Read bahnar Je 22 Bible Online

Je 22 - bahnar bible

Je 22

¹Kră Yang khan thoi âu: “Jur năm bĕ tơ hnam pơtao Juđa, roi kơ sư tơdrong âu:

²‘Mơ̆ng bĕ nơ̆r Kră Yang khan ơ pơtao Juđa, bơngai mă hơ-oei 'bơ̆t tang-dŏ pơtao Đawit, ih, lu yŏng pơgơ̆r păng lu kon pơlei ih mơ̆t lĕch trong 'măng jang âu.

³'Nâu nơ̆r Kră Yang khan: Pơm bĕ dôm tơdrong tơpăt hơnơ̆ng tơdrong trŏ; pơklaih bĕ lu bơngai mă đe rôp đơ̆ng ti lu bơngai pơjuă pơđep. Lê̆ kơ rôp pơgŏ păng kư̆m 'nĕ pơm kơnê̆ kơ lu bơngai tơmoi, lu kon mơti 'bă păng lu yă adro 'Nĕ kơ pơlôch tuh pham kơ lu bơngai ưh kơ yoch tơ anih âu.

⁴Tơdah lu iĕm đĭ jơhngơ̆m chu pơm kiơ̆ dôm nơ̆r tơtă 'nâu, na iĕm gô đei pơtao pơtrơp hơ-oei 'bơ̆t tang-dŏ pơtao Đawit hao gre aseh păng hao aseh hăm lu yŏng pơgơ̆r, lu kon pơlei ih gô mơ̆t lĕch rok trong 'măng jang hnam pơtao 'nâu.

⁵Mă-lei tơdah lu iĕm kuă kơ mơ̆ng kiơ̆ nơ̆r tơtă 'nâu, Kră Yang khan: Inh pơkă hăm anăn Inh kơdih, hnam pơtao âu gô jing juơ.’ ”

⁶Kră Yang khan gah hnam pơtao Juđa: “Mă khan Inh lăng ih thoi char Gileat, kư̆m rŏ krưp thoi kơ̆l kông Liban, Mă-lei Inh pơkă wă pơm kơ ih jing thoi char glă, lu pơlei ưh pă đei bơngai oei.

⁷Inh gô wơh lu linh năm pơrăm ih, lu sư chĕp sung tơgăk; lu sư gô ret lê̆ hơpok tơpơng 'lơ̆ng mă lu ih đei rơih, păng klơ̆m lê̆ lăm ŭnh.

⁸Đei kon pơlei đơ̆ng lơ teh đak gô năm rok trong pơlei âu, tơpinh băl: ‘Liơ Kră Yang pơm kơ pơlei tih âu mah thoi noh?’

⁹Gô đei bơngai tơl khan: ‘‘Noh yua kơ đơ̆ng kon pơlei âu achăng lê̆ tơdrong pơgơ̆p hăm Kră Yang, 'Bok Kei-Dei lu sư kơdih, na bơwih bơwăn păng kơkuh kơ yang nai.’ ”

¹⁰'Nĕ hmoi kơ pơtao lôch păng kư̆m 'nĕ pă nhơ̆m hmach kơ sư, jah nhơ̆m hmoi bĕ kơ pơtao mă đe rôp pơm bơnă đơ̆ng iĕm, yua kơ sư ưh pă wih brŏk tơ iĕm dơ̆ng. Ưh pă wă 'bôh dêh char sư âu dơ̆ng.

¹¹Yua kơ Kră Yang khan thoi âu gah Salum pơtao đe Juđa kon drŏ-nglo Jôsia, pơgơ̆r tơplih 'bă sư Jôsia păng kư̆m weh boih đơ̆ng anih âu: “Sư ưh pă đei chuêt brŏk tơ âu dơ̆ng.

¹²Na gô lôch hloi tơ lăm char mă đe chông ba, ưh pă 'bôh teh đak 'nâu đơ̆ng.” Roi gah Jêhôiakim

¹³Răm-'băm tơpă kơ bơngai bu mă pơdơ̆ng hnam pơtao sư hăm tơdrong ưh kơ trŏ păng pơm anih tơ kơpal hăm tơdrong ưh kơ tơpăt hơnơ̆ng rôp lu bơngai rông 'bôt sư jang hoh; ưh kơ đei apah lu sư;

¹⁴Khan thoi âu: “Inh gô pơm hnam pơtao inh mă tih să, đei lơ tăl tơ kơpal rơhơi rơhŏ; Na sư gô pơm lu 'măng-'mŏk hơdah pơ̆ng tơnăr sư hăm tơ̆r 'long hơngo pik bah đak 'brê.

¹⁵Hăm trŏ ih tơchĕng ih pơm pơtao, yua kơ ih pơm hnam hăm 'long hơngo 'lơ̆ng hloh kơ đe? Hăm trŏ kơ 'bă ih sơ̆ đei sŏng sa đak nhă? Sư pơm tơdrong 'lơ̆ng tơdrong tơpăt, na đei tơdrong 'lơ̆ng rŏ kơ sư.

¹⁶Sư sek tơdrong tơpăt kơ lu bơngai dơnuh hin hăm lu bơngai pơmat-tat, na sư đei tơdrong pŭn hiôk. Hăm trŏ sư pơm thoi noh wă khan sư băt kơ Inh? Noh Kră Yang khan:

¹⁷Mă-lei măt păng jơhngơ̆m ih 'maih chă lơi, pơlôch lu bơngai ưh kơ đei yoch, păng 'maih chă rôp pơgŏ pơjuă pơđep pơm kơnê̆ dêh.

¹⁸Thoi noh, 'nâu Kră Yang khan gah Jêhôiakim, kon drŏ-nglo Jôsia pơtao đe Juđa: Ưh kơ đei bu nhơ̆m hmoi kơ sư khan: Hô̆ lah 'nhŏng inh! Hô̆ lah mŏ inh! Ưh kơ đei bu nhơ̆m hmoi kơ sư khan: Hô̆ lah yŏng inh kah, hô̆ lah pơtao 'lơ̆ng rŏ inh kah!

¹⁹Đe gô 'bŭ sư thoi đe 'bŭ aseh iĕ, đe gô hor sư tơ 'nguaih, păng klơ̆m lê̆ sư tơ ataih kơ 'măng jang pơlei Jêrusalem.

²⁰Tŏk năm bĕ tơ char Liban păng krao ôr, nhơ̆m hmoi ôr mă re tơ groi Basan krao ôr mă re kơtang dơ̆ng kông Abarim. Yua kơ đĭ-đăng bơngai mă pơgơ̆p hăm ih lôch đĭ boih.

²¹Inh đei bơtho khan boih kơ ih kơplah ih hiôk jơnap, mă-lei ih khan Inh ưh kơ wă mơ̆ng ôh. 'Nâu tơdrong ih đei pơm boih đơ̆ng ih oei 'lơ̆p sơ̆, ih oei ưh kơ wă mơ̆ng nơ̆r Inh.

²²Kial gô puh pơđông lê̆ đĭ-đăng lu bơngai wei triu ih, păng lu bơngai mă pơgơ̆p hăm ih gô jing bơnă, kơplah noh ih gô mơlâu păng hlơ̆l lĕm, yua kơ tơdrong kơnê̆ đêl ih pơm boih.

²³Ơ lu bơngai oei lăm char Liban, pơm anih oei lăm kơdrơ̆ng 'long hơngo, ih gô tơngưih dêh kơplah đei tơdrong jĭ tuĕnh truh kơ ih, thoi lu bơngai drŏ-kăn jĭ wă hơiơch!

²⁴Kră Yang khan: “Sĭt thoi Inh arih, mă khan Jêhôiachin kon drŏ-nglo Jêhôiakim pơtao đe Juđa, thoi tơkhiĕn tơdra 'bot 'bơ̆t hơnglâu ti 'ma Inh, tơpă Inh kư̆m oei plôh lê̆.

²⁵Inh gô pơjao lê̆ ih kơ lu bơngai mă 'maih pơrăm tơdrong arih ih tơ lăm ti lu bơngai mă ih hli dêh, lăm ti Nebukatnessar pơtao đe Babilôn păng lăm ti lu bơngai Kalđê.

²⁶Inh gô puh lê̆ ih hăm mĕ ih tơ dêh nai, ưh kơ trŏ kơ dêh char mă đêl tơpŭ kơ ih păng măr iĕm gô lôch tơ noh.

²⁷Măr iĕm ưh pă đei brŏk boih tơ char mă măr iĕm rơnguơ̆ rŏ kơ 'maih brŏk.”

²⁸Hăm trŏ Jêhôiachin jing bô̆i teh pơchah boih, mă đe areh? Minh pôm bô̆i teh ưh kơ đei bu wă? Liơ sư hăm lu adrĕch adrung sư đe klơ̆m hŭt lê̆ ataih, tơ char mă lu sư ưh kơ băt?

²⁹Ơ dêh char, dêh char, dêh char! Mơ̆ng bĕ nơ̆r Kră Yang.

³⁰Kră Yang khan: “Chih jô̆ bĕ bơngai 'nâu hơdai hăm lu bơngai ưh kơ đei hơ'lơ̆p, ưh kơ đei pŭn hiôk jơnap kơplah sư oei arih; Yua kơ lu kon sâu sư ưh kơ đei bu pŭn hiôk jơnap, gơh hơ-oei tơ tang-dŏ pơtao Đawit, păng gơh pơgơ̆r lăm adrĕch Juđa dơ̆ng!”