Read bahnar Je 44 Bible Online

Je 44 - bahnar bible

Je 44

¹'Nâu nơ̆r Kră Yang khan kơ Jêrêmi gah lu bơngai Juđa oei lăm teh đak Êyiptơ, tơ pơlei Mikdôl, pơlei Tahpanhes, pơlei Memphis păng tơring char Patrôs.

²Kră Yang Tih Hloh 'Bok Kei-Dei Isơrael, khan: “Ih 'bôh boih tơdrong răm mă Inh tuh tơ pơlei Jêrusalem păng lu pơlei lăm dêh char Juđa. Lăng to lu pơlei noh dang ei oei jing bri juơ ưh kơ đei bơngai oei,

³yua kơ đơ̆ng tơdrong yoch kon pơlei pơm wă tơblĕk Inh. Lu sư soh nhang păng kơkuh kơ lu rup yang nai, mă lu sư dah ih dah lu 'bok yă iĕm ưh tam băt ôh.

⁴Mă khan lei, Inh kư̆m oei wơh lu đĭch đam Inh, lu bơngai khan lê̆ adrol, năm tơbăt kơ lu sư: ‘'Nĕ kơ pơm tơdrong kơnê̆ mă Inh areh 'nâu.’

⁵Mă-lei lu sư ưh kơ wă mơ̆ng păng kư̆m kuă kơ pơgling đon mơ̆n, ưh kơ wă weh đơ̆ng tơdrong kơnê̆ păng kư̆m oei soh nhang 'bâu phu ăn kơ yang nai.

⁶Thoi noh na Inh tuh boih tơdrong hil mĭl Inh thoi ŭnh khơ̆ng tơ lăm lu pơlei dêh Juđa păng tơ rok trong lăm pơlei Jêrusalem; năr 'nâu lu pơlei noh oei jing bri juơ tơtŭng.”

⁷Dang ei, 'nâu nơ̆r Kră Yang Tih Hloh, 'Bok Kei-Dei Isơrael, khan: “Liơ lu iĕm pơm wă pơrăm chăl arih akâu kơdih, wă tơhiong đĭ-đăng lu drŏ-nglo, drŏ-kăn, hơ'lơ̆p, nge oei mŏm, đơ̆ng lăm dêh Juđa, dĭng mah kon pơlei goh 'biao pă đei bu oei arih?

⁸Liơ lu iĕm tơblĕk inh hăm ti lu iĕm pơm, soh nhang 'bâu phu ăn kơ lu yang nai lăm dêh char Êyiptơ, dêh char mă lu iĕm 'nao năm oei, pŭ iŏk tơdrong pơrăm kơdih akâu, pơm kơ đe che bơle, blei hiap tơ lăm jơ̆p-jang adrĕch adrung lăm teh đak?

⁹Lu iĕm đĭ hiơt boih hă tơdrong yoch kơnê̆ lu 'bok yă iĕm, tơdrong kơnê̆ lu pơtao Juđa păng tơdrong kơnê̆ lu akăn lu sư, tơdrong yoch kơnê̆ lu iĕm păng akăn lu iĕm đei pơm lăm dêh Juđa păng tơ rok trong lăm pơlei Jêrusalem?

¹⁰Dĭng truh tơ năr 'nâu lu sư ưh kơ wă chu tơbral, ưh kơ hli yom, ưh kơ wă arih kiơ̆ khôi juăt păng tơdrong juăt Inh mă đei ăn boih kơ lu iĕm hăm lu 'bok yă lu iĕm.”

¹¹Thoi noh 'nâu Kră Yang Tih Hloh 'Bok Kei-Dei Isơrael, khan: “'Nâu Inh gô ăn tơdrong răm truh păng pơlôch pơrăm đĭ lu iĕm bơngai Juđa.

¹²Inh gô pơrăm lu kon pơlei bơngai Juđa oei oei, mă năm boih tơ char Êyiptơ păng oei tơ noh; lu sư gô lôch đĭ tơ noh lu sư gô lôch kơ đao gưm pơngot rơwĕt tih, lăm dêh Êyiptơ. Lu pơm tih pơm iĕ gô lôch đĭ kơ đao gưm pơngot rơwĕt; pơm kơ đe blei hiap, che bơle hiĕk achơ̆, đe lăng 'brơ̆ krưp.

¹³Inh gô phak lu bơngai mă oei tơ lăm dêh char Êyiptơ, kư̆m thoi Inh đei phak pơlei Jêrusalem hăm đao gưm, pơngot rơwĕt lôch hơbuh pă đei minh 'nu,

¹⁴lăm lu bơngai Juđa oei arih mă năm oei tơ dêh char Êyiptơ ưh gơh klaih gơh hlot, wă brŏk wih dơ̆ng tơ char Juđa, anih mă lu sư hơpơi 'maih wih brŏk oei. Lu sư ưh kơ gơh wih brŏk, lăp lu kơdâu klĕnh đĕch klaih klăi.”

¹⁵Lei na đĭ-đăng lu drŏ-nglo băt boih kơ akăn lu sư soh nhang 'bâu phu ăn kơ yang nai, đĭ-đăng lu drŏ-kăn oei tơ noh akŭm băl minh tơpôl lơ păng đĭ lu bơngai mă oei lăm dêh char Êyiptơ, tơring char Patrôs, tơl nơ̆r Jêrêmi khan:

¹⁶“Gah tơdrong ih yua anăn Kră Yang khan kơ lu nhôn, lu nhôn ưh kơ wă mơ̆ng ôh.

¹⁷Mă-lei lu nhôn gô pơm keh dôm nơ̆r lu nhôn pơkă boih, lu nhôn gô soh nhang 'bâu phu kơ Pơtao Drŏ-kăn kơpal Plĕnh păng tuh sik pơyơ̆r ăn kơ sư, thoi lu nhôn đei pơm boih, lu 'bok yă lu nhôn, lu pơtao nhôn, lu yŏng pơgơ̆r lu nhôn lăm lu pơlei lăm dêh char Juđa păng tơ rok trong lăm pơlei tih Jêrusalem; kơplah noh lu nhôn đei tơmam sa phĭ rơkah rơkai, jang sa hiôk-hian ưh kơ đei tơdrong kiơ truh.

¹⁸Mă-lei đơ̆ng năr lu nhôn ưh pă soh nhang 'bâu phu ăn kơ Pơtao Drŏ-kăn kơpal plĕnh păng tuh pơyơ̆r sik ăn kơ sư, lu nhôn kơ'bah kơ'bôch tôm tơdrong, rai lôch răm kơ đao gưm pơngot rơwĕt!”

¹⁹Lu drŏ-kăn khan: “Kơplah lu nhôn soh nhang 'bâu phu kơ pơtao Drŏ-kăn kơpal plĕnh tuh pơyơ̆r sik ăn kơ sư, lei na klo lu nhôn ưh kơ lăp ôh hă, lei liơ lu nhôn pơ̆n man 'bĕng pơtŏ pơm thoi rup yang pơtao Drŏ-kăn kơpal plĕnh na pơyơ̆r sik tơmam huch ăn kơ yang pơtao Drŏ-kăn tơ plĕnh?”

²⁰Jêrêmi khan kơ đĭ-đăng kon pơlei, drŏ-nglo păng drŏ-kăn, lu bơngai mă 'nao tơl sư thoi kơpal noh hei:

²¹“Tơdrong lu iĕm, 'bok yă iĕm, lu pơtao, lu 'bok yŏng pơgơ̆r iĕm păng kon pơlei lăm deh char, soh boih nhang 'bâu phu lăm rim pơlei char Juđa păng tơ rok trong pơlei Jêrusalem, Kră Yang ưh kơ 'blŏk ưh kơ tơchĕng hă?

²²Kră Yang ưh kơ kĕ ĕnh boih tơdrong kơnê̆ lu iĕm, tơdrong 'mê̆ krưp lu iĕm pơm, na teh đak lu iĕm jing juơ, pŭ hơngiap, blei hiap, ưh kơ đei bu oei truh tơ năr 'nâu.

²³Noh yua kơ đơ̆ng lu iĕm soh nhang kơ yang nai, pơm kơnê̆ blah Kră Yang, yua kơ đơ̆ng lu iĕm ưh kơ wă mơ̆ng kiơ̆ nơ̆r Kră Yang, ưh kơ kiơ̆ khôi juăt, tơdrong juăt păng ưh kơ wă chu kiơ̆ nơ̆r Sư bơtho khan, lei na đei tơdrong gleh truh kơ lu iĕm, thoi năr 'nâu.”

²⁴Jêrêmi khan dơ̆ng kơ kon pơlei kư̆m đei lu bơngai drŏ-kăn: “Ơ đĭ-đăng lu bơngai Juđa hrei âu oei lăm dêh char Êyiptơ, mơ̆ng bĕ nơ̆r Kră Yang.

²⁵'Nâu Kră Yang Tih Hloh, 'Bok Kei-Dei Isơrael, khan: Lu iĕm păng akăn lu iĕm đei pơm tơpă kiơ̆ thoi 'bơ̆r iĕm khan: ‘Wă pơm pơkeh dôm tơdrong mă đêl pơkă boih: Soh nhang păng pơyơ̆r sik ăn kơ yang Drŏ-kăn pơtao kơpal plĕnh.’ Lei pơm pơkeh bĕ dôm nơ̆r mă lu iĕm pơkă. Wei mă 'blep bĕ đêl nơ̆r iĕm pơkă.

²⁶Mă-lei, ơ đĭ-đăng bơngai Juđa hrei âu oei oei lăm dêh char Êyiptơ, mơ̆ng bĕ nơ̆r Kră Yang, khan: ‘'Nâu Inh yua anăn mơsêh tih Inh na pơkă, lăm dêh char Êyiptơ gô ưh pă đei minh 'nu bơngai Juđa ayơ mă gơh ha 'bơ̆r krao apinh anăn Inh dơ̆ng: Sĭt tơpă thoi Kră Yang arih!’

²⁷'Nâu, dang ei Inh răp lăng, wă ăn tơdrong pơmat truh tơ lu sư, ưh kơ trŏ ăn tơdrong pŭn hiôk ôh; đĭ lu bơngai Juđa mă oei lăm dêh char Êyiptơ gô lôch kơ đao gưm pơngot rơwĕt.

²⁸Gô đei lăp tŏ sĕt bơngai đĕch gơh klaih kơ đao gưm, đơ̆ng dêh char Êyiptơ wih brŏk tơ teh đak Juđa. Kơplah noh đĭ-đăng lu bơngai Juđa mă oei oei mă jur năm oei tơ dêh char Êyiptơ, gô băt nơ̆r pơma bu sĭt, nơ̆r Inh dah nơ̆r lu sư.”

²⁹Kră Yang khan: “'Nâu boih tơdra Inh wă phak iĕm lăm anih 'nâu, wă kơ lu iĕm băt Inh sĭt tơpă gô ăn tơdrong răm truh tơ lu iĕm.”

³⁰Kră Yang khan: “Inh gô jao Pharaôn Hôphra, pơtao đe Êyiptơ, lăm ti lu bơngai ayăt kơ sư păng lu bơngai chă wă pơlôch sư, thoi Inh đei jao boih Sêđekia, pơtao đe Juđa, lăm ti Nebukatnessar pơtao Babilôn, bơngai mă ayăt kơ sư păng wă pơlôch sư.”