Read bahnar Ese 16 Bible Online

Ese 16 - bahnar bible

Ese 16

²“Ơ kon bơngai, athei tơbăt kơ Jêrusalem tơdrong lu sư pơm kơnê̆ krưp.

³Kră Yang Tih Hloh khan: ‘Khan bĕ kơ Jêrusalem thoi âu: Anih tơm rơh tơpŭ kơ ih đơ̆ng dêh char Kanaan, 'bă ih bơngai Amôrit, mĕ ih bơngai Hêtit.

⁴Tơdrong tơpŭ kơ ih thoi âu, lăm năr 'nao tơpŭ kơ ih, tơlei klŏk ih tam mă kăt, tam mă tơhum ih rơgoh, tam mă pung lơlĭ hăm 'boh, tam mă pôn hăm che.

⁵Ưh kơ đei bu lăng păng mơnat kơ ih, pơm tôm tơdrong noh kơ ih; đe klơ̆m tŭk ih tơ 'nguaih bri brah, yua kơ lăng ih krưp dêh năr 'nao tơpŭ kơ ih.

⁶Inh năm rok noh 'bôh ih pơpơ̆ lăm pham ih; Inh khan kơ ih mă oei lăm pham, “Arih bĕ!” Tơpă Inh khan kơ ih “mă oei lăm pham, “Arih bĕ.”

⁷Inh ăn kơ ih wơ̆ tih thoi 'long lăm mir, wơ̆ tih kơjung. Truh ih iung adruh wơ̆ 'lŏ, sŏk ih bluh kơjung, kơtơh ih rai tih mă-lei ih oei hang-hông koh hoh.

⁸Inh năm brih lăng 'bôh ih, sơnăm ih 'lŏ trŏ kơ sơnăm băt kơ hưch wă; Inh iŏk tơdrơi ao Inh tơsu kơ ih, klơ̆p tơdrong koh hoh ih. Inh pơkă păng pơgơ̆p hăm ih, ih jing gah Inh bơih, Kră Yang Tih Hloh khan thoi noh.

⁹Inh tơhum hơrao ih hăm đak, ôp rơgoh pham đơ̆ng akâu ih, păng pung kơ ih pơgang.

¹⁰Inh pơhrŭk ăn kơ ih ao dônh, tơ'bot ăn kơ ih chơkhŏ chuă păng akar, tơ̆n ăn kơ ih ao che 'bui, tơsu ăn kơ ih ao che tơpu hơdrông.

¹¹Inh iŏk tơmam pơguăng pơhrôp ăn kơ ih, tơ'bot ăn kong tơ ti, tơ'băk ăn kơ ih rơbưn tơ hơko.

¹²Đoh ăn gŏp tơ muh, đoh ăn maih tơ đon, pơyơ̆l ăn hơgăl pơkao tơ kơ̆l ih.

¹³Ih pơguăng hăm maih, hu, hrŭk ao tai che 'bui tanh hăm brai se, che tơpu hơdrông păng che dônh sĭt. Ih sa tơpŭng 'lơ̆ng hăm đak sut, đak rơmă ôliwơ. Ih jing 'lơ̆ng hơbŏ trŏ lăp thoi pơtao drŏ-kăn.

¹⁴Đơ̆ng tơdrong 'lơ̆ng hơbŏ ih jing ư-ang jơ̆p kơ lu dêh char, yua kơ tơdrong 'lơ̆ng rŏ hơbŏ liĕm, mă Inh 'măn kơ ih, Kră Yang Tih Hloh khan thoi noh.

¹⁵Mă-lei ih gơnang kơ tơdrong 'lơ̆ng liĕm kơdih akâu, yua kơ tơdrong đe ư-ang kơ ih, na ih jing pơm pơyô kư̆ kă chă pơjao akâu kơdih 'bĭch hăm lu bơngai chă năm rok brih găn.

¹⁶Ih iŏk ao tai wă pơrŏ pơm anih kơjung kơdih wă kơkuh pơyom, pơm pơyô kư̆ kă tơ noh. Tơdrong noh ưh kơ đei layơ trŏ lăp, ưh kơ layơ wă đei.

¹⁷Ih kư̆m iŏk tơmam pơhrôp pơm hăm maih, hu, mă Inh ăn kơ ih boih; ih pơm lu rup akâu drŏ-nglo, na pơm pơyô kư̆ kă hăm lu noh.

¹⁸Ih iŏk ao sĭt dônh tơsu kơ lu rup noh, iŏk đak rơmă ôliwơ, iŏk pơgang 'bâu phu Inh, na 'măn 'bơ̆t anăp lu sư.

¹⁹Tơmam sa mă Inh ăn kơ ih noh, tơpŭng 'lơ̆ng, đak rơmă ôliwơ, đak sut, Inh wă 'me rong ih, na ih chĕp pơyơ̆r pơm tơmam soi soh 'bâu phu 'bơ̆t anăp lu rup noh; noh tơdrong lu iĕm pơm, Kră Yang Tih Hloh khan thoi noh.

²⁰Ih kư̆m rôp lu kon drŏ-nglo kon drŏ-kăn ih, mă ih tơpŭ kơ Inh, năm pơyơ̆r ăn kơ lu rup yang noh sa. Dôm tơdrong pơm pơyô kư̆ kă bơih, noh ưh tam mă tôm mă

²¹Ih kư̆m pơlôch lu kon Inh, pơm tơmam soi 'buh ăn kơ rup yang noh hă?

²²Lăm dôm tơdrong kơnê̆ krưp, tơdrong pơm pơyô kư̆ kă, ih ưh kơ 'blŏk ôh kơplah năr oei nge, oei koh hoh, pơpơ̆ lăm pham kơdih.

²³Kră Yang Tih Hloh khan: Răm-'băm, răm-'băm tơpă kơ ih, kơ dôm tơdrong kơnê̆ 'mê̆-'mach ih đei pơm.

²⁴Ih kư̆m đei man pơjing kơ ih kơdih anih kơjung, pơdơ̆ng kơ ih anih kơjung lăm rim anih pơlei akŭm pơđâu.

²⁵Tơ rim kơ̆l trong tih ih đei pơjing anih kơjung kơ ih, hăm lăng ưh kơ gĭt tơdrong 'lơ̆ng hơbŏ ih, tĕch mơdro akâu ih tơ noh, pơyơ̆r akâu kơ lu bơngai yak brih găn pơm kư̆ kă.

²⁶Ih đei pơm pơyô kư̆ kă hăm lu bơngai Êyiptơ, lu bơngai mă oei jê̆ ih 'bĕnh hăm tơdrong kư̆ kă; ih kư̆m pơm pơyô kư̆ kă lơ tơdrong wă pơm tơblĕk Inh.

²⁷'Nâu Inh yơ̆r ti blah ih, iŏk lê̆ tơmam đơ̆ng ăn kơ ih păng pơjao ih kơ lu bơngai ayăt areh kơ ih, lu kon drŏ-kăn Philistin, lu bơngai mă kơdơ̆ mơlâu yua kơ tơdrong ih pơm pơyô kư̆ kă.

²⁸Ih đei pơm pơyô kư̆ kă hăm lu bơngai Asiri, yua kơ ih ưh kơ hrăp. Tơpă ih đei pơm pơyô kư̆ kă hăm lu sư boih, mă-lei tam mă hrăp.

²⁹Ih kư̆m đei pơm pơyô kư̆ kă hăm lu bơngai Kalđê char mơdro sa, mă-lei kư̆m ưh kơ hrăp.

³⁰Kră Yang Tih Hloh khan: Liơ jơhngơ̆m ih 'maih dêh ưh kơ kĕ kơ gơ̆t, ih đei pơm dôm tơdrong noh, ih pơm pơyô kư̆ kă thoi bơngai đi pă hrơ.

³¹Ih pơm anih kơkuh rim tơm trong, pơjing anih kơjung tơ rim anih akŭm pơđâu lăm pơlei; ih ưh kơ sĭ thoi bơngai drŏ-kăn pơm đi, yua kơ đe ưh kơ apah jên.

³²Ih bơih bơngai akăn pơm pơyô hăm đe, ih hưch kơ bơngai nai tơplih kơ klo ih.

³³Lu bơngai drŏ-kăn đi juăt kơ lu drŏ-nglo ăn tơmam, mă-lei ih ăn tơmam kơ đĭ-đăng lu bơngai ih hưch, iŏk răt lu sư năm đơ̆ng jơ̆p tơring wă kơ lu sư pơm pơyô kư̆ kă hăm ih.

³⁴Ih pơm phara kơ lu drŏ-kăn đi nai lăm tơdrong ih pơm pơyô kư̆ kă, lu đe ưh kơ răt ih, tă tơ ih apah đe dơ̆ng tơplih kơ đe apah ih, ih pha tơplơ̆ kơ lu bơngai nai.

³⁵Na ơ bơngai pơm đi, athei mơ̆ng bĕ nơ̆r Kră Yang.

³⁶'Nâu nơ̆r Kră Yang Tih Hloh khan: “Yua kơ ih tuh tơdrong 'mê̆-'mach pơdah tơdrong hang-hông 'bơ̆t ih pơm pơyô kư̆ kă hăm bơngai mă ih hưch wă, păng yua kơ ih kơkuh kơ lu rup yang kơnê̆ krưp, păng yua kơ ih pơyơ̆r pham lu kon ih kơ lu rup yang noh,

³⁷lei na Inh gô akŭm đĭ-đăng lu bơngai ih hưch ih wă, noh lu bơngai ih hưch hăm lu bơngai ih areh; Inh gô akŭm lu sư đơ̆ng jơ̆p kơ anih năm blah ih. Inh gô tơ'bôh ăn hang-hông ih 'bơ̆t anăp lu sư, lu sư gô 'bôh đĭ-đăng hang-hông ih.

³⁸Inh gô sek tơlang phak ih thoi lu drŏ-kăn pơm pơyô kư̆ kă ưh kơ lăng klo sư păng tuh pham pơlôch đe; Inh gô tuh pham hil mĭl păng gar ih.

³⁹Inh gô jao ih lăm tơpang ti lu bơngai mă ih hưch. Lu sư gô teh tơpăk anih kơjung ih păng teh tơlơ̆ lu anih ih juăt kơkuh, iŏk lê̆ tơmam ih pơguăng păng plôh yaih lê̆ hơbĕn ao ih, lê̆ ih akâu hoh.

⁴⁰Lu sư gô iŏk lu kon pơlei, klơ̆m ih hăm tơmo păng koh hơjăl ih hăm đao.

⁴¹Lu sư gô iŏk ŭnh soh hnam ih, phak pơmat ih 'bơ̆t anăp lu drŏ-kăn. Inh gô pơm kơ ih pă đei pơm pơyô kư̆ kă dơ̆ng păng ih ưh pă chă apah đe dơ̆ng.

⁴²Tơdrong hil Inh gô ngach, tơdrong Inh gar ih ưh pă đei boih, Inh gô oei hiôk ưh pă hil dơ̆ng.

⁴³Yua kơ ih ưh kơ 'blŏk kơplah ih oei 'lơ̆p sơ̆, na mă pơgreh Inh tôm tơdrong, thoi noh na Inh gô tuh pơdrâu tơ kơpal kơ̆l ih, Kră Yang Tih Hloh khan thoi noh; hăm trŏ kơ ih pơm pơyô kư̆ kă hăm thim đơ̆ng tơdrong kơnê̆ krưp mă Inh areh?

⁴⁴'Nâu đe gô pơma pơđơ̆k lăm nơ̆r pơma pơđơ̆k gah ih khan: “Mĕ liơ kon lei.”

⁴⁵Ih boih kon drŏ-kăn mĕ ih, bơngai hŭt tŭk lê̆ kon klo; ih jing oh kơ lu mŏ oh ih, bơngai mă hŭt tŭk lê̆ kon klo sư; mĕ ih bơngai Hêtit, 'bă ih bơngai Amôrit,

⁴⁶Mŏ ih Samari, oei hăm lu kon drŏ-kăn sư tơ gah yă-nơ̆m kơ ih; păng lu oh ih pơlei Sôđôm oei hơdai hăm lu kon drŏ-kăn sư tơ gah gơal kơ ih.

⁴⁷Ih ưh kơ năm kiơ̆ trong lu sư ôh hă? Ưh kơ pơm dôm lu tơdrong kơnê̆ 'mê̆ krưp lei-lăi kơ lu sư ôh hă? Mă-lei ih pơm rai kơnê̆ hloh kơ lu sư lăm dôm trong ih năm bơih.

⁴⁸Kră Yang Tih Hloh khan: Tơpă thoi Inh mă arih ling-lang, oh drŏ-kăn ih pơlei Sôđôm, kơdih sư păng lu kon drŏ-kăn sư ưh tam pơm tơdrong kơnê̆ thoi ih păng lu kon drŏ-kăn ih mă pơm boih.

⁴⁹'Nâu tơdrong yoch oh drŏ-kăn ih Sôđôm: Sư păng lu kon drŏ-kăn sư pơang, sŏng sa phĭ jơnap, tơmam sa rơkah rơkai, mă-lei ưh kơ tơgŭm lu bơngai dơnuh hin pơmat-tat.

⁵⁰Lu sư pơang, pơm yoch kơnê̆ krưp 'bơ̆t anăp Inh, na Inh gô pơrăm lu sư, thoi ih đei 'bôh boih.

⁵¹Samari pơm yoch tam đei minh puăt tơdrong, yoch mă ih đei pơm; ih pơm boih tơdrong kơnê̆ krưp hloh kơ lu sư. Thoi noh ih pơm kơ mŏ oh ih bơngai nhen thoi tơpăt 'biơ̆ kơ ih, yua kơ đơ̆ng đĭ-đăng tơdrong kơnê̆ ih pơm boih.

⁵²Ih jing pŭ iŏk tơdrong mơlâu yua kơ ih pơm kơ đe mŏ oh ih nhen thoi lu sư tơpăt, yua kơ tơdrong yoch ih pơm kơnê̆ hloh kơ lu sư, đe lăng lu sư tơpăt hloh kơ ih. Thoi noh ih pŭ iŏk bĕ tơdrong mơlâu, yua kơ ih pơm kơ đe mŏ oh ih nhen thoi lu sư jing tơpăt hloh kơ ih.

⁵³Inh gô ba brŏk Sôđôm hăm lu kon drŏ-kăn sư, păng Samari hăm lu kon drŏ-kăn sư ăn rơngei dơ̆ng păng ih hăm lu sư wih brŏk ăn rơngei.

⁵⁴Wă kơ ih pŭ iŏk tơdrong kơdơ̆ mơlâu tôm tơdrong ih hlôi pơm kơnê̆; na pơm thoi noh, ih gô pơlung lu sư ăn đe lăng mŏ oh ih nhen thoi lu sư ưh kơ yoch tih tŏ ih, bơngai tơpăt hloh kơ ih.

⁵⁵Mŏ oh ih, Sôđôm hăm lu kon drŏ-kăn sư gô wih hơlơ̆k thoi adrol sơ̆; Samari hăm kon drŏ-kăn sư kư̆m gô wih thoi adrol sơ̆. Ih păng lu kon drŏ-kăn ih kư̆m gô wih hơlơ̆k thoi adrol sơ̆.

⁵⁶'Bơ̆r ih ưh pă pơma 'bơm boih gah mŏ oh ih Sôđôm kơplah ih oei đei tơdrong pơang,

⁵⁷adrol kơ tơdrong kơnê̆ ih đe 'bôh bơih. Dang ei đei nơ̆r đe chrih kơ ih đơ̆ng lăm lu kon drŏ-kăn Êđôm hăm đĭ-đăng tơring sư, lu kon drŏ-kăn Philistin jum dăr ih, lu sư pơjăm ih tôm tơdrong.

⁵⁸Kră Yang khan: Ih athei pŭ iŏk tơdrong truh đơ̆ng ih pơm pơyô kư̆ kă păng tơdrong kơnê̆ krưp ih.

⁵⁹'Nâu Kră Yang Tih Hloh khan thoi âu: Inh gô pơm kơ ih kiơ̆ thoi tơdrong ih đei pơm, yua kơ ih tŭk lê̆ nơ̆r pơkă hăm hŭt lê̆ tơdrong pơgơ̆p Inh,

⁶⁰Mă-lei, Inh gô 'blŏk tơdrong pơgơ̆p mă Inh đei pơgơ̆p hăm ih kơplah ih oei 'lơ̆p. Inh gô pơm tơdrong pơgơ̆p 'nao khŏm khŏm ling-lang hăm ih.

⁶¹Kơplah ih sơng iŏk lu mŏ oh ih, ih gô 'blŏk kơ trong gơlong ih năm păng ih gô mơlâu; Inh gô ăn lu sư jing lu kon drŏ-kăn ih, mă khan lu sư ưh kơ đei lăm tơdrong pơgơ̆p Inh hăm ih.

⁶²Inh gô pơjing tơdrong pơgơ̆p Inh hăm ih, na ih gô băt inh boih Kră Yang;

⁶³Na ih gô 'blŏk păng mơlâu kơplah Inh đei mơnat ăn tôm tơdrong mă ih đei pơm, ih pă gơh ha 'bơ̆r pơma dơ̆ng yua kơ mơlâu, Kră Yang tih hloh khan thoi noh.”