Read bahnar Ese 27 Bible Online

Ese 27 - bahnar bible

Ese 27

¹Kră Yang khan kơ inh:

²“Ơ kon bơngai, nhơ̆m hmoi bĕ kơ pơlei Tirơ.

³Khan bĕ kơ pơlei Tirơ: Ih jing pơlei oei trong 'măng jang đak dơsĭ, mơdro sa hăm lơ pơlei oei lăm bŏl dơsĭ: Kră Yang khan thoi âu: ‘Ơ Tirơ, ih đei khan: Inh 'lơ̆ng hơbŏ tôm tĕch.

⁴Anih teh ih tơ tŏk-bŏk đak dơsĭ; lu bơngai mă pơdơ̆ng pơjing ih pơm kơ ih jing 'lơ̆ng hơiă.

⁵Đe yua tơ̆r 'long hơngo hmă đơ̆ng kông sênir pơm akâu thŏng-nan ih iŏk 'long hơngo đơ̆ng Liban pơm jrăng chô̆ che thŏng-nan ih;

⁶iŏk 'long kôih đơ̆ng char 'Basan pơm 'long huơ̆r iŏk 'long hơngo hmă đơ̆ng bŏl dơsĭ Kitim lơ̆k hơnă, lom hăm bơla rôih.

⁷Che rơmuăn đei reng đơ̆ng Êyiptơ dăng pĕng kial, thoi hla-kơ, che pơm yơ̆p noh hăm che dreng jơk hơhĭm đơ̆ng bŏl đak dơsĭ Êlisa.

⁸Kon pơlei Siđôn păng Arwat bơngai hơwơ̆r kơ ih; ơ pơlei Tirơ, lu bơngai hơgei lăm ih jing bơngai gơh huơ̆r oei hăm ih.

⁹Lu bơngai gơh hơmet păng lu bơngai hơgei đơ̆ng pơlei Gebal oei hơdai ih wă hơmet ming lu thŏng-nan răm. Đĭ-đăng lu thŏng-nan păng lu bơngai huơ̆r năm tơ ih, lăm chă mơdro tơplih băl tơmam.

¹⁰Lu bơngai char Pherơsơ, bơngai char Lŭt, bơngai char Phŭt lăm khŭl, linh ih, lu sư jing linh nuih kơtang lu sư hơtol khêl păng môk tơblah 'bơ̆t tơnăr ih, lu sư ba tơdrong ư-ang kơ ih.

¹¹Lu bơngai pơlei Arwat hăm lu linh Hêlek oei tơ kơpal tơnăr tăp dăr lu bơngai Gamat gak rim hnam gak. Lu sư hơtol khêl jum dăr kơ tơnăr pơm kơ ih jing 'lơ̆ng hơbŏ.

¹²Lu bơngai char Tarêsi mơdro hăm ih yua kơ ih đei tôm tơmam, lu sư iŏk hu, mam, kem, bơlơ̆k tơplih iŏk tơmam ih.

¹³Lu bơngai char Jawan, Tubal păng Mêsêk mơdro hăm ih, lu sư iŏk kong, iŏk lu bơngai đĭch tơplih iŏk tơmam đơ̆ng ih.

¹⁴Lu bơngai pơlei Tôgama iŏk seh tơblah păng aseh iĕ iŏk tơplih tơmam đơ̆ng ih.

¹⁵Lu bơngai pơlei Đêđan tĕch mơdro hăm ih, kon pơlei mă đei lơ bŏl teh lăm dơsĭ kư̆m tĕch mơdro hăm ih. Lu sư chĕp ba bơla rôih hăm 'long gơnhum tơplih tơmam ih.

¹⁶Lu bơngai char Siri mơdro hăm ih yua kơ ih đei mŭk tơmam lơ; lu sư iŏk tơmo jơmŏng, che rang, tơmam reng, che 'bui, che brai se, tơmo gĭt tơplih iŏk tơmam ih.

¹⁷Char Juđa păng teh đak Isơrael mơdro sa hăm ih; lu sư tĕch 'ba mi, 'ba tơ'bâu, 'bĕng 'ngam, đak sut, đak rơmă ôliwơ păng pơgang 'bâu phu wă tơplih iŏk tơmam ih

¹⁸Yua kơ ih pơjing đei mŭk tơmam tôm tĕch rơkah rơkai, na pơlei Đamach mơdro sa hăm ih, sư iŏk sik hơmu đơ̆ng Hêlbôn păng iŏk sŏk triu kok đơ̆ng pơlei sahar lu sư wă tơplih hăm tơmam ih.

¹⁹Bơngai Wêđan păng Jawan răt tơmam đơ̆ng Usal năm răt tơplih tơmam ih; chĕp ba đei mam, 'long hol 'long Kasa, 'long 'bâu phu.

²⁰Lu bơngai Đêđan mơdro hăm ih lu khăn pơm an aseh.

²¹Lu bơngai Arap păng lu yŏng tih tơring Kêđa mơdro hăm ih păng tĕch mơdro kơ ih triu kon, triu tơno păng bơbe bram.

²²Lu bơngai mơdro đơ̆ng pơlei Sêba păng pơlei Raama mơdro hăm ih, iŏk lu tơmam 'lơ̆ng gĭt, đĭ-đăng lu tơmo gĭt păng maih tơplih iŏk tơmam ih.

²³Bơngai mơdro đơ̆ng lu pơlei Haran, Kannê păng Êđen, Sêba, Asur păng Kilmat bơngai mơdro sa hăm ih.

²⁴Lu sư mơdro hăm ih lu hơbĕn ao tơpă kăp jên, che hơhĭm, che brai dônh păng ao reng, che lơ̆k hơnă đe tanh hăm lơ đak 'brê jơk păng tơlei kŭi kơjăp.

²⁵Lu duk đơ̆ng Tarêsi chơ tơmam mơdro ăn kơ ih na ih đei lơ tơmam rơkah rơkai păng chơ trăp tơpă lăm đak dơsĭ.

²⁶Lu bơngai huơ̆r kơ ih, ba ih lăm đak dơsĭ păng kial đơ̆ng gah hơlĕch bah pơrăm ih tơ lăm tŏk-bŏk đak dơsĭ.

²⁷Lu mŭk tơmam ih, tơmam mơdro mơchan ih bơngai huơ̆r duk, thơ̆ hơmet, bơngai mơdro, đĭ-đăng lu linh ih, hăm đĭ-đăng lu bơngai lăm thŏng-nan gô hiong răm môch lăm đak dơsĭ đĭ 'bơ̆t năr tơdrong răm truh kơ ih.

²⁸Kơtơ̆ng lu bơngai huơ̆r ôr krao, lu kon pơlei tơring jum dăr kơ ih hli tơtơ̆.

²⁹Đĭ-đăng lu bơngai huơ̆r duk, lu bơngai bơ̆jang, lu bơngai hơmet jur đĭ đơ̆ng duk tŏk đĭ tơ kông jih đak dơsĭ.

³⁰Lu sư gô nhơ̆m hmoi păng ơh sơ'ngon kơ ih, chup 'mui teh klă tơ kơ̆l kơdih păng tơglăng lăm tơnuh.

³¹Lu sư gô hơkôih kơ̆l 'ngôch, hrŭk su 'bi sơ'ngon yua kơ ih, jĭ jơhngơ̆m ơh sơ'ngon nhơ̆m hmoi ơh ol.

³²Kơplah nhơ̆m hmoi 'mêm kơeng lu sư hmoi jô̆ sơ'ngon kơ ih, hmoi thoi âu: Bu đei tơdrong truh thoi pơlei Tirơ, môch hiong biŏng lăm đak dơsĭ?

³³Kơplah ih chơ tơmam rok đak dơsĭ sơ̆. Ih pơm kơ lơ kon pơlei hiôk jơnap. Kơ tơmam lơ mah rơkah rơkai, ih pơm ăn mơdrŏng kơ lu pơtao lăm teh đak.

³⁴Dang ei hlôi răm krăm hiong lăm đak dơsĭ, mŭk drăm mơdro mơchan păng kon pơlei oei hơdai hăm ih kư̆m môch hiong hăm ih.

³⁵Đĭ-đăng kon pơlei oei lăm lu bŏl đak dơsĭ, lăng hlĭch chrêu tơpă yua kơ tơdrong truh kơ ih; pơtao lu sư hli tơrơ dêh muh măt lu sư hơ'brơ̆p hơ'brăp.

³⁶Lu bơngai mơdro mơchan hăm ih lăm teh đak, hơhôch tơhuăi ih, yua kơ ih đĭ hiong tôch krưp tơpă. Ih jing pă đei dơ̆ng hiong hlŏng hloi truh tơ ning-mônh.’ ”