Read bahnar Je 21 Bible Online

Je 21 - bahnar bible

Je 21

¹Đei nơ̆r đơ̆ng Kră Yang khan kơ Jêrêmi, kơplah pơtao Sêđekia wơh Phashur, kon drŏ-nglo Malkija păng 'bok soi Sephania kon drŏ-nglo Maaseia năm tơ Jêrêmi khan:

²“Apinh ih krao apinh bĕ Kră Yang tơgŭm lu nhôn, yua kơ Nebukatnessar pơtao đe Babilôn oei năm wang blah lu nhôn. Rŏ lăng băt Kră Yang pơm tơdrong mơsêh kơ nhôn kiơ̆ thoi tơdrong mơsêh Sư pơm sơ̆, pơm ăn kơ pơtao Babilôn kơdŭn weh đơ̆ng lu nhôn.”

³Jêrêmi tơl: “Lu iĕm athei năm khan kơ pơtao Sêđekia:

⁴‘'Nâu nơ̆r Kră Yang 'Bok Kei-Dei lu bơngai Isơrael khan: Âu Inh gô tơwih plơ̆, dôm lu đao kơtuang iĕm oei chĕp lăm ti wă blah puh pơtao Babilôn păng bơngai Kalđê dang ei oei wang tăp tơ đaih kơ dur pơlei, Inh gô akŭm lu sư lăm tŏk-bŏk pơlei tih âu.

⁵Kơdih kâu Inh gô blah lu iĕm, Inh tôi kơkŏng hiŏng ti pran kơtang hăm tơdrong ơh blĕk hil mĭl dêh.

⁶Inh gô pơlôch pơrăm lu bơngai oei lăm pơlei âu, kon bơngai păng đĭ lu sem dơrong gô lôch kơ toi hơbuh krưp tơpă.

⁷Đơ̆ng rŏng kơ noh, Kră Yang khan: Inh gô jao Sêđekia, pơtao đe Juđa păng yŏng pơgơ̆r, hăm lu, kon pơlei sư mă oei arih lăm pơlei tih âu; oei arih huay kơ lôch rŭng, đơ̆ng đao gưm, hăm klaih đơ̆ng lôch kơ pơngot rơwĕt, Inh gô jao lu sư lăm ti Nebukatnessar pơtao Babilôn, lăm ti lu bơngai ayăt chă wă 'maih pơlôch lu sư. Pơtao Babilôn gô koh lu sư hăm đao gưm, pă đei mơnat, pă 'mêm kư̆m pă lăng lu sư boih.”

⁸Ih athei khan dơ̆ng kơ kon pơlei âu: Kră Yang khan: Âu, Inh dan lê̆ boih trong tơdrong arih păng trong ba tơdrong lôch 'bơ̆t anăp lu iĕm.

⁹Bơngai bu mă oei oei lăm pơlei âu sư gô lôch kơ đao gưm, lôch kơ pơngot rơwĕt, lôch kơ jĭ hơbuh, mă-lei bu kơdâu lĕch yơ̆r ti tơkan tơ bơngai Kalđê mă oei wang iĕm gô arih, kư̆m gô pơklaih akâu sư kơdih.

¹⁰Inh wă pơrăm pơlei âu, ưh kơ wă ăn pŭn hiôk kơ lu sư ôh. Kră Yang khan. Inh gô jao pơlei âu lăm ti pơtao Babilôn; sư gô soh pơrăm pơlei âu hăm ŭnh.

¹¹Ih athei khan kơ anih hnam pơtao Juđa, mơ̆ng bĕ nơ̆r Kră Yang.

¹²Kră Yang khan: “Ơ adrĕch Đawit, Pơm bĕ tơdrong 'lơ̆ng tơpăt hơnơ̆ng rim pơgê hrôih, Dŏng pơklaih bĕ lu bơngai đe sa pơgâm, đơ̆ng ti lu bơngai pơjuă pơđep, Kơnh hli kơ Inh hil khơ̆ng thoi ŭnh, ưh kơ đei bu kĕ pĭt, Yua kơ đơ̆ng tơdrong lu iĕm đei pơm yoch kơnê̆.”

¹³Kră Yang khan: “'Nâu Inh wă blah lu iĕm, ơ pơlei tih Jêrusalem, oei kơpal tơmo tih dơnă lăm anih groi kông, lăng tơ bơngai oei lăm thŭng, Lu iĕm khan, ‘Bơngai bu gơh năm blah bơ̆n? Bơngai bu kĕ mơ̆t lăm anih kơjăp bơ̆n kơ'nơp?’ ”

¹⁴Kră Yang khan: “Inh gô phak lu iĕm kiơ̆ thoi tơdrong yoch lu iĕm đei pơm. Inh gô prah ŭnh tơ hnam pơtao iĕm ŭnh gô sa pơđĭ tơmam tăp dă.”