đao hơlă tơ anih tơblah.

²²Ăn kơ đe kơtơ̆ng nơ̆r nhơ̆m hmoi đơ̆ng hnam lu sư, Kơplah Ih ăn bơngai năm blah lu sư ưh kơ tam băt. Yua kơ lu sư sir boih sơlŭng wă kơ rôp inh, Pơm boih hơđong kơ jơ̆ng inh.

²³Ơ Kră Yang, Ih băt boih, đĭ lu sư chă đon wă pơlôch inh. Apinh Ih 'nĕ pă mơnat ăn tơdrong yoch kơnê̆ lu sư, apinh Ih 'nĕ sut tơdrong yoch lu sư đơ̆ng anăp Ih. Apinh Ih ăn kơ lu sư pơ̆k 'bơ̆t anăp Ih. Apinh Ih phak lu sư lăm năr Ih hil!