Read bahnar Je 38 Bible Online

Je 38 - bahnar bible

Je 38

¹Sêphatia, kon drŏ-nglo Mattan, Gêđalia, kon drŏ-nglo Pashur, Jêhukal kon drŏ-nglo Sêlemia păng Pashur kon drŏ-nglo Malkija kơtơ̆ng nơ̆r Jêrêmi bơtho kơ đĭ-đăng kon pơlei.

²“'Nâu Kră Yang khan: ‘Bơngai bu oei lăm pơlei âu gô lôch kơ đao gưm, pơngot rơwĕt dah lôch hơbuh. Mă-lei bơngai bu lĕch yơ̆r ti kơ lu bơngai Kalđê gô arih, sư gô pơklaih tơdrong arih sư.’ ”

³Păng 'nâu Kră Yang khan: “Pơlei tih âu gô pơjao tơ lăm ti lu linh pơtao Babilôn lu sư gô blah iŏk.”

⁴Lu yŏng pơgơ̆r khan kơ pơtao: “Pơlôch bĕ bơngai 'nâu, yua kơ sư pơma thoi noh, pơm ăn kơ đon lu linh mă oei oei lăm pơlei âu păng pơm kơ jơhngơ̆m kon pơlei rơdu. Bơngai âu ưh kơ chă trong wă pơklaih kon pơlei ôh, mă-lei chă trong wă pơrăm.”

⁵Pơtao Sêđekia khan: “Âu, inh jao sư kơ iĕm; inh pơtao ưh kơ gơh găn lu iĕm ôh.”

⁶Lei lu sư rôp Jêrêmi tah lê̆ lăm sơlŭng đak Malkija kon drŏ-nglo pơtao, sơlŭng 'nâu lăm anih cham linh gak, lu sư tơjur Jêrêmi hăm tơlei giĕn, sơlŭng âu ưh pă đei đak boih, oei đei hlŭt đĕch, na Jêrêmi đom jrŭ lăm hlŭt noh.

⁷Êbet Mêlek bơngai Êthiôpi, sư khŭl linh bơngai jang oei wei lăm hnam pơtao kơtơ̆ng khan đe tah lê̆ Jêrêmi lăm sơlŭng đak, kơplah noh pơtao oei ngôi 'bơ̆t 'Măng Jang Bênjamin.

⁸Êbet Mêlek lĕch đơ̆ng lăm hnam pơtao, năm khan kơ pơtao.

⁹“Ơ yŏng tơ'ngla pơtao inh. Lu đe noh pơm kơ Jêrêmi bơngai khan lê̆ adrol kơnê̆ dêh, tah lê̆ sư lăm sơlŭng. Sư gô lôch pơngot tơ noh, mưh tơmam sa lăm pơlei âu ưh pă đei boih.”

¹⁰Pơtao athei Êbet Mêlek bơngai Êthiôpi: “Chă bĕ pêng-jĭt 'nu bơngai drŏ-nglo đơ̆ng âu năm hơdai ih năm dui hơtŏk Jêrêmi bơngai khan lê̆ adrol đơ̆ng lăm sơlŭng đak, adrol kơ sư lôch.”

¹¹Na Êbet Mêlek chông bơngai năm hơdai sư truh tơ anih đe tah che hơbĕn ao hiah, sư iŏk che păng ao so tơjur hăm tơlei ăn kơ Jêrêmi lăm sơlŭng.

¹²Êbet Mêlek bơngai Êthiôpi, khan kơ Jêrêmi: “Iŏk che hiah hăm ao so noh pôn tơlei giĕn na dan ala pŏk-ak ih.” Jêrêmi pơm thoi noh.

¹³Na lu sư dui hơtŏk Jêrêmi đơ̆ng lăm sơlŭng; na Jêrêmi oei chĭt lăm cham anih lu linh gak.

¹⁴Pơtao Sêđekia athei đe năm krao Jêrêmi păng chông ba sư mơ̆t trong 'măng mă pêng mơ̆t tơ hnam Kră Yang. Pơtao khan kơ Jêrêmi: “Inh đei minh tơdrong wă jet ih; 'nĕ ôn kơ inh.”

¹⁵Jêrêmi khan kơ pơtao Sêđekia. “Tơdah inh roi kơ ih tơpăt ih gô pơlôch inh tơpă? Tơdah inh chă pơđâu hăm ih, ih kuă kơ mơ̆ng mơ̆n.”

¹⁶Mă-lei pơtao Sêđekia pơkă hlơp hơdrô̆ hăm Jêrêmi: “Sĭt tơpă thoi Kră Yang arih, Tơ'ngla pơjing boih tơdrong arih lu bơ̆n, inh pơkă, inh ưh kơ pơlôch ih ôh, inh kư̆m ưh kơ pơjao ih kơ lu bơngai 'maih wă pơlôch ih!”

¹⁷Jêrêmi tơl pơtao: “'Nâu Kră Yang 'Bok Kei-Dei bơngai Isơrael khan: ‘Tơdah ih lĕch yơ̆r ti kơ lu bơngai pơgơ̆r Babilôn lei ih gô arih păng pơlei tih âu đe huay kơ soh pơrăm; ih păng hnam ih gô arih.

¹⁸Mă-lei dah ih ưh kơ lĕch yơ̆r ti kơ lu bơngai pơgơ̆r Babilôn, lei pơlei tih âu lu bơngai Kalđê gô soh păng ih kư̆m ưh kơ gơh klaih đơ̆ng ti lu sư.

¹⁹Pơtao Sêđekia khan kơ Jêrêmi. Inh hli kơ bơngai Juđa mơ̆t bơngai Kalđê boih, na gô jao inh tơ lăm ti lu sư, pơm kơnê̆ kơ inh.’ ”

²⁰Jêrêmi khan: Đe ưh kơ pơjao ih kơ lu sư ôh. Apinh ih mơ̆ng kiơ̆ bĕ nơ̆r Kră Yang, mă inh đei roi kơ ih, wă kơ ih đei pŭn hiôk păng arih.

²¹Mă-lei tơdah ih sơngah kuă kơ mơ̆t kiơ̆ ôh lu bơngai Kalđê, lei 'nâu boih tơdrong Kră Yang tơ'bôh kơ inh.

²²Đĭ-đăng lu bơngai drŏ-kăn oei oei lăm hnam pơtao Juđa đe gô ba lu sư ăn kơ bơngai pơgơ̆r linh pơtao Babilôn; lu bơngai drŏ-kăn noh gô khan yak rah pơma rah: ‘Dôm lu buăl juăt pơtao pơhlŭ pơtao jei boih; jơ̆ng ih đom lăm hlŭt boih, lu buăl ih kơdŭn achăng lê̆ ih.’

²³Đĭ lu akăn tơm akăn kơnhŏng lu kon ih đe gô chông anhăk pơjao lu sư tơ bơngai Kalđê. Ih kư̆m ưh kơ gơh klaih đơ̆ng ti lu sư, đe gô jao ih kơ pơtao Babilôn na pơlei tih âu đe gô soh pơrăm.”

²⁴Sêđekia khan kơ Jêrêmi: “Ih 'nĕ ăn bu băt dôm nơ̆r 'nâu, lei ih huay kơ lôch.

²⁵Tơdah lu yŏng pơgơ̆r kơtơ̆ng khan inh đei pơma dơnuh hăm ih na jet: ‘Roi ăn kơ nhôn ih pơma dơnuh hăm pơtao kiơ; păng pơtao đei pơma kiơ hăm ih; 'nĕ ôn kơ lu nhôn, lei lu nhôn huay kơ pơlôch ih.’

²⁶Lei ih tơl bĕ lu sư: ‘Inh đei apinh pơtao, khan 'nĕ pă ba inh tơ hnam Jônathan, kơnh hli kơ inh lôch tơ noh.’ ”

²⁷Wă đĭ-đăng lu yŏng pơgơ̆r năm chă apinh jet Jêrêmi, na sư roi ăn kơ đe noh thoi pơtao đei pơkă kơ sư, lu sư pă jet dơ̆ng yua kơ ưh kơ đei bu kơtơ̆ng nơ̆r pơma noh.

²⁸Jêrêmi đe chĭt lăm cham anih lu linh gak dĭng truh tơ năr đe blah iŏk pơlei Jêrusalem.