Read bahnar Ese 21 Bible Online

Ese 21 - bahnar bible

Ese 21

¹Kră Yang khan kơ inh thoi âu:

²Ơ kon bơngai, tơwih bĕ muh măt tơ gah Jêrusalem; athei khan na blah anih 'lơ̆ng rơgoh, păng khan lê̆ adrol blah teh đak Isơrael.

³Khan bĕ kơ teh đak Isơrael: Kră Yang khan thoi âu: Âu, Inh năm wă phak lu iĕm. Inh gô toh đao Inh đơ̆ng hơnglop, pơrăm lu bơngai tơpăt păng lu bơngai kơnê̆ đơ̆ng lăm lu iĕm.

⁴Yua kơ Inh wă pơrăm lu bơngai tơpăt păng lu bơngai kơnê̆ đơ̆ng lăm lu iĕm, na inh toh đao Inh đơ̆ng hơnglop blah lu iĕm iŏk đơ̆ng gah gơal truh tơ gah yă-nơ̆m.

⁵Đĭ-đăng bơngai gô băt kơ Inh boih Kră Yang, gô toh đao đơ̆ng hơnglop păng ưh pă wơ̆t tah dơ̆ng!’

⁶“Ơ kon bơngai, gah ih ôr krao bĕ hăm jơhngơ̆m pơchah; athei ơh sơ'ngon ôr krao 'bơ̆t anăp lu sư.

⁷Tơdah lu sư jet ih: Yua kơ kiơ ih ôr krao? Ih tơl tơwih khan: Noh yua kơ đei kơtơ̆ng tơdrong 'nao truh, pơm kơ rim jơhngơ̆m gô pơchah hach, lu ti gô rơdu, jơhngơ̆m đon tơchĕng gô hơngơ̆t; gô rơdu. Tơdrong noh gô truh, nơ̆r noh gô đei tơpă, Kră Yang khan thoi noh!

⁸Kră Yang khan kơ inh:

⁹“Ơ kon bơngai, khan lê̆ adrol bĕ: Kră Yang khan thoi âu: Đao, đao pat han păng iel rang.

¹⁰Noh wă koh pơlôch, pat han wă koh pơlôch; iel rang thoi kơmlat, bơ̆n hăm hiôk dah ưh? Iĕm lăng pơhơi dêh kơ 'long jra pơtao, kon drŏ-nglo Inh păng lu 'long sơnguĕt sư.

¹¹Pla đao âu pơiel rang pơchĕp ăn 'bơ̆t ti đe. Pla đao pat han păng pơiel rang pơjao kơ bơngai mă chă pơlôch đe.

¹²Ơ kon bơngai, ôr nhơ̆m hmoi bĕ yua kơ đao noh wă blah kon pơlei Inh, blah lu yŏng pơgơ̆r Isơrael, đe jao boih lu sư kơ đao hăm lu kon pơlei Inh. Thoi noh sơ'ngon, pă đei tơdrong hơmĕng, tŭr kơtơh bĕ!

¹³Kră Yang khan: Đei tơdrong pơlong lăng truh, mă-lei tơdah lu iĕm kư̆m oei lăng pơhơi kơ 'long jra teh bơtho noh, lei tơdrong răm noh ưh kơ truh hă?

¹⁴Ơ kon bơngai, gah ih, khan lê̆ adrol bĕ, tap bĕ ti ih ăn kơ đao koh 'bar dah pêng wơ̆t; đao koh pơlôch lơ bơngai, pơrăm lơ bơngai: Đao gô wang chĭt tăp tang kơ lu sư.

¹⁵Noh pơm kơ jơhngơ̆m lu sư pơchah hach, đei lơ bơngai pơ̆k lôch, Inh đei dan boih đao wă pơlôch tơ rim 'măng jang lu sư. Ô! Đao pơm boih wă kơ pơlôch đe chơchêr thoi kơmlat; đe pơiel sư wă yua koh pơlôch.

¹⁶Pat mă han bĕ koh gah 'ma, 'bet gah 'ngiĕo, kiơ̆ kơ pla đao tơwih gah yơ.

¹⁷Inh gô tap ti wă kơ pơhrăp kơ tơdrong inh hil. Inh Kră Yang, khan thoi noh.

¹⁸Đei nơ̆r Kră Yang khan kơ inh:

¹⁹“Ơ kon bơngai, ih athei chrek 'bar tŏ trong ăn kơ đao pơtao char Babilôn wă truh, 'bar tŏ trong noh đơ̆ng minh pôm teh đak; athei chhơ̆ tơdra tơ'bôh 'bơ̆t kơ̆l trong năm mơ̆t tơ pơlei.

²⁰Athei chrek ăn trong kơ đao năm blah pơlei Rapba, bơngai Ammôn, păng minh trong năm blah dêh char Juđa truh tơ pơlei Jêrusalem pơlei kơjăp.

²¹Pơtao Babilôn dơ̆ng 'bơ̆t trong tơklah pêng, 'bơ̆t kơ̆l 'bar pah trong wă hlang lăng. Pơtao wă gơgŭ 'brơ̆m wă hlang lăng, apinh lu rup yang wă lăng lăng klơm sem soi pơyơ̆r.

²²Ti gah 'ma pơtao đei hlang lăng tơ'bôh gah pơlei Jêrusalem, athei dan tơmam tơblah wă pơrăm pơlei, nơ̆r wơh athei pơlôch ôr tơblah, dan tơmam tơblah wă pơrăm lu 'măng jang pơlei, sir sơlŭng bơ̆ man bơnơ̆ wang tăp dăr.

²³Lu bơngai Jêrusalem hlôi pơkă pơkăm kơjăp hăm sư, na đei tơchĕng 'bôh tơdrong hlang lăng noh tơ'bôh glăi, mă-lei pơtao đei tơ'blŏk kơ lu sư tơdrong yoch lu sư, na mă rôp phak lu sư jing bơnă.

²⁴Thoi noh, Kră Yang khan thoi âu: ‘Yua kơ lu iĕm tơ'blŏk kơ đe tơdrong yoch kơnê̆ lu iĕm, pơdah tơdrong yoch glăi iĕm, na đe 'bôh tơdrong yoch glăi lu iĕm đơ̆ng iĕm pơm; yua kơ lu iĕm tơ'blŏk, na đe gô rôp lu iĕm pơm bơnă.

²⁵Gah ih, ơ pơtao Isơrael pơm kơnê̆ kư̆ kă, năr ih truh boih kơ năr tôch wă phak.

²⁶Kră Yang khan thoi âu: Yaih bĕ nhiêu đơ̆ng kơ̆l, plôh bĕ môk pơtao, tơdrong dang ei ưh pă thoi sơ̆ boih! Bơngai kơđeh hơtŏk bĕ tơ kơjung, bơngai kơjung tơjur bĕ tơ ala.

²⁷Răm đĭ, răm đĭ, Inh gô pơrăm đĭ; tơdrong âu kư̆m ưh pă truh dơ̆ng bơih, dĭng truh tơ yŏng Tơ'ngla tơpăt hơnơ̆ng truh wă sek tơlang. Inh gô pơjao ăn kơ Sư tơdrong noh.

²⁸Gah ih, ơ kon bơngai, khan lê̆ adrol bĕ: Kră Yang khan thoi âu kơ adrĕch adrung Ammôn gah tơdrong lu sư che bơle kơ kon pơlei Isơrael. Athei khan kơ lu sư: Pla đao đe toh boih wă pơlôch. Đe pơiel rang thoi kơmlat.

²⁹Lu sư 'bôh tơdrong tơ'bôh hơlĕnh, hlang lăng tơdrong glăi ăn kơ lu iĕm, Đe dan đao tơ hơko lu iĕm pơm kơnê̆ krưp, lu iĕm mă năr lu sư truh boih. Truh boih kơ năr wă phak.

³⁰Tah bĕ đao lăm hơnglop! Lăm anih mă pơjing ih sơ̆, lăm char mă 'bok yă ih, Inh gô sek tơlang ih.

³¹Inh gô tuh tơdrong hil mĭl Inh tơ ih; Inh gô soh ŭnh tơdrong Inh blĕk tơ ih păng Inh gô pơjao ih ăn kơ lu bơngai kơnê̆, juăt kơ pơrăm đe.

³²Ih thoi 'long ŭnh wă tơkuh, pham ih gô lĕch lăm teh, ưh pă bu 'blŏk kơ ih dơ̆ng; yua kơ Inh Kră Yang khan thoi noh.’ ”