Read bahnar Je 23 Bible Online

Je 23 - bahnar bible

Je 23

¹Kră Yang khan: “Răm-'băm tơpă kơ lu bơngai wei triu, pơrăm păng pơm kơ triu Inh tơklah tơklang đơ̆ng tơmăn 'nhĕt Inh.”

²Thoi noh na, Kră Yang, 'Bok Kei-Dei bơngai Isơrael khan kơ lu bơngai wei triu, wei-lăng kon pơlei Inh. “Lu iĕm pơm kơ triu Inh tơklah tơklang, pơpuh tơweh tơ nai ưh kơ wei rong lu sư, Kră Yang khan. 'Nâu Inh gô phak lu iĕm yua kơ tơdrong kơnê̆ iĕm pơm.”

³“Noh Inh wă akŭm lu triu Inh mă oei arih đơ̆ng jơ̆p kơ dêh char mă Inh đei pơpuh lu sư. Inh gô chông anhăk lu sư mơ̆t tơ lăm tơmăn 'nhĕt lu sư; lu sư gô chek lar rai lơ.

⁴Inh gô chă lu bơngai wei rong lu sư; lu sư ưh pă hli kơ kiơ dơ̆ng păng ưh kơ đei hiong minh pôm ayơ,” noh Kră Yang khan.

⁵Kră Yang khan: “Năr gô truh tơ anăp âu, Inh gô tơiung đei minh pôm dơng tơpăt chăt đơ̆ng adrĕch Đawit, Sư pơm pơtao pơgơ̆r gơh hơgei, pơm tơdrong 'lơ̆ng tơpăt hơnơ̆ng lăm teh đak.

⁶Lăm chăl Sư pơgơ̆r khŭl bơngai Juđa gô đei dŏng pơklaih; păng bơngai Isơrael đei arih hiôk hơđơ̆ng. 'Nâu anăn đe gô krao Sư: ‘Kră Yang boih 'lơ̆ng tơpăt lu nhôn.’ ”

⁷Kră Yang khan: “Lei na gô đei năr truh tơ anăp, kơplah noh đe ưh pă đei pơma pơkăm pơkă thoi âu dơ̆ng: ‘Sĭt tơpă thoi Kră Yang arih, Kră Yang mă đei pơklaih adrĕch adrung Isơrael đơ̆ng char Êyiptơ.’

⁸Mă-lei đe gô khan: Sĭt tơpă thoi Kră Yang arih, Kră Yang mă đei dŏng pơklaih adrĕch adrung bơngai Isơrael đơ̆ng gah yă-nơ̆m, păng lu char mă lu sư oei đơ̆ng Kră Yang puh lu sư sơ̆.’ Lu sư gô wih brŏk oei tơ dêh char lu sư kơdih.

⁹Gah lu bơngai khan lê̆ adrol: Jơhngơ̆m inh pơchah boih lăm inh, kơting inh đĭ tơtơ̆, inh thoi bơngai suai kơ sik, thoi bơngai wing măt yua kơ sik pơm kơ sư, đơ̆ng Kră Yang hăm đơ̆ng nơ̆r 'lơ̆ng rơgoh Sư.

¹⁰‘Dêh char âu 'bĕnh kơ lu bơngai pơm pơyô kư̆ kă, Yua kơ đơ̆ng Kră Yang hiap pơtê̆, teh hrĕng kro, tơmăn 'nhĕt tơ char glă kro đĭ. Lu sư kơdâu kiơ̆ trong kơnê̆; yua iŏk tơdrong gơh kĕ ưh kơ trŏ.’ ”

¹¹“Đĭ lu bơngai khan lê̆ adrol hăm đĭ lu 'bok soi tă kơ pơm kơnê̆ dêh, Inh 'bôh boih lu sư pơm kơnê̆ truh tơ lăm hnam Inh hloi.” Noh Kră Yang khan,

¹²“Thoi noh trong lu sư yak jing rơbơ̆r, Inh gô pơpuh lu sư tơ lăm măng mu, păng gô pơ̆k 'bĭch hloi tơ noh. Truh boih sơnăm Inh wă sek phak lu sư, Inh pơrăm lu sư.” Noh Kră Yang khan.

¹³“Inh 'bôh hơđăl boih tơdrong glăi yoch krưp, lăm bơngai khan lê̆ adrol char Samari; Lu sư yua anăn yang Baal na khan lê̆ adrol, ba bơngai Isơrael Inh wơ̆l jrok.

¹⁴Inh 'bôh lăm lu bơngai khan lê̆ adrol lăm pơlei Jêrusalem pơm tơdrong kơnê̆ dêh; Lu sư pơm pơyô kư̆ kă păng yak kiơ̆ trong hơlĕnh pơdăr; lu sư pơdrŭt bơngai pơm kơnê̆ rai dêh, na lu sư ưh pă đei bu 'maih lê̆ tơdrong kơnê̆. Inh lăng rim kơ lu sư thoi pơlei Sôđôm, păng kon pơlei Jêrusalem nhen thoi pơlei Gômôrơ.”

¹⁵Thoi noh Kră Yang Tih Hloh khan gah lu bơngai khan lê̆ adrol noh: “Inh gô ăn kơ lu sư sa 'long tăng păng nhă đak hơkăm, yua kơ đơ̆ng lu bơngai khan lê̆ adrol lăm pơlei Jêrusalem, tơdrong pơm yoch kơnê̆ dêh rai jơ̆p kơ dêh char.”

¹⁶Kră Yang Tih Hloh khan: “'Nĕ pă mơ̆ng lu bơngai khan lê̆ adrol noh roi kơ iĕm. Lu sư roi ăn kơ iĕm tơdrong hơmĕng ưh kơ đei, lu sư khan lê̆ adrol kiơ̆ thoi lu sư chă đon kơdih, ưh kơ trŏ kơ đơ̆ng nơ̆r Kră Yang bơtho khan ôh.

¹⁷Lu sư hrăn pơma roi kơ lu bơngai areh kơ Inh: ‘Kră Yang khan: Lu iĕm gô đei hiôk-hian.’ Lu sư pơma roi kơ đĭ lu bơngai arăng kơ̆l kiơ̆ thoi lu sư wă kơdih. ‘Ưh kơ đei tơdrong răm kiơ truh kơ iĕm ôh.’

¹⁸Mă-lei bu đei dơ̆ng boih lăm khŭl Kră Yang, wă kơ mơ̆ng lăng nơ̆r Sư? Bu mơ̆ng hơlen boih păng wă kơ băt nơ̆r Sư?

¹⁹To kial hơbŭt đơ̆ng Kră Yang lĕch boih, tơdrong Sư hil thoi phŭt huơ̆r, huơ̆r tơ kơpal kơ̆l lu bơngai pơm kơnê̆.

²⁰Tơdrong Kră Yang hil ưh kơ ngach ôh, dĭng mă Sư pơm pơkeh thoi Sư tơchĕng wă. Lăm năr ei kơnh lu iĕm gô băt hơdah tơdrong noh.

²¹Inh ưh kơ đei wơh lu bơngai khan lê̆ adrol noh, mă-lei lu sư oei năm chă roi nơ̆r Sư kơdih. Inh ưh kơ đei athei lu sư mă-lei lu sư oei khan lê̆ adrol.

²²Mă-lei tơdah lu sư đơ̆ng lăm khŭl Inh, lei lu sư kư̆m roi boih nơ̆r Inh kơ lu kon pơlei pơla Inh, pơm ăn kơ kon pơlei Inh weh đơ̆ng trong kơnê̆, đơ̆ng tơdrong pơm kư̆ kă.”

²³Kră Yang khan: “Inh hăm trŏ Kră Yang 'Bok Kei-Dei mă oei jê̆ đĕch, mă ưh kơ Kră Yang 'Bok Kei-Dei oei ataih?”

²⁴Kră Yang khan: “Hăm đei bu gơh ôn hlơp akâu sư, mă Inh ưh kơ 'bôh? Kră Yang khan: Hăm trŏ kơ Inh oei tơ jơ̆p-jang kơpal plĕnh 'bĕnh kơ teh đak âu?

²⁵Inh đei kơtơ̆ng nơ̆r lu bơngai khan lê̆ adrol hơlĕnh yua anăn Inh khan! ‘Inh apo 'bôh, inh apo 'bôh.’

²⁶Tơdrong 'nâu oei đei lăm jơhngơ̆m lu bơngai khan lê̆ adrol hơlĕnh, pơma kiơ̆ kơ jơhngơ̆m đon lu sư kơdih, dĭng dang yơ?

²⁷Lu sư tơchĕng chă đon roi tơdrong lu sư apo kơ lu buăl sư mơ̆ng na wă kơ kon pơlei Inh hiơt kơ anăn Inh thoi lu 'bok yă sư hiơt kơ anăn Inh kiơ̆ yang Baal.

²⁸Bơngai khan lê̆ adrol ayơ đei apo 'bôh, roi bĕ tơdrong sư apo, na bơngai bu mă đei iŏk boih nơ̆r đơ̆ng Inh ră roi bĕ mă tơpăt!” Kră Yang khan: Hơnong 'ba hăm gơh yua tơplih kơ găr 'ba?

²⁹Nơ̆r Inh hăm trŏ thoi ŭnh? Thoi mut teh tơmo pơchah? Noh Kră Yang khan.

³⁰Kră Yang khan. Thoi noh na 'nâu Inh gô blah lu bơngai khan lê̆ adrol mă tơtông iŏk băl nơ̆r inh đơ̆ng tơduă lu sư na khan nơ̆r Inh.

³¹Kră Yang khan: “'Nâu Inh gô blah lu bơngai khan lê̆ adrol, mă yua hơpiĕt lu sư kơdih khan: ‘'Nâu nơ̆r Kră Yang khan!’

³²Tơpă Inh gô blah lu bơngai khan lê̆ adrol yua nơ̆r hơlĕnh roi tơdrong apo pơm ăn kơ kon pơlei pơla Inh jrok kiơ̆ nơ̆r hơlĕnh kư̆ kă. Inh ưh kơ đei wơh păng ưh kơ đei athei lu sư ôh. Tơpă lu sư ưh kơ đei tơgŭm kiơ kơ kon pơlei pơla âu.” Noh Kră Yang khan.

³³“Dah kon pơlei 'nâu, lu 'bok khan lê̆ adrol, lu 'bok soi jet ih: ‘Tơdrong trăp đơ̆ng Kră Yang noh kiơ?’ Ih athei khan kơ lu sư: ‘Lu iĕm boih tơdrong trăp. Inh gô tŭk lê̆ iĕm,’ ” Kră Yang khan.

³⁴Dah 'bok soi, dah 'bok khan lê̆ adrol dah minh 'nu lăm lu kon pơlei khan: ‘'Nâu tơdrong trăp đơ̆ng Kră Yang,’ Inh gô phak bơngai noh hăm hnam dơnŏ sư hai.

³⁵'Nâu tơdrong lu iĕm gô pơma tơjet băl tơduă, bơngai âu jet bơngai to: ‘Kră Yang đei tơl thoi yơ?’ Dah ‘Đei bơtho khan tơdrong kiơ?’

³⁶Mă-lei lu iĕm 'nĕ pă pơma 'bơm kơ tơdrong trăp đơ̆ng Kră Yang dơ̆ng, yua kơ tơdrong pŭ trăp noh boih nơ̆r đơ̆ng 'bơ̆r rim 'nu pơma, păng lu iĕm đei pơm glăi boih kơ dôm nơ̆r Kră Yang 'Bok Kei-Dei mă arih ling-lang, Kră Yang Tih Hloh, 'Bok Kei-Dei lu bơ̆n.

³⁷'Nâu tơdrong iĕm jet bĕ lu 'bok khan lê̆ adrol: ‘Kră Yang tơl ih liơ boih?’ Dah ‘Kră Yang pơma bơtho ih tơdrong kiơ?’

³⁸Mă-lei tơdah lu iĕm oei khan: ‘'Nâu boih tơdrong trăp đơ̆ng Kră Yang,’ na Kră Yang khan: ‘Yua kơ lu iĕm pơma nơ̆r 'nâu. 'Nâu boih tơdrong trăp đơ̆ng Kră Yang,’ kơplah Inh đei wơh bơngai năm bơtho kơ iĕm 'nĕ pă pơma: ‘'Nâu tơdrong trăp đơ̆ng Kră Yang.’

³⁹Yua kơ thoi noh, na 'nâu, sĭt tơpă Inh gô hiơt kơ lu iĕm păng Inh gô hŭt lê̆ iĕm đơ̆ng hơdai hăm pơlei tih mă Inh ăn boih kơ iĕm păng lu 'bok iĕm.

⁴⁰Inh gô ăn kơ iĕm mơlâu kơ đe ling-lang hlŏng hloi, ưh kơ đei bu gơh hiơt.”