Read bahnar Nhom 1 Bible Online

Nhom 1 - bahnar bible

Nhom 1

¹Ơu, pơlei tih âu sơ̆ đei lơ kon pơlei dêh, to dang ei ngôi hơdrô̆! Sơ̆ pơm tih kơ lu kon pơlei, 'nâu dang ei thoi yă adro! Sơ̆ lu drŏ-kăn jing yŏng tơ'ngla kơ lu tơring, dang ei jing đĭch đam!

²Sư nhơ̆m ơh ol kơmăng, đak măt lĕch 'bĕnh kơ tơ'bŏk. Dôm lu bơngai mă 'mêm kơ sư, ưh kơ đei bu pơlung sư. Buôl buăl sư pơm tơwih kơ sư, tă kơ jing ayăt ngăl.

³Juđa năm pơm bơnă, chu iŏk pơmat kư̆m chu đe wơh pơđep. Chă oei sa tơ kon pơlei ưh pă đei pơdơh ngôi. Lu bơngai mă pơm kơnê̆ druh sư, tam tơ anih kueng.

⁴Lu trong năm tơ pơlei Siôn bơsĕl, yua kơ ưh kơ đei bu năm ngôi lăm năr giĕng tih. Rim 'măng jang đĭ juơ; lu 'bok soi tơtok tơtăm; Lu adruh hle pơmat-tat, lu sư bơih wă pŭ iŏk pơmat-tat dêh.

⁵Bơngai ayăt kơ sư jing yŏng, bơngai blah sư jing pŭn hiôk; Yua kơ 'Bok Kei-Dei pơmat sư, yua kơ tơdrong yoch sư lơ dêh. Lu kon hơ'lơ̆p sư lu ayăt rôp pơm bơnă.

⁶Kon adruh Siôn hiong đĭ boih dôm tơdrong mă đe ư-ang. Lu kră pơgơ̆r nhen thoi juei chă tơmăn 'nhĕt sa pă đei, Kơdâu pă kĕ đĭ jơhngơ̆m 'bơ̆t anăp lu bơngai druh sư.

⁷Lăm năr pơmat-tat, Jêrusalem 'blŏk kơ đêl sư chơt hiôk; Kơplah kon pơlei sư huŏng lăm ti lu ayăt ưh pă đei bu năm dŏng sư dơ̆ng. Khŭl linh ayăt 'bôh sư thoi noh, na hiĕk ăr kơ sư yua kơ đĭ juơ juŏ!

⁸Jêrusalem pơm yoch tih, yua kơ 'noh na mă jing kơnê̆ 'mê̆ brư̆. Dôm lu bơngai mă juăt kơ pơyom kơ sư dang ei pă đei boih, Yua kơ 'bôh sư hang-hông. Kơdih kâu lu sư tơtok, na kơdŭn tơ rŏng.

⁹Hơbĕn ao lu sư mơgrĭ; sư ưh pă đei tơchĕng boih năr tôch wă truh kơ sư! Tơdrong rơdu sư phara, ưh pă đei bu pơlung sư! Ơ Kră Yang apinh Ih lăng tơdrong pơmat-tat inh, yua kơ lu ayăt pôk pơang lu sư kơdih pơm tih.

¹⁰Lu bơngai ayăt yơ̆r ti boih wă iŏk dôm tơmam 'lơ̆ng sư; Yua kơ lu sư 'bôh boih lu kon pơlei tơmoi năm mơ̆t lăm anih rơgoh sư. Lu kon pơlei tơmoi noh Kră Yang đei khan: Ưh kơ gơh kơ mơ̆t ôh lăm khŭl sư;

¹¹Đĭ kon pơlei chă tơmam sa păng tơtok rah; Tơplih đĭ tơdrong chơt hiôk iŏk tơmam sa, wă kơ chhơp hiôk lăm jơhngơ̆m sư kơdih. Ơ Kră Yang, apinh Ih 'blŏk kơ inh, yua kơ inh jing bơngai pă rơ-a boih;

¹²Ơ lu bơngai chă yak drong găn, bơ̆n hăm pă tơ'bưh hah? Lăng bĕ hăm tơdrong kiơ ơh sơ'ngon; Hli kơ thoi inh đei ơh sơ'ngon. Mă? Kră Yang đei pơm pơmat inh boih; Lăm năr Sư hil.

¹³Sư đei tơjur boih ŭnh đơ̆ng kơpal, mơ̆t lăm tơring inh na kĕ jei. Sư đei dăng boih hơnhuăl ala jơ̆ng inh, pơm kơ inh kơdŭn tơ rŏng. Sư đei pơm boih kơ inh rơdu rơmơ̆n, rim năr rai hiong hiach.

¹⁴'Long ăt tơdrong yoch Sư chô̆ ti inh. Sư dan đĭ hơchô̆ trăp dêh, Sư pơm ăn tơdrong pran kơtang inh hiong đĭ. Kră Yang jao lăm ti lu sư boih, na inh pă kĕ blah dơ̆ng.

¹⁵Lu linh pran kơtang inh, Kră Yang pơrăm lê̆ đĭ boih. Sư akŭm pơpôi lu linh wă pơm kơnê̆ kơ inh, wă pơjuă pơhĕch lê̆ lu kon tơdăm inh, Kră Yang pơjuă gơhlơ̆r lê̆ lu kon adruh Juđa thoi gơ'bang đe hmĕt plei hơmu.

¹⁶Yua kơ thoi noh boih inh nhơ̆m hmoi, na đak măt inh lĕch lơ. Yua kơ lu bơngai râu pơlung jơhngơ̆m inh đĭ ataih boih. Kon sâu inh pơmat-tat, yua kơ jei lu ayăt boih.

¹⁷Siôn yơ̆r ti, mă-lei ưh kơ đei bu pơlung sư; Kră Yang đei roi boih gah Jakôp; Đei lu bơngai cheng sư pơm kơnê̆ hăm sư. Jêrusalem mă lu sư oei noh jing 'mê̆-'mach.

¹⁸Kră Yang jơ̆ tơpăt, yua kơ inh đei pơjah boih hăm nơ̆r Sư. Apinh iĕm mơ̆ng, ơ đĭ-đăng kon pơlei, lăng bĕ tơdrong inh blĕk! Kon adruh păng kon tơdăm inh jing bơnă đe boih.

¹⁹Inh krao pơtơm boih lu bơngai mă 'mêm kơ inh, mă-lei lu sư hơlĕnh kơ inh. Đĭ lu 'bok soi păng lu kră wei-lăng tơ lăm pơlei tih kơtĕch jơhngơ̆m boih. Kơplah lu sư chă tơmam sa wă pơrih bơhngol lu sư kơdih.

²⁰Ơ Kră Yang, lăng bĕ, yua kơ inh tơ'bơ̆p tơdrong gleh truh, Jơhngơ̆m inh chhŭr nuih, plei nuih inh pơpơ̆, Yua kơ inh pơm kơnê̆ dêh. Tơ 'nguaih đei đao gưm pơrăm đe, Tơ lăm hnam đei tơdrong lôch.

²¹Đe kơtơ̆ng nơ̆r inh ôr krao. Mă-lei ưh kơ đei năm pơlung. Lu ayăt kơ inh đei tơdrong pơmat-tat, Băt kơ Ih đei pơm kơ inh na lu sư chơt hiôk, Ăn bĕ năr mă? Ih pơkă noh truh! Wă kơ lu sư kư̆m nhen thoi inh!

²²Ăn kơ tơdrong yoch lu sư gô pơdah 'bơ̆t anăp Ih! Ăn bĕ tơdrong yoch truh 'bơ̆t anăp Ih păng pơm bĕ kơ lu sư thoi Ih đei pơm kơ inh; Yua kơ tơdrong inh pơm yoch, Păng inh ôr krao dêh boih, na jơhngơ̆m inh đê̆ rơdu rơmơ̆n.