Read bahnar Ese 17 Bible Online

Ese 17 - bahnar bible

Ese 17

¹Đei nơ̆r Kră Yang khan kơ inh:

²“Ơ kon bơngai, athei pơpơn, pơma pơđơ̆k păng pơtih gia kơ lu adrĕch Isơrael.

³Ih athei khan: ‘Kră Yang Tih Hloh khan: Đei klang tih, pơnăr să, sŏk pơnăr kơjung, sŏk hơ'bơ̆l đei sŏk dreng jơk, sem păr truh tơ char Liban. Sư kơchâu iŏk kơnhŏng 'long hơngo.

⁴Sư gơ̆ ba tơmơ̆ng 'long, chĕp ba truh tơ tơring char mơdro sa pơtăm lăm pơlei đe mơdro mơchan.

⁵Sư iŏk adrĕch găr 'long đơ̆ng teh noh chĕp ba pơtăm tơ anih teh 'lơ̆ng; sư pơtăm 'bơ̆t teh đei đak thoi 'long hla prai.

⁶'Long chăt kơchar, jing minh tơnơm 'long hơmu, kiĕr glĭp mă-lei kơđeh, dơng tơwih tơklă gah sem klang, mă-lei rơh sư granh sôr tơ ala; thoi noh, jing minh tơnơm hơmu, bluh hla păng chăt tơ'biĕng.

⁷Đei minh pôm sem klang tih nai, pơnăr să, sŏk lơ. Na tơm hơmu đơ̆ng lăm teh sư mă hlôi pơtăm, sôr rơh, bluh dơng tơwih tơklă gah sem klang noh wă kơ ruh đak.

⁸Mă khan tơm 'long hơmu pơtăm tơ lăm mir teh 'lơ̆ng jê̆ đak, bluh kơchar, đei plei jing tơm hơmu gĭt.

⁹Ih khan bĕ kơ lu sư: ‘'Nâu nơ̆r Kră Yang Tih Hloh khan: Tơm 'long hơmu noh hăm gơh jing 'lơ̆ng ưh? Hăm trŏ sem klang gô buch rơh sư, choh tơmơ̆ng sư, wă kơ đĭ lu hla dơng jing kro? Ưh kơ kăl ti pran kư̆m ưh kơ kăl lơ bơngai wă buch rơh sư.

¹⁰'Nâu, mă khan đe hlôi pơtăm sư tơ nai, sư hăm gơh chăt 'lơ̆ng ưh? Hla sư kư̆m ưh kơ jô đĭ hă? Mưh kial đơ̆ng gah hơlĕch tơthu, sư hăm gô kro hloi 'bơ̆t teh mă đe pơtăm chăt 'lơ̆ng boih?”

¹¹Đei nơ̆r Kră Yang khan kơ inh:

¹²“Khan bĕ kơ lu adrĕch 'maih blah plơ̆ noh: ‘Lu iĕm ưh kơ băt tơdrong noh wă khan kiơ hă?’ Khan kơ lu sư: ‘Pơtao Babilôn năm truh boih tơ Jêrusalem, rôp boih pơtao păng lu kră pơlei chông ba hăm sư tơ Babilôn.

¹³Pơtao rôp minh 'nu lăm adrĕch pơtao, pơgơ̆p hăm sư, athei sư pơkă. Pơtao kư̆m rôp ba lu bơngai pơgơ̆r lăm tơring noh hai,

¹⁴wă kơ dêh char âu rai tơrăn, kơdih sư ưh kơ kĕ kơ iung wei mă-lei athei wei tơdrong pơgơ̆p hăm pơtao wă kơ teh đak oei oei.

¹⁵Mă-lei pơtao dêh âu blah plơ̆ pơtao, wơh athei bơngai năm tơ char Êyiptơ wă apinh aseh, linh tơblah tơgŭm. Lu bơngai pơm thoi noh hăm kĕ jei ưh? Hăm gơh klaih hlôi ưh? Pơm thoi noh, lu bơngai mă pơrăm nơ̆r pơgơ̆p hăm gơh klaih ưh?

¹⁶Kră Yang Tih Hloh khan: Tơpă thoi Inh mă arih, pơtao 'nâu gô lôch tơ Babilôn lăm teh đak pơtao mă pôk sư pơm pơtao, yua kơ sư hŭt lê̆ nơ̆r pơkă păng pơrăm tơdrong pơgơ̆p hăm pơtao Babilôn.

¹⁷Pơtao Pharaôn hăm lu linh nuih kơtang păng lu linh lơlang ưh kơ năm tơgŭm sư kơplah đei tơdrong tơblah, kơplah lu đe bơ̆ bơnơ̆, pơm dur tăp dăr wă wang blah pơlôch lơ bơngai.

¹⁸Ih hŭt lê̆ nơ̆r pơkă, pơrăm lê̆ tơdrong pơgơ̆p âu, ih đei pơm dôm tơdrong 'nâu lei na sư ưh kơ gơh klaih.

¹⁹Na Kră Yang Tih Hloh khan: Tơpă thoi Inh mă arih ling-lang, Inh gô tuh tơ kơpal kơ̆l lu sư nơ̆r pơkă hơlĕnh pơrăm lê̆ tơdrong pơgơ̆p Inh.

²⁰Inh gô dăng hơnhuăl kơ sư, sư gô hrơ̆p 'bơ̆t hơnhuăl Inh; Inh gô chông lu sư tơ Babilôn, tơ noh Inh gô phak lu sư yua kơ tơdrong yoch mă sư ưh kơ chu kơ Inh.

²¹Đĭ-đăng lu linh sư mă pran kơtang hloh gô lôch kơ đao, hơlă, mă lu bơngai oei arih gô tơklah tơklang jơ̆p kơ kial. Na ih gô băt kơ, Inh boih Kră Yang, đei khan thoi noh.

²²'Nâu nơ̆r Kră Yang Tih Hloh khan: Inh gô iŏk kơnhŏng tơmơ̆ng 'long hơngo gô pơtăm sư. Inh gô gơ̆ iŏk tơmơ̆ng păng Inh gô pơtăm 'long noh kơpal kông kơjung.

²³Inh gô pơtăm 'long noh kơpal kông kơjung Isơrael; 'long noh bluh tơ'bla păng đei plei; jing 'long hơngo 'lơ̆ng đĭ-đăng. Lu sem gô pơm tơpu oei tơ noh, đĭ-đăng lu adrĕch đei pơnăr gô kôp tơ yơ̆p tơ'bla 'long noh.

²⁴Đĭ-đăng lu 'long tơ bri brah gô băt kơ Inh boih Kră Yang, tơjur lê̆ 'long kơjung na hơtŏk lu 'long kơđeh, pơm kơ 'long hơdrih jing kro, 'long kro jing hơdrih 'lơ̆ng. Inh boih Kră Yang đei khan păng gô pơm tơdrong noh.’ ”