Read bahnar Je 27 Bible Online

Je 27 - bahnar bible

Je 27

¹Lăm chăl blŭng-a Sêđekia kon drŏ-nglo Jôsia, pơtao đe Juđa pơgơ̆r, đei nơ̆r Kră Yang khan kơ Jêrêmi:

²Kră Yang khan kơ inh thoi âu: “Iŏk tơlei akar păng 'long pơm bĕ 'long ăt, na 'băk tơ ako ih.

³Na, gơih nơ̆r âu ăn kơ lu pơtao char Eđôm, Môap, Ammôn, Tirơ păng pơtao char Siđôn, hơtă 'bơ̆t lu bơngai mă lu năm pơtao wơh tơ pơlei Jêrusalem tơ'bơ̆p Sêđekia, pơtao đe Juđa.

⁴Pơkă athei lu sư năm roi kơ yŏng lu sư khan: “Kră Yang Tih Hloh, 'Bok Kei-Dei Isơrael, khan: Lu iĕm athei khan kơ yŏng iĕm:

⁵Inh boih Tơ'ngla pơjing kơ teh, kon bơngai păng lu kon sem brem kơpal teh đơ̆ng tơdrong mơsêh mơyang păng đơ̆ng ti pran kơtang Inh. Inh ăn teh âu kơ bu mơ̆ng kơ Inh lăp.

⁶Dang ei, Inh jao đĭ-đăng teh đak iĕm lăm ti Nebukatnessar, pơtao Babilôn, đĭch đam Inh; Inh kư̆m ăn đĭ lu sem bri chu kơ sư.

⁷Đĭ-đăng bơngai lăm dêh char gô chu yom kơ sư, kơ kon, kơ sâu sư dĭng truh kơ năr lu dêh char păng lu pơtao tih mơng gô rôp sư pơm đĭch.’ ”

⁸“Tơdah khŭl bơngai ayơ, dêh char ayơ ưh kơ chu bơ̆jang kơ Nebukatnessar, pơtao Babilôn păng ưh kơ wă 'băk 'long ăt pơtao Babilôn tơ ako sư,” Kră Yang 'Bok Kei-Dei khan: “Na Inh gô yua đao gưm, pơngot rơwĕt, jĭ hơbuh, pơmat bơngai noh dĭng mă Inh ăn dêh char noh lăm ti pơtao Nebukatnessar pơrăm.

⁹Bĕ iĕm, iĕm 'nĕ pă mơ̆ng lu bơngai khan lê̆ adrol iĕm, lu pơjâu chă pơma hăm Yang păng pơjâu juăt tơlang tơdrong apo, lu pơjâu chă pơma hăm atâu, lu 'bok lăng tơdra sơnglŏng păng đĭ lu pơjâu hơlĕnh kơ lu iĕm khan: ‘Lu iĕm ưh kơ đei pơm đĭch bơ̆jang kơ pơtao Babilôn ôh.’

¹⁰Lu sư bơtho khan lê̆ adrol hơlĕnh, tơdah lu iĕm lui kơ lu sư đe chông ba lu iĕm ataih đơ̆ng teh đak iĕm, na Inh pơpuh tơlĕch lu iĕm păng lu iĕm gô lôch hiong đĭ.

¹¹Mă-lei adrĕch bơngai ayơ chu 'băk 'long ăt pơtao Babilôn păng chu yom kơ pơtao noh, na: Inh gô ăn kơ lu sư oei kơtă lăm dêh char sư kơdih, wă kơ choh jang sa păng oei tơ noh.” Noh Kră Yang.

¹²Inh kư̆m roi ăn dôm nơ̆r noh kơ Sêđekia pơtao đe Juđa. “Mơ̆t bĕ ako ih lăm 'long ăt pơtao Babilôn, chu kơ sư păng kon pơlei sư, lei na iĕm gơh arih.

¹³Yua kơ kiơ ih păng lu kon pơlei ih lê̆ đe pơlôch iĕm hăm đao gưm, pơngot rơwĕt, lôch hơbuh thoi Kră Yang đei khan kơ dêh char ayơ mă ưh kơ wă chu kiơ̆ kơ pơtao Babilôn?

¹⁴Apinh iĕm 'nĕ kơ mơ̆ng hŏ dôm nơ̆r lu bơngai khan lê̆ adrol khan: ‘Lu iĕm huay kơ chu jang kơ pơtao Babilôn. Noh tơdrong hơlĕnh đĕch mă lu sư khan lê̆ adrol kơ lu iĕm.”

¹⁵Kră Yang khan: “Inh ưh kơ đei wơh lu sư, lu sư yua anăn Inh khan lê̆ adrol hơlĕnh. Tơdah lui kơ lu sư Inh gô pơpuh tơweh lu iĕm păng pơlôch pơđĭ lu iĕm păng lu bơngai khan lê̆ adrol noh.”

¹⁶Inh kư̆m khan kơ lu 'bok soi păng đĭ-đăng kon pơlei âu: “Kră Yang khan: ‘'Nĕ pă mơ̆ng nơ̆r lu bơngai khan lê̆ adrol kơ iĕm khan: Dôm lu tơmam yua lăm hnam Kră Yang ưh pă đunh boih Babilôn gô pơdrâu tơwih tơ âu! Noh lu sư khan lê̆ adrol hơlĕnh kơ lu iĕm.

¹⁷'Nĕ pă mơ̆ng lu đe noh, chu jang bĕ kơ pơtao Babilôn wă kơ iĕm gơh arih. Liơ pơlei tih âu pơchah răm?

¹⁸Dah lu sư bơngai khan lê̆ adrol tơpă păng đei nơ̆r Kră Yang, lei lê̆ lu sư krao khan apinh Kră Yang Tih Hloh, wă kơ tơmam gĭt oei oei lăm hnam Kră Yang, lăm hnam pơtao Juđa păng pơlei tih Jêrusalem, đe huay kơ iŏk ba tơ char Babilôn.

¹⁹Yua kơ Kră Yang Tih Hloh khan trŏ kơ lu jrăng păng kong, bơng đak tih krao dơsĭ kong, păng jơ̆ng hăm kong đei tang-wang wă tŭn lu bơng, păng dôm tơmam gĭt oei đei lăm pơlei,

²⁰lu tơmam mă Nebukatnessar pơtao đe Babilôn ưh kơ tung ba, kơplah sư rôp ba Jêkônia kon drŏ-nglo Jêhôiakim, pơtao đe Juđa, hơdai hăm lu kră pơgơ̆r char Juđa đơ̆ng pơlei tih Jêrusalem, ba tơ char Babilôn pơm bơnă;

²¹Kră Yang Tih Hloh, 'Bok Kei-Dei bơngai Isơrael khan kơ tơmam gĭt oei oei lăm hnam akŭm, lăm hnam pơtao đe Juđa păng pơlei tih Jêrusalem:

²²‘Gô iŏk ba tơ char Babilôn păng 'măn lê̆ tơ noh dĭng truh năr Inh athei lu sư 'ba pơdrâu tơ anih 'nâu.” Noh Kră Yang khan!