Read bahnar Ese 15 Bible Online

Ese 15 - bahnar bible

Ese 15

¹Đei nơ̆r Kră Yang khan kơ inh:

²“Ơ kon bơngai, 'long hơmu sư hăm yua hloh kơ lu dơng tơ'bla 'long nai tơ lăm bri ưh?

³Đe hăm gơh yua 'long noh wă pơm kiơ? Hăm wă gơh yua pơm 'long hơtol tơ'băk tơmam?

⁴Tơdah đe iŏk klơ̆m lăm ŭnh pơm 'long ŭnh, dah ŭnh sa 'bar pah tơm kơnhŏng, tŏk-bŏk sư jing ngar, hăm gơh yua pơm kiơ dơ̆ng?

⁵Tơdah ŭnh ưh tam mă sa sư oei 'lơ̆ng kư̆m ưh kơ đei gơh yua pơm kiơ; tơma khan ŭnh hloh sa boih, đĭ jing ngar rơnok wă gơh yua pơm kiơ dơ̆ng?”

⁶Na Kră Yang Tih Hloh khan: Thoi Inh đei iŏk 'long hơmu đơ̆ng lăm bri pơm 'long ŭnh tơkuh, Inh kư̆m gô pơm kơ kon pơlei Jêrusalem thoi noh.

⁷Inh gô tơwih muh măt blah plơ̆ lu sư, mă khan lu sư klaih dơ̆ng ŭnh boih ră, ŭnh gô sa lu sư; na lu sư gô băt Inh boih Kră Yang.

⁸Inh gô ăn kơ char âu jing juơ rơhiăng, yua kơ lu sư pơm yoch ưh kơ wă chu, Kră Yang Tih Hloh khan thoi noh.”