Read bahnar Je 24 Bible Online

Je 24 - bahnar bible

Je 24

¹'Noh đơ̆ng rŏng kơ Nebukatnessar, pơtao đe Babilôn rôp Jêkônia, kon drŏ-nglo Jêhôiakim, pơtao đe Juđa, hăm rôp lu kră pơgơ̆r lăm char Juđa, hơdai hăm lu bơngai thơ̆ hơgei, thơ̆ hơjơ̆m hling đơ̆ng pơlei Jêrusalem chông ba tơ char Babilôn pơm bơnă, Kră Yang tơ'bôh ăn kơ inh đei 'bar tŏ bai plei 'long hơra dan 'bơ̆t anăp hnam Kră Yang.

²Minh pôm bai tah lu plei hơra 'lơ̆ng thoi plei đum blŭng-a lăm bơyan, bai mă minh pôm noh dơ̆ng tah plei hơra kơnê̆ ngăl, ưh pă gơh sa boih.

³Kră Yang jet inh: “Ơ Jêrêmi, ih 'bôh kiơ?” Inh tơl: “Inh 'bôh plei 'long hơra, lu plei hơra 'lơ̆ng, 'lơ̆ng dêh, lu plei kơnê̆, kơnê̆ tơpă, plei kơnê̆ noh đĭ mah pă gơh sa.”

⁴Kră Yang khan kơ inh:

⁵“Kră Yang 'Bok Kei-Dei Isơrael khan: ‘Thoi plei hơra 'lơ̆ng 'nâu mơ̆n Inh gô jô̆ lu bơngai bơnă đơ̆ng dêh char Juđa mă Inh puh lu sư năm tơ char Kalđê.

⁶Inh oei răp lăng wă pơm 'lơ̆ng kơ lu sư, Inh gô chông lu sư wih brŏk tơ char âu, Inh gô tơiung pơdơ̆ng ming păng ưh pă pơrăm lu sư dơ̆ng, Inh wă pơtăm ưh kơ wă buch.

⁷Inh gô ăn kơ lu sư đei jơhngơ̆m băt kơ Inh boih Kră Yang. Lu sư gô jing kon pơlei Inh, Inh boih Kră Yang 'Bok Kei-Dei lu sư, yua kơ lu sư gô đĭ jơhngơ̆m wih brŏk tơ Inh.’ ”

⁸Kră Yang khan: Bĕ lu plei hơra kơnê̆ dêh noh mah pă gơh sa, kư̆m thoi noh mơ̆n Inh gô pơm kơ Sêđekia pơtao đe Juđa, lu yŏng pơgơ̆r, lu bơngai oei arih đơ̆ng lăm pơlei Jêrusalem mă oei oei lăm char 'nâu, dah oei lăm char Êyiptơ.

⁹Inh gô pơm ăn kơ đĭ-đăng dêh char lăm teh đak lăng 'brơ̆ krưp kơ lu sư. Lăng lu sư đei đe blei hiap, đe pơ'brơh, đe pơjăm pơjuă, tơ jơ̆p lăm dêh char mă Inh đei pơpuh lu sư tơ noh.

¹⁰Inh gô ăn kơ lu sư lôch kơ đao gưm, lôch kơ pơngot rơwĕt, lôch hơbuh, pơrăm pơlôch pơgoh lu sư đơ̆ng lăm teh mă Inh đei ăn kơ lu sư păng lu 'bok yă lu sư sơ̆.”