Read bahnar Ese 13 Bible Online

Ese 13 - bahnar bible

Ese 13

¹Đei nơ̆r Kră Yang khan kơ inh:

²“Ơ kon bơngai, khan lê̆ adrol bĕ wă kơ plơ̆ ayăt kơ lu 'bok khan lê̆ adrol bơngai Isơrael mă oei khan lê̆ adrol kiơ̆ kơ lu sư tơchĕng kơdih. Khan kơ lu sư: ‘Athei mơ̆ng bĕ nơ̆r Kră Yang!

³Kră Yang Tih Hloh khan: Răm-'băm kơ lu bơngai khan lê̆ adrol kơwao kiơ̆ kơ jơhngơ̆m kơdih, ưh kơ đei 'bôh yă kiơ?

⁴Ơ bơngai Isơrael, lu 'bok khan lê̆ adrol iĕm ưh kơ yua kơ kiơ nhen thoi mơja oei lăm anih pơchah pơchek.

⁵Lu iĕm ưh kơ đei năm tơ anih dur pơlei đe pơrăm pơchah hĕch wă hơmet ăn kơ adrĕch Isơrael, wă kơ oei dơ̆ng kơjăp lăm tơdrong tơblah lăm năr Kră Yang.

⁶Lu sư 'bôh tơdrong tơ'bôh hơlĕnh păng pơm pơjâu tơwir ưh kơ trŏ; lu sư khan Kră Yang khan thoi âu, mă-lei Kră Yang ưh kơ đei wơh lu sư; na lu sư hơpơi wă kơ nơ̆r lu sư khan noh gô đei sĭt.

⁷Hăm trŏ kơ iĕm tơ'bôh boih tơdrong hơlĕnh păng pơm pơjâu, tơwir khan ưh kơ trŏ, na iĕm khan: “Kră Yang khan,” mă tơpă Inh ưh kơ đei pơma khan ôh.

⁸Thoi noh na Kră Yang Tih Hloh khan: Yua kơ lu iĕm pơma hơlĕnh, 'bôh tơdrong ưh kơ trŏ, âu Inh blah plơ̆ lu iĕm, Kră Yang Tih Hloh khan thoi noh.

⁹Ti Inh gô tơblah plơ̆ kơ lu bơngai khan lê̆ adrol 'bôh tơdrong tơ'bôh hơlĕnh, pơm pơjâu ưh kơ trŏ. Lu sư ưh pă oei lăm kon pơlei Inh dơ̆ng, lu sư ưh pă đei anăn lăm sơ̆p hla bơar adrĕch Isơrael; păng ưh kơ gơh mơ̆t tơ lăm teh đak Isơrael; lu sư gô băt Inh boih Kră Yang tih hloh.

¹⁰Lu sư hơlĕnh pơm kơ kon pơlei Inh wơ̆l jrok hăm nơ̆r sư khan, “Hiôk-hian,” mă-lei ưh kơ đei hiôk-hian. To, kon pơlei Inh man dur ưh kơ kơjăp, âu lu sư hơlĕnh bah hăm chŭr kok.

¹¹Na khan bĕ kơ lu bơngai bah chŭr tơ dur, dur noh gô hơlih. 'Mi tih gô lơ̆p, 'mi prĕl gô jur; păng kial hơbŭt gô truh.

¹²Mưh dur hơlih, đe ưh kơ jet lu iĕm hă: “Tơ yơ chŭr mă lu iĕm bah tơ dur noh?”

¹³Na Kră Yang Tih Hloh khan: “Lăm tơdrong Inh hil Inh gô ăn kial hơbŭt truh, lăm tơdrong Inh mĭl Inh gô ăn 'mi tih đak lơ̆p păng 'mi prĕl gô pơrăm.

¹⁴Inh gô pơrăm dur mă lu iĕm bah chŭr, dur gô hơlih păk tơ teh, jơ̆ng sư prưk tơ 'nguaih mưh dur păk hơlih, lu iĕm gô lôch răm hơdai lăm noh; na lu iĕm gô băt Inh boih Kră Yang Tih Hloh.

¹⁵Inh gô tuh tơdrong hil mĭl kơ dur păng hil mĭl kơ lu bơngai mă bah chŭr kok. Inh gô khan tơbăt kơ lu iĕm: ‘Dur pă đei boih, mă bơngai bah chŭr kư̆m lei-lăi.

¹⁶Noh lu 'bok khan lê̆ adrol Isơrael đei khan lê̆ adrol kơ pơlei Jêrusalem 'bôh tơdrong tơ'bôh hiôk-hian, mă ưh kơ đei hiôk-hian kiơ, Kră Yang Tih Hloh đei khan thoi noh.’ ”

¹⁷Bĭ ih, ơ kon bơngai, tơwih muh măt blah plơ̆ lu kon drŏ-kăn pơlei iĕm, khan lê̆ adrol bĕ blah lu sư. Lu sư khan lê̆ adrol kiơ̆ kơ jơhngơ̆m đon kơdih.

¹⁸Na khan kơ lu sư: ‘'Nâu nơ̆r Kră Yang Tih Hloh khan: Răm-'băm kơ lu drŏ-kăn mă kơ̆t che tơwir rơhưch tơ ti păng pơm khăn che tôm tĕch să iĕ gom tơ kơ̆l đe wă chă rôp bơhngol. Lu iĕm wă chă rôp bơhngol kon pơlei Inh, mă-lei wă rong bơhngol iĕm hiôk hă?

¹⁹Lu iĕm pơm pơ'mê̆ kơ Inh lăm lu kon pơlei Inh, wă kơ đei minh chup 'ba tơ'bâu păng minh tơpei 'bĕng, pơma hơlĕnh kơ kon pơlei Inh, lu sư mơ̆ng kiơ̆ nơ̆r hơlĕnh lu iĕm, na pơlôch bơngai mă ưh kơ trŏ kơ lôch, păng rong bơngai mă ưh kơ trŏ wă rong arih.

²⁰Thoi noh na 'nâu nơ̆r Kră Yang Tih Hloh khan: Inh blah plơ̆ lu bơngai chă tơwir hơlĕnh wă chă lua rôp bơhngol bơngai nhen thoi chă lua rôp sem; Inh gô hek lê̆ che tơwir đơ̆ng ti lu iĕm, păng plôh achăng lê̆ bơhngol mă lu iĕm đei rôp thoi sem.

²¹Inh gô iŏk hek lê̆ che gom lu iĕm, na pơklaih kon pơlei Inh đơ̆ng tơpang ti lu iĕm, lu sư ưh pă jing tơmam lăm tơpang ti lu iĕm, chă lua rôp dơ̆ng, na lu iĕm gô băt Inh boih Kră Yang.

²²Yua kơ lu iĕm iŏk tơdrong hơlĕnh pơm kơ lu bơngai tơpăt rơdu sơ'ngon mă Inh tam pơm kơ lu sư rơdu sơ'ngon ôh, păng yua kơ lu iĕm pơhlŭ lu bơngai kơnê̆ wă kơ lu sư ưh kơ tơbral lê̆ trong kơnê̆, na gơh đei arih,

²³yua kơ tơdrong noh, lu iĕm gô ưh pă đei 'bôh tơdrong tơ'bôh hơlĕnh, păng ưh pă tơwir dơ̆ng. Inh gô pơklaih kon pơlei Inh rơngei đơ̆ng ti lu iĕm, na lu iĕm gô băt Inh boih Kră Yang.’ ”