Read bahnar Je 40 Bible Online

Je 40 - bahnar bible

Je 40

¹Nơ̆r Kră Yang khan kơ Jêrêmi, đơ̆ng rŏng kơ Nebusaradan yŏng lu linh gak pơtao tơlĕch sư tơ pơlei Rama; kơplah noh, Jêrêmi đe oei chô̆ sư păng glang hơdai hăm lu kon pơlei đơ̆ng Jêrusalem păng char Juđa, rok trong đe chông ba năm tơ char Babilôn.

²Yŏng lu linh gak 'bôh păng chông Jêrêmi trong pha păng khan: “Kră Yang 'Bok Kei-Dei ih đei khan boih wă pơrăm anih 'nâu.

³Na Kră Yang pơm tơpă thoi sư đei khan boih, yua kơ lu iĕm pơm yoch sơngah kơ Kră Yang păng kuă kơ kiơ̆ nơ̆r Sư. Lei na tơdrong 'nâu truh tơ lu iĕm.

⁴Dang ei inh plôh lê̆ glang đơ̆ng ti ih, tơdah ih wă năm hơdai nhôn tơ char Babilôn, năm bĕ inh gô wei-lăng ih. Tơdah ih ưh kơ wă năm tơ char Babilôn ưh kơ đei tơdrong kiơ lei lê̆. Ih lăng tơ dêh char âu oei 'bơ̆t anăp ih. Ih rơngei boih wă năm tơ yơ mơ̆ng kơ Ih wă.”

⁵Jêrêmi oei tam mă drơ̆ng Nebusaradan khan dơ̆ng: “Dah ih wă brŏk oei hơdai hăm Gêđalia kon drŏ-nglo Ahikam sâu Saphan bơngai mă pơtao Babilôn pôk sư pơm yŏng lu pơlei lăm dêh char Juđa, oei hơdai bĕ hăm lu kon pơlei, dah wă năm oei tơ yơ, ih kư̆ năm tơ noh.” Đơ̆ng noh 'bok yŏng linh ăn kơ sư tơmam lăng jơ̆ng ti tơmam sa na lê̆ sư yak năm.

⁶Na Jêrêmi sư năm oei hơdai Gêđalia, kon drŏ-nglo Ahikam, tơ pơlei Mispa, oei hơdai hăm lu kon pơlei mă đe oei lê̆ lăm teh đak noh.

⁷Đĭ-đăng lu linh păng lu yŏng linh sư mă oei tơ bri kông kơtơ̆ng 'bok pơtao Babilôn pôk ăn Gêđalia kon drŏ-nglo Ahikam pơm yŏng pơgơ̆r lăm char păng kư̆m kơtơ̆ng pơtao jao ăn kơ sư pơgơ̆r wei-lăng đĭ-đăng lu bơngai drŏ-nglo, lu drŏ-kăn, lu hơ'lơ̆p, lu bơngai dơnuh hloh mă đe oei lê̆ oei lăm char Juđa, ưh kơ chông ba pơm đĭch tơ char Babilôn.

⁸Lu sư năm tơ'bơ̆p Gêđalia tơ pơlei Mispa, đei Ismael kon drŏ-nglo Nethania, Jôhanan păng Jônathan lu kon drŏ-nglo Karea, Sêraia kon drŏ-nglo Tanhumet, lu kon drŏ-nglo Êphai kon pơlei bơngai Nêtophai, Jêsania bơngai Maakat păng đĭ-đăng lu linh năm hơdai sư.

⁹Gêđalia kon drŏ-nglo Ahikam, sâu Saphan, sư pơkă pơkăm pơlung lu sư: “Iĕm 'nĕ kơ hli ôh bơ̆jang bĕ kơ lu bơngai Kalđê. Oei bĕ lăm dêh char âu, na awih awăn ăn kơ pơtao Babilôn. Na lu iĕm gô arih jang sa hiôk-hian.

¹⁰Inh athei oei lăm pơlei Mispa, tang măt kơ lu iĕm chă pơma dơnuh hăm lu bơngai Kalđê dah lu sư truh tơ bơ̆n; gah lu iĕm gơh chă phĕ plei hơmu, plei đum bơyan phang păng plei ôliwơ, na hmĕt đak sư mong lăm ge, na oei bĕ lăm pơlei mă iĕm đei oei boih.”

¹¹Đĭ-đăng bơngai Juđa oei lăm char Môap, Ammôn, lăm char Eđôm păng oei lăm dêh char nai kư̆m kơtơ̆ng pơtao Babilôn kư̆m oei lê̆ kon pơlei oei lăm char Juđa, na pơtao pôk Gêđalia, kon drŏ-nglo Ahikam sâu Saphan, pơm yŏng pơgơ̆r lu sư.

¹²Lu bơngai Juđa 'nâu tơklah tơklang jơ̆p kơ dêh char wih brŏk tơ char Juđa, tơ Gêđalia tơ pơlei Mispa. Na lu sư phĕ mong plei hơmu plei 'long bơyan phang lơ dêh.

¹³Jôhanan kon drŏ-nglo Karea păng đĭ-đăng lu yŏng pơgơ̆r linh mă oei tơ rim pơlei năm tơ'bơ̆p Gêđalia tơ pơlei Mispa,

¹⁴khan kơ sư: “Ih hăm băt Baalis pơtao Ammôn wơh Ismael kon drŏ-nglo Nethania năm pơlôch ih?” Mă-lei Gêđalia, kon drŏ-nglo Ahikam, ưh kơ lui kơ nơ̆r lu sư.

¹⁵Jôhanan kon drŏ-nglo Karea pơma ôn hơdrô̆ hăm Gêđalia tơ pơlei Mispa: “Lê̆ kơ inh năm pơlôch Ismael kon Nethania, ưh kơ đei bu băt ôh tơdrong noh. Lê̆ kơ kiơ sư pơlôch ih, na lu bơngai Juđa mă oei hơdai ih gô kơdâu tơklah tơklang. Păng lu bơngai Juđa mă oei lăm char âu kư̆m lôch đĭ.”

¹⁶Mă-lei Gêđalia kon drŏ-nglo Ahikam khan kơ Jôhanan kon drŏ-nglo Karea: “Ih 'nĕ kơ pơm tơdrong noh; tơdrong ih khan gah Ismael noh ưh kơ trŏ ôh.