Read bahnar Je 20 Bible Online

Je 20 - bahnar bible

Je 20

¹Phashur 'bok soi kon drŏ-nglo Immer, pơm tih lăng hnam akŭm Kră Yang, đei kơtơ̆ng Jêrêmi pơma khan lê̆ adrol lu tơdrong noh.

²Phashur rôp teh tôn Jêrêmi bơngai khan lê̆ adrol, hơnuh lê̆ jơ̆ng sư 'bơ̆t 'Măng Jang kơpal Bênjamin gah hnam akŭm Kră Yang.

³Pơgê năr đơ̆ng rŏng Phashur plôh Jêrêmi đơ̆ng sư hơnuh, Jêrêmi khan kơ sư: “Kră Yang ưh pă krao ih Phashur dơ̆ng, gô krao anăn ih Magor Misabip.a

⁴Yua kơ Kră Yang khan: “'Nâu Inh gô pơm ăn kơ ih đei tơdrong hli tơrơ ih kơdih păng kơ bôl buăl ih hai. Lu sư gô lôch kơ đao gưm lu bơngai ayăt tơm măt ih. Inh gô jao lu kon pơlei Juđa lăm ti pơtao char Babilôn, pơtao gô rôp anhăk lu sư pơm đĭch tơ char Babilôn dah yua đao gưm pơlôch hloi lu sư.”

⁵Inh kư̆m gô jao dôm lu mŭk tơmam pơlei âu, mŭk tơmam đơ̆ng lu sư chă jang sa, tơmam gĭt mă đei dang ei, tơpă, Inh gô jao ăn dôm lu hu maih pơtao Juđa lăm ti lu bơngai ayăt, gô tơgar iŏk na chĕp ba tơ Babilôn.

⁶Ơ Phashur, ih kơdih hăm lu bơngai mă oei lăm hnam ih, đĭ-đăng gô pơm bơnă. Ih gô năm tơ Babilôn gô lôch păng 'bŭ hloi tơ noh, hơdai hăm lu bôl buăl ih, wă khan lu bơngai mă ih đei pơma khan lê̆ adrol hơlĕnh kơ lu sư.

⁷Ơ Kră Yang, Ih pơhlŭ inh boih, inh chu iŏk boih dôm tơdrong Ih pơgŏ, Ih pơjuă pơđep inh păng jei Ih boih. Inh arih pơm kơ đe hiĕk ăr kơ inh prăt năr. Rim bơngai hiĕk pơjăm inh.

⁸Mưh wă inh pơma, inh athei ôr kơtang. Inh khan: “Rŭng răng dêh tăm 'băm dêh.” Tơpă nơ̆r Kră Yang pơm boih kơ inh mơlâu păng đe hiĕk ăr kơ inh prăt năr.

⁹Tơdah inh khan: “Inh ưh pă pơma roi gah nơ̆r Sư boih, inh ưh pă đei yua anăn Sư na pơma roi dơ̆ng,” nơ̆r Sư lăm jơhngơ̆m inh thoi ŭnh soh chhông, Nơ̆r Sư chĭt lê̆ lăm kơting inh, na jơhngơ̆m inh rơmơ̆n lap, ưh pă kĕ ĕnh boih.’

¹⁰Inh kơtơ̆ng đei nơ̆r đơ̆ng lơ bơngai pơma mơmơnh, “Tơdrong tơhli tăp tang. Roi tơbăt bĕ lu bơ̆n athei roi tơbăt tơdrong glăi sư!” Đĭ-đăng buăl juăt inh chang rŏ kơ inh jah pơ̆k huŏng, na khan: “Rŏ lăng đe gô pơhlŭ sư, lu bơ̆n gơh pơm kơ sư, na gô jei bơ̆n.

¹¹Mă-lei Kră Yang oei hơdai inh, thoi minh 'nu bơngai linh nuih kơtang; Na lu bơngai pơm kơnê̆ kơ inh gô pơ̆k huŏng, ưh kĕ kơ jei lu sư, yua kơ lu sư oei arih sa ưh kơ 'lơ̆ng, gô pŭ iŏk tơdrong mơlâu tih, mơlâu ling-lang hlŏng hloi ưh kơ đei layơ hiơt.

¹²Ơ Kră Yang Tih Hloh! Ih boih Tơ'ngla pơlong lăng lu bơngai tơpăt, lăng 'bôh đĭ lăm jơhngơ̆m klơm klak lăm kơ̆l 'ngok, Ăn bĕ kơ inh 'bôh tơdrong Ih wă pơm 'mong kơ lu sư, Yua kơ inh jao boih tơdrong inh kơ Ih.

¹³Hơri bĕ kơ Kră Yang, Kơkuh bơnê bĕ kơ Kră Yang, Yua kơ Sư dŏng pơklaih boih lu bơngai dơnuh hin Đơ̆ng ti lu bơngai pơm kơnê̆.

¹⁴Hiap bĕ năr mă tơpŭ kơ inh! Năr mĕ inh hơiơch kơ inh pơm liơ mă gơh hiôk?

¹⁵Hiap bĕ bơngai bu mă năm roi kơ 'bă inh khan: “Đe tơpŭ kơ ih minh 'nu kon drŏ-nglo!” Pih pang pơm kơ 'bă chhôk chơt.

¹⁶Ăn kơ bơngai noh thoi lu pơlei Kră Yang pơrăm boih ưh pă đei mơnat! Ăn kơ sư kơtơ̆ng tơdrong nhơ̆m hmoi gah pơgê hrôih, 'năr dơ̆ng kơtơ̆ng đe ôr krao tơdrong tơblah.

¹⁷Liơ mă inh ưh kơ lôch kơplah inh oei lăm klak mĕ inh sơ̆; Tơpu kon lăm mĕ inh jah jing pơm bơsat inh, Jah đei anăp kơ inh hlŏng hloi.

¹⁸Yua kơ kiơ đei tơpŭ kơ inh wă kơ inh pơmat-tat, gleh glăn, đĭ chăl arih inh mơlâu ling-lang?