Read bahnar Je 19 Bible Online

Je 19 - bahnar bible

Je 19

¹Kră Yang khan: “Ih năm răt bĕ ge teh tơ anih đe man. Ih chông ba minh 'bar 'nu lu kră lăm kon pơlei păng kră đơ̆ng lăm khŭl 'bok soi năm hơdai ih.

²Năm tơ lăm Thŭng Ben Hinôm, jê̆ trong mơ̆t tơ 'Măng Jang Ge Pơchah, athei roi tơbăt lu nơ̆r mă Inh gô ăn kơ ih tơ noh.

³Ih athei khan: ‘Ơ lu pơtao Juđa păng đĭ-đăng kon pơlei oei lăm pơlei Jêrusalem, mơ̆ng bĕ nơ̆r Kră Yang. Kră Yang Tih Hloh 'Bok Kei-Dei lu bơngai Isơrael khan thoi âu: Âu, Inh gô ăn tơdrong răm pơmat truh kơ anih 'nâu, dah bơngai bu kơtơ̆ng nơ̆r 'nâu kư̆m jĭ đon.

⁴Yua kơ lu sư achăng lê̆ Inh boih, pơm ăn kơ anih 'nâu jing 'mê̆-'mach, hăm tơdrong lu sư soh nhang pơyơ̆r tơmam soi 'buh kơ lu yang nai, mă lu sư, đe yă 'bok lu sư, lu pơtao đe Juđa tam lah băt, pơm kơ anih 'nâu 'bĕnh kơ pham lu bơngai ưh kơ yoch.

⁵Lu sư man pơdơ̆ng anih kơjung kơ yang Baal; 'buh kon hơ'lơ̆p pơm tơmam soi pơyơ̆r ăn kơ yang Baal, noh tơdrong mă Inh ưh kơ đei bơtho athei lu sư, Inh kư̆m ưh kơ đei tơchĕng.’ ”

⁶Kră Yang khan: “'Nâu năr gô truh, kơplah noh anih âu ưh pă krao Tôphet, kư̆m ưh pă krao Thŭng Ben Hinôm dơ̆ng, gô krao anih thŭng tơdrong tơkoh tơ'bet băl.

⁷Lăm anih âu Inh gô tơhiong lê̆ dôm tơdrong lu bơngai Juđa hăm lu bơngai pơlei Jêrusalem chă đon wă pơm. Inh gô ăn kơ kon pơlei lu sư lôch kơ đao 'bơ̆t anăp lu bơngai ayăt kơ lu sư đơ̆ng ti lu bơngai 'maih pơrăm tơdrong arih lu sư; Inh gô jao ăn kơ kon sem bri sem păr sa akâu lôch lu sư.

⁸Inh gô pơm kơ pơlei âu jing juơ; ăn kơ đe gô che bơle; bơngai bu yak rok noh gô lăng krưp păng hiĕk kơ tơdrong răm noh.

⁹Inh gô ăn kơ lu sư 'buh sa lu kon drŏ-nglo kon drŏ-kăn lu sư kơdih, lu sư gô 'buh sa băl tơduă, lăm năr đe wang lăm năr pơmat-tat, kơplah 'bơ̆t lu bơngai mă wă pơrăm tơdrong arih lu sư.’

¹⁰Ih athei teh pơchah bĕ ge 'bơ̆t anăp lu bơngai năm hơdai ih.

¹¹‘Na khan kơ lu sư: 'Nâu nơ̆r Kră Yang Tih Hloh khan: Inh gô teh pơchah lê̆ kon pơlei păng pơlei âu kư̆m thoi Jêrêmi teh pơchah ge noh mơ̆n, ưh pă gơh pơklep dơ̆ng. Lu sư gô 'bŭ hơtâu bơngai lôch tơ Tôphet, dĭng mă anih 'bŭ pă đei.’ ”

¹²Kră Yang khan: “Inh gô ăn kơ anih âu păng kon pơlei sư thoi noh, Inh gô pơm kơ pơlei âu thoi Tôphet.

¹³Đĭ-đăng hnam lăm pơlei Jêrusalem păng hnam pơtao Juđa, đĭ-đăng lu hnam ayơ mă tơ kơpal bơbŭng hnam noh đei soh tơmam 'bâu phu kơ lu sơnglŏng tơ kơpal plĕnh păng kư̆m đei tuh ăn tơmam huch sa pơyơ̆r kơ lu yang nai, kư̆m 'mê̆-'mach thoi Tôphet.”

¹⁴Đơ̆ng rŏng kơ Jêrêmi brŏk đơ̆ng Tôphet anih mă Kră Yang wơh sư năm khan lê̆ adrol, sư dơ̆ng 'bơ̆t cham hnam Kră Yang păng khan tơbăt kơ đĭ-đăng kon pơlei:

¹⁵“Kră Yang Tih Hloh, 'Bok Kei-Dei lu bơngai Isơrael khan: ‘'Nâu, Inh gô ăn tơdrong răm truh kơ pơlei 'nâu hăm lu pơlei jum dăr thoi Inh khan lê̆, yua kơ lu sư arăng kơ̆l, kuă kơ mơ̆ng nơ̆r Inh.”