Read bahnar Ese 14 Bible Online

Ese 14 - bahnar bible

Ese 14

¹Đei lu kră pơlei Isơrael truh tơ inh, hơ-oei 'bơ̆t anăp inh:

²Na đei nơ̆r Kră Yang khan kơ inh:

³“Ơ kon bơngai, lu bơngai âu 'măn boih rup yang lăm jơhngơ̆m lu sư păng dan tơdrong yoch 'bơ̆t anăp muh măt wă pơm kơ lu sư kơtơih. Inh wă lê̆ kơ lu sư krao apinh Inh ưh?

⁴Na ih athei khan tơbăt kơ lu sư: ‘'Nâu nơ̆r Kră Yang Tih Hloh khan: “Bơngai bu lăm adrĕch Isơrael 'măn rup yang lăm jơhngơ̆m sư, păng dan tơdrong yoch wă pơm kơ kơtơih pơ̆k 'bơ̆t anăp muh măt lu sư, na năm tơ'bơ̆p bơngai khan lê̆ adrol, Inh boih Kră Yang gô tơl tơwih kơ lu sư trŏ thoi lơ rup yang lu sư.

⁵Inh pơm thoi noh wă kơ Inh iŏk dơ̆ng jơhngơ̆m Isơrael, lu bơngai mă yua kơ đơ̆ng rup yang na weh tơklah đơ̆ng Inh.

⁶Thoi noh, khan bĕ kơ adrĕch Isơrael: ‘'Nâu nơ̆r Kră Yang Tih Hloh khan: Wih brŏk tơbral bĕ! Lê̆ rup yang lu iĕm, tơbral weh đơ̆ng dôm tơdrong kơnê̆ krưp 'bơ̆t anăp lu iĕm.

⁷Khan kơ đĭ-đăng lu bơngai lăm adrĕch Isơrael păng đĭ-đăng tơmoi mă oei lăm Isơrael: Bơngai bu mă weh ataih đơ̆ng Inh, mă oei 'măn rup yang lăm jơhngơ̆m păng dan 'bơ̆t anăp lu sư tơdrong kơnê̆ yoch, wă pơm kơ đe kơtơih pơ̆k, na năm tơ'bơ̆p bơngai khan lê̆ adrol wă krao apinh Inh, Inh boih Kră Yang gô tơl tơwih kơ sư.

⁸Inh gô blah plơ̆ bơngai noh, wă pơm kơ sư jing tơdra, minh tơdrong wă kơ đe đei nơ̆r hơmoch. Inh gô pơpuh lê̆ lu sư đơ̆ng kon pơlei Inh. Na lu iĕm gô băt Inh boih Kră Yang.

⁹“Tơdah đe pơhlŭ bơngai khan lê̆ adrol na sư khan lê̆ adrol pơma minh nơ̆r ayơ noh, Inh boih Kră Yang lê̆ kơ đe pơhlŭ bơngai khan lê̆ adrol noh, păng Inh gô yơ̆r ti pơm plơ̆ kơ sư păng pơlôch pơrăm lê̆ sư đơ̆ng lăm kon pơlei Isơrael Inh.

¹⁰Lu sư mă pơhlŭ bơngai khan lê̆ adrol gô pŭ tơdrong phak lu sư kơdih; Inh phak bơngai khan lê̆ adrol lei-lăi kơ phak bơngai pơhlŭ.

¹¹Thoi noh adrĕch Isơrael huay pă jrok weh ataih đơ̆ng Inh păng huay pă pơm kơnê̆ 'mê̆-'mach kơdih hăm lơ tơdrong glăi nai dơ̆ng, na lu sư jing kon pơlei pơla Inh, păng Inh jing Kră Yang 'Bok Kei-Dei lu sư, Kră Yang Tih Hloh khan thoi noh.’”

¹²Đei nơ̆r Kră Yang khan kơ inh.

¹³“Ơ kon bơngai dah char ayơ pơm yoch hăm Inh, ưh kơ tơnăp tơnen hăm Inh, Inh yơ̆r ti phak lu sư pơrăm lê̆ hnam mong tơmam lu sư, ăn tơdrong pơngot rơwĕt truh păng pơlôch đĭ bơngai hăm sem dơrong lu sư.

¹⁴Dah mă đei pêng 'nu drŏ-nglo âu: Nôê, Đaniel, hăm Jop oei lăm char ei, lei lăp lu sư đĕch gơh klaih oei arih, yua kơ tơdrong tơpăt lu sư kơdih. Kră Yang Tih Hloh khan thoi noh.

¹⁵Dah Inh ăn lu sem bri năm pơrăm char noh, pơlôch lu bơngai; păng char noh jing juơ, ưh pă đei bu yak rok noh dơ̆ng, yua kơ lu sem bri oei tơ noh.

¹⁶Kră Yang Tih Hloh khan, tơpă thoi Inh mă arih ling-lang, mă khan đei pêng 'nu drŏ-nglo noh oei lăm char noh, lu sư ưh kơ gơh pơklaih kon drŏ-nglo dah kon drŏ-kăn, lăp gơh pơklaih kơdih akâu lu sư đĕch; char noh jing bri juơ tơtŭng.

¹⁷Dah mă Inh ăn đei tơdrong tơblah hăm char noh păng khan: ‘Athei ăn kơ đe iŏk đao hơlă tơblah lăm char’ păng pơlôch pơrăm đĭ kon bơngai păng lu sem dơrong,

¹⁸Kră Yang Tih Hloh khan tơpă thoi Inh mă arih ling-lang, mă khan đei pêng 'nu drŏ-nglo noh oei lăm char noh, lu sư ưh kơ gơh pơklaih kon drŏ-nglo dah kon drŏ-kăn lu sư ôh, lu sư lăp gơh pơklaih kơdih akâu sư đĕch.

¹⁹Dah Inh ăn tơdrong lôch hơbuh truh lăm char noh, Inh tuh tơdrong hil hăm pham lĕch, wă pơlôch pơrăm đĭ bơngai hăm lu sem dơrong,

²⁰Kră Yang Tih Hloh khan, tơpă thoi mă Inh arih ling-lang, mă khan đei Nôê, Đaniel hăm Jop oei lăm char noh, lu sư kư̆m ưh kơ gơh pơklaih kon drŏ-nglo dah kon drŏ-kăn lu sư ôh, lu sư lăp gơh pơklaih kơdih akâu sư đĕch yua kơ tơdrong tơpăt lu sư kơdih.

²¹Kră Yang Tih Hloh khan thoi âu: “Rai krưp kơnê̆ hloh dơ̆ng mưh Inh ăn puăn tơdrong sek tơlang trăp; tơdrong đao hơlă tơblah, tơdrong pơngot rơwĕt, tơdrong sem bri pơrăm păng tơdrong lôch hơbuh truh tơ Jêrusalem wă pơlôch đĭ bơngai păng sem dơrong.

²²Mă-lei đei lu bơngai mơ'nah klaih oei arih, lu kon drŏ-nglo hăm kon drŏ-kăn lu sư mă Inh gô chông lĕch đơ̆ng noh. Lu sư gô năm tơ ih; ih gô 'bôh tôm tơdrong lu sư pơm păng tơdrong arih sa lu sư, na ih gô hiôk, đei tơdrong pơlung yua kơ tơdrong truh mă Inh ăn tơ Jêrusalem, tôm tơdrong Inh đei ăn kơ char noh.

²³Lu sư gô pơlung ih, ih gô 'bôh tôm tơdrong arih sa lu sư, ih gô băt tôm tơdrong Inh hlôi pơm hăm lu sư ưh kơ sĭ tơdrong kơđei ôh mă Inh đei pơm boih hăm lu sư. Kră Yang Tih Hloh khan thoi noh.”