Read bahnar Je 29 Bible Online

Je 29 - bahnar bible

Je 29

¹'Nâu nơ̆r Jêrêmi đơ̆ng pơlei Jêrusalem chih gơih kơ lu đe kră mă oei arih, lu đe 'bok soi, lu 'bok khan lê̆ adrol păng đĭ-đăng kon pơlei mă pơtao Nebukatnessar rôp đơ̆ng pơlei Jêrusalem ba tơ char Babilôn pơm bơnă.

²Đơ̆ng rŏng kơ pơtao Jêkônia, mĕ pơtao, lu bơngai jang lăm hnam pơtao, lu kră pơgơ̆r đơ̆ng Juđa păng Jêrusalem, lu thơ̆ hơgei gơh pơm lĕch đơ̆ng pơlei Jêrusalem boih,

³kơthơ noh Jêrêmi hơtă ăn kơ bre Êlasa kon drŏ-nglo Saphan păng Gêmaria kon drŏ-nglo Hilkia mă Sêđekia pơtao đe Juđa wơh bre sư năm tơ char Babilôn tơ'bơ̆p Nebukatnessar pơtao đe Babilôn. Kơthơ noh chih khan:

⁴Kră Yang Tih Hloh, 'Bok Kei-Dei bơngai Isơrael khan kơ lu bơngai mă Inh ăn đe rôp pơm bơnă đơ̆ng pơlei Jêrusalem ba tơ Babilôn:

⁵“Pơm bĕ hnam oei, pơtăm bĕ 'long sa plei lăm mir pơgar, na phĕ sa plei sư.

⁶Iŏk bĕ klo akăn, na pơjing kon drŏ-nglo drŏ-kăn; chă ăn bĕ kơ lu kon tơdăm iĕm akăn, ăn bĕ kơ lu kon adruh iĕm đei klo, wă kơ lu sư pơjing kon hơ'lơ̆p, drŏ-nglo dah drŏ-kăn, wă kơ đei kon sâu rai lơ tơ noh, 'nĕ pă hrŏ hiong.

⁷Chă bĕ tơdrong hiôk-hian jơnap kơ pơlei tih mă Inh đei ăn kơ lu iĕm oei tơ noh pơm bơnă; krao apinh Kră Yang bĕ; yua kơ lu iĕm đei hiôk jơnap noh đơ̆ng pơlei noh hiôk jơnap.”

⁸Kră Yang Tih Hloh, 'Bok Kei-Dei bơngai Isơrael khan: “'Nĕ pă lê̆ lu 'bok khan lê̆ adrol păng lu pơjâu oei hơdai iĕm chă hơlĕnh kơ iĕm; păng kư̆m 'nĕ pă hlŭ mơ̆ng kiơ̆ nơ̆r lu sư apo,

⁹yua kơ lu sư khan lê̆ adrol hơlĕnh hăm anăn Inh. Inh ưh kơ đei wơh lu sư ôh.” Noh Kră Yang khan.

¹⁰Kră Yang khan: “Layơ tôm tơpơh-jĭt sơnăm ăn kơ Babilôn pơgơ̆r, Inh gô năm hơpong tơ lu iĕm, Inh gô pơm trŏ thoi nơ̆r pơkă 'lơ̆ng rŏ Inh, gô chông ba lu iĕm brŏk tơ teh đak âu.”

¹¹Kră Yang khan: “Yua kơ Inh băt tơdrong kiơ Inh pơkă wă pơm kơ lu iĕm. Inh đei pơkă ăn tơdrong hiôk-hian phĭ jơnap ưh kơ trŏ tơdrong kơnê̆ răm ôh, wă kơ lu iĕm đei tơdrong gơnang hơmĕng.

¹²Kơplah lu iĕm năm krao chă Inh, krao apinh Inh, Inh gô tơl tơwih.

¹³Lu iĕm gô chă Inh păng gơh tơ'bơ̆p tơdah lu iĕm chă Inh hăm đĭ jơhngơ̆m.”

¹⁴Kră Yang khan: “Inh gô ăn kơ lu iĕm tơ'bơ̆p Inh păng Inh gô iŏk chông anhăk pơdrâu lu iĕm brŏk đơ̆ng pơm bơnă.” Kră Yang khan: “Inh gô akŭm pơđĭ lu iĕm đơ̆ng jơ̆p kơ dêh char, đơ̆ng rim pơlei pơla mă Inh đei puh lu iĕm tơ noh păng gô iŏk anhăk lu iĕm wih brŏk tơ teh đak mă đêl Inh puh iĕm đơ̆ng noh sơ̆.”

¹⁵Lu iĕm khan: “Kră Yang đei ăn boih kơ lu bơ̆n 'bok khan lê̆ adrol tơ char Babilôn!”

¹⁶Kră Yang khan gah pơtao mă oei 'bơ̆t tang-dŏ pơtao Đawit păng lu kon pơlei mă oei lăm pơlei âu, lu bơngai mă huay kơ năm pơm bơnă hơdai lu iĕm,

¹⁷lei, na 'nâu nơ̆r Kră Yang Tih Hloh khan: “Inh gô ăn đao gưm, pơngot rơwĕt păng tơdrong lôch hơbuh truh tơ lu sư, pơm ăn kơ lu sư thoi plei hơra ôm kơnê̆ dĭng mah đe pă gơh sa.

¹⁸Inh gô ăn đao gưm, pơngot rơwĕt păng jĭ hơbuh druh pơrăm lu sư, đe gô puh lê̆ lu sư tơ to tơ âu. Tơ jơ̆p-jang kơ dêh char lăm teh đak âu, lăng krưp, lu sư pŭ hơngiap đe blei hiap, đe che bơle, đe pơjăm pơjuă lu sư tơ rim adrĕch adrung mă Inh đei pơpuh lê̆ lu sư tơ noh.”

¹⁹Kră Yang khan: “Noh yua kơ lu sư kuă kơ mơ̆ng nơ̆r Inh, Inh chơ̆n oei wơh lu bơngai khan lê̆ adrol, lu đĭch đam Inh năm tơbăt ăn kơ lu sư nơ̆r Inh; mă-lei lu iĕm kư̆m kuă kơ mơ̆ng lei-lăi.

²⁰Thoi noh ơ đĭ-đăng lu bơngai bơnă mă Inh đei puh đơ̆ng pơlei Jêrusalem năm tơ char Babilôn, mơ̆ng bĕ nơ̆r Kră Yang.”

²¹'Nâu Kră Yang Tih Hloh, 'Bok Kei-Dei bơngai Isơrael khan thoi âu gah Ahap, kon drŏ-nglo Kôlaia păng Sêđekia, kon drŏ-nglo Maaseia, bơngai mă yua anăn Inh khan lê̆ adrol hơlĕnh: “Inh gô jao lu sư kơ Nebukatnessar, pơtao Babilôn, sư gô pơlôch bre noh 'bơ̆t anăp lu iĕm.

²²Đĭ-đăng bơngai Juđa pơm bơnă lăm char Babilôn gô iŏk yua anăn 'bar 'nu bơngai 'nâu hiap tơhuăi, thoi âu: “Apinh Kră Yang ăn kơ iĕm kư̆m thoi Sêđekia păng Ahap, mă pơtao Babilôn đei phang lăm ŭnh,’

²³yua kơ lu sư đei pơm yoch bơlŭk kơnê̆ boih lăm lu bơngai Isơrael, pơm yoch ngôi pơyô kư̆ kă hăm akăn lu bơngai rông 'bôt sư kơdih păng pơma hơlĕnh mă Inh ưh kơ đei athei lu sư. Inh băt păng pơm kơdranh kơ tơdrong noh. Noh Kră Yang khan.

²⁴Roi tơbăt bĕ kơ Sêmaia bơngai Nêhelam:

²⁵“'Nâu Kră Yang Tih Hloh, 'Bok Kei-Dei bơngai Isơrael khan: ‘Ih đei gơih boih hla bơar kơ đĭ kon pơlei Jêrusalem, kơ 'bok soi Sephania kon drŏ-nglo Maaseia păng kơ đĭ-đăng lu 'bok soi nai khan:

²⁶Kră Yang đei jao ăn kơ ih boih pơm 'bok soi tơplih kơ Jêhôiada wă pơgơ̆r wei-lăng hnam akŭm Kră Yang Ih gơh athei đe rôp hơnuh ako, rôp jơlŏng lê̆ jơ̆ng, tơdah bu mă wơnh khan lê̆ adrol

²⁷Lei liơ ih ưh kơ rôp chrih kơ Jêrêmi pơlei Anathôt, sư oei khan lê̆ adrol, tơ lăm lu iĕm?

²⁸Sư boih, pơ̆n gơih kơ lu nhôn nơ̆r tơ lăm char Babilôn khan: Tơdrong pơm bơnă oei đunh năr; pơm bĕ hnam oei; pơtăm bĕ 'long sa plei lăm mir pơgar na sa plei sư.”

²⁹Sephania 'bok soi đŏk kơthơ noh tơm măt Jêrêmi bơngai khăn lê̆ adrol mơ̆ng.

³⁰Nơ̆r Kră Yang khan kơ Jêrêmi:

³¹“Chih roi bĕ kơ đĭ-đăng kon pơlei oei pơm bơnă: 'Nâu Kră Yang khan gah Sêmaia bơngai Nêhelam: ‘Yua kơ Sêmaia khan lê̆ adrol kơ lu iĕm boih, mă Inh ưh kơ athei sư khan păng sư kư̆m pơm kơ iĕm lui kơ nơ̆r sư hơlĕnh.’

³²Na Kră Yang khan: “Inh gô phak Sêmaia, bơngai Nêhelam păng adrĕch adrung sư hai dơ̆ng. Gah adrĕch sư, ưh kơ đei bu mă oei arih hơdai hăm kon pơlei 'nâu; kơdih akâu sư kư̆m ưh kơ đei 'bôh tơdrong hiôk mă Inh gô ăn kơ kon pơlei Inh, yua kơ sư pơma blơ̆ plơ̆ Inh.’ ” Noh Kră Yang khan.