Read bahnar Ese 25 Bible Online

Ese 25 - bahnar bible

Ese 25

¹Đei nơ̆r Kră Yang khan kơ inh:

²Ơ kon bơngai, tơwih bĕ muh măt gah kon pơlei Ammôn păng khan lê̆ adrol blah lu sư.

³Athei khan kơ kon pơlei Ammôn: Athei mơ̆ng nơ̆r Kră Yang. Kră Yang khan thoi âu: Yua kơ ih đei che bơle khan: “Aha!” Kơ anih rơgoh Inh kơplah đe pơm pơ'mê̆ kơ sư, kơ dêh char Isơrael kơplah sư đĭ juơ, kơ adrĕch Juđa kơplah lu sư đe rôp pơm bơnă,

⁴na Inh gô pơjao ih kơ lu adrĕch adrung gah hơlĕch yua pơm tơmam sư. Lu sư gô pơm anih tơ lăm ih; păng oei tơ noh; lu sư gô phĕ sa plei 'long ih păng nhă đak toh ih.

⁵Inh gô ăn pơlei Raba jing tơmăn 'nhĕt ăn kơ seh lăk-đa păng đĭ-đăng pơlei lu bơngai Ammôn pơm anih lu sem dơrong oei pơdơh na lu iĕm gô băt Inh boih Kră Yang.

⁶Na Kră Yang khan thoi âu: Yua kơ ih tap ti, kơtrơ̆m jơ̆ng, jơhngơ̆m chơt hiôk 'nă hal păng pơjăm pơjuă teh đak Isơrael,

⁷na âu, Inh gô hiŏng ti phak ih, Inh gô pơjao ih kơ lu teh đak thoi tơmam đe tơtông tơgar, Inh gô puh tơweh ih đơ̆ng lu kon pơlei; inh gô pơlôch ih đơ̆ng lu teh đak. Inh gô pơrăm ih păng ih gô băt Inh boih Kră Yang.’ ”

⁸“Kră Yang khan thoi âu: ‘Môap păng Sêir đei khan: Âu lăng adrĕch Juđa kư̆m lei-lăi kơ char nai,

⁹na, âu inh gô pơrăm char Môap păng lu pơlei lăm char lu sư dĭng truh tơ pơlei mă tuch-luch, noh pơlei Bêtjêsimôt, pơlei Baal Mêôn păng pơlei Kiriahaim.

¹⁰Inh gô pơjao char Môap hăm lu bơngai Ammôn ăn kơ lu bơngai char gah hơlĕch iŏk yua, thoi noh lu adrĕch adrung Ammôn đe ưh pă 'blŏk boih tơ lăm lu char.

¹¹Inh gô phak lu Môap, na lu sư gô băt Inh boih Kră Yang.”

¹²“Kră Yang khan thoi âu: “Yua kơ kon pơlei Eđôm pơm mong blah hăm lu adrĕch Juđa păng pơm yoch kơplah pơm 'mong blah lu sư.

¹³Kră Yang khan: Inh gô yơ̆r ti Inh phak char Eđôm gô pơlôch đĭ bơngai păng lu sem dơrong noh; Inh gô pơm kơ char noh jing juơ đơ̆ng pơlei Thêman truh tơ pơlei Đêđan, lu sư gô pơ̆k lôch kơ đao.

¹⁴Inh gô yua ti kon pơlei Isơrael Inh; pơm 'mong blah char Eđôm kon pơlei noh gô pơm kơ char Êđôm kiơ̆ kơ tơdrong Inh hil mĭl păng Inh blĕk. Na lu sư gô băt kơ tơdrong Inh pơm 'mong, Kră Yang khan thoi noh.

¹⁵Kră Yang khan thoi âu: “Yua kơ kon pơlei Philistin pơm 'mong, pơm 'mong kiơ̆ kơ jơhngơ̆m areh ưh kơ đĭ đơ̆ng sơ̆ ki sơ̆ kach wă pơrăm char Juđa,

¹⁶Kră Yang khan: Yua kơ thoi noh na Inh gô yơ̆r ti phak Philistin; Inh gô tơhiong đĭ bơngai Kôrêthit; păng gô pơlôch đĭ lu bơngai mă oei arih tơter đak dơsĭ.

¹⁷Inh gô phak pơrăm hăm tơdrong hil mĭl tih, mưh Inh pơm mong blah lu sư, na lu sư gô băt Inh boih Kră Yang.”