Read bahnar Ese 28 Bible Online

Ese 28 - bahnar bible

Ese 28

¹Kră Yang khan kơ inh:

²“Ơ kon bơngai, khan bĕ kơ pơtao Tirơ: Kră Yang khan thoi âu; yua kơ jơhngơ̆m ih pơang, ih khan: “Inh jing yang hơ-oei kơpal tang-dŏ pơtao yang lăm tŏk-bŏk đak dơsĭ,” mă-lei ih kon bơngai đĕch, ưh kơ sĭ yang ôh mă khan ih tơchĕng khan ih hơgei thoi yang.

³“Âu, ih hơgei hloh kơ Đaniel; ưh kơ đei tơdrong kiơ gơh ôn kơ ih!

⁴Đơ̆ng tơdrong gơh hơgei hlôh wao, ih pơjing sa đei mŭk tơmam; ih kư̆m mong 'măn hu maih lăm hnam mong tơmam.

⁵Đơ̆ng tơdrong gơh hơgei mơdro sa noh ih jing mơdrŏng tih thoi noh na jơhngơ̆m ih pơang yua kơ ih mơdrŏng tih.

⁶Na Kră Yang khan thoi âu: Yua kơ ih khan jơhngơ̆m đon ih hơgei thoi jơhngơ̆m đon lu yang.

⁷Inh gô ăn lu teh đak nai năm blah ih lu kon pơlei mă pran kơtang hloh lăm lu dêh char iung blah ih; lu sư gô iŏk đao blah tơdrong hơgei păng tơdrong 'lơ̆ng rŏ ih, păng pơm 'mê̆ kơ tơdrong ư-ang ih.

⁸Lu sư gô tơlơ̆ ih lăm sơlŭng jrŭ păng ih gô lôch hăm tơdrong lôch krưp dêh lăm đak dơsĭ.

⁹'Bơ̆t anăp lu bơngai pơlôch ih, ih hăm pơ̆n pơma; “Inh âu yang?” Tơpă ih bơngai đĕch, ưh kơ sĭ yang ôh, lăm ti lu bơngai pơlôch ih.

¹⁰Ih gô lôch nhen thoi bơngai tam mă kăt tơdra akar. Lăm ti lu bơngai tơmoi, yua kơ Inh khan boih, Kră Yang khan.’”

¹¹Kră Yang khan kơ inh:

¹²“Ơ kon bơngai, nhơ̆m hmoi kơ pơtao Tirơ bĕ khan kơ sư: ‘Kră Yang khan thoi âu: Ih bơngai đei tôm tơdrong gơh hơgei, 'lơ̆ng rŏ.

¹³Ih oei tơ pơgar Êđen, pơgar Kră Yang 'Bok Kei-Dei. Ih pơguăng hăm tơmam tơmo gĭt thoi jơmŏng tơmo jasper, tơmo saphirê, tơmo Shơkêđô tơmo samarađô, tơmo siađô, tơmo krisôlia, tơmo borelô, tơmo tôpasiô, ih hling hrâu hăm maih dơ̆ng. Đơ̆ng năr mă đei pơjing ih đei hơmet lê̆ boih dôm tơmam noh.

¹⁴Đe tuh kơ ih đak rơmă wă pơm chêrubim gak bơwei. Inh dan ih tơ kơpal kông rơgoh Kră Yang 'Bok Kei-Dei; ih yak năm tŏk-bŏk jơmŏng rang hơdah thoi ŭnh.

¹⁵Đơ̆ng năr pơjing kơ ih, trong ih yak đe ưh kơ đei wă gơh chrih dĭng tơ năr 'bôh tơdrong kơnê̆ truh tơ ih.

¹⁶Đơ̆ng ih mơdro sa tih đei mơdrŏng ih pơm kơnê̆ păng yoch; thoi noh na, ơ chêrubim gak bơwei, Inh puh lê̆ ih đơ̆ng kông Kră Yang 'Bok Kei-Dei; păng pơlôch ih đơ̆ng lu jơmŏng rang hơdah thoi ŭnh.

¹⁷Jơhngơ̆m ih pơang yua kơ ih 'lơ̆ng. Tơdrong ư-ang ih pơm kơ ih hiong răm tơdrong gơh hơgei. Inh klơ̆m hŭt ih tơ teh 'bơ̆t anăp lu pơtao, Inh jao ih wă ăn kơ lu sư lăng.

¹⁸Đơ̆ng tơdrong yoch păng mơdro sa hơlĕnh, ih pơm pơ'mê̆ kơ anih rơgoh ih. Yua kơ thoi noh Inh gô ăn ŭnh lĕch đơ̆ng tŏk-bŏk ih wă soh ih păng wă pơm kơ ih jing thoi tơnuh kơpal teh 'bơ̆t anăp lu bơngai gô lăng.

¹⁹Đĭ-đăng lu bơngai lăm lu adrĕch drung băt kơ ih, gô lăng ih chrơp. Ih gô truh tơ anih tôch krưp tơpă. Ih jing pă đei dơ̆ng tơ̆p ning-mônh.’ ”

²⁰Kră Yang khan kơ inh:

²¹“Ơ kon bơngai tơwih bĕ muh măt ih gah pơlei Siđôn, khan lê̆ adrol blah sư.

²²Khan bĕ kơ sư: Kră Yang khan thoi âu: Ơ pơlei Siđôn, âu, Inh blah ih; Inh wă kơ đei ư-ang lăm ih. Lu sư gô băt inh boih Kră Yang, kơplah inh sek tơlang phak ih wă tơ'bôh tơdrong rơgoh Inh.

²³Inh gô ăn tơdrong lôch hơbuh truh lăm pơlei, tuh pham lĕch sĕch huŏng jơ̆p kơ trong. Lu bơngai pơ̆k lôch tơ lăm pơlei, yua kơ đao blah lu sư đơ̆ng puăn pah; na lu sư gô băt Inh boih Kră Yang.

²⁴Kơplah noh lu bơngai Isơrael pă đei jơla trŏ, jơla wek đơ̆ng lăm lu teh đak oei jum dăr kơ lu sư, lu teh đak mă ngăl areh. Đơ̆ng noh lu sư gô băt Inh boih Kră Yang.

²⁵Kră Yang khan thoi âu: “Kơplah Inh akŭm lu adrĕch Isơrael brŏk đơ̆ng lu kon pơlei mă lu sư oei tơklah tơklang, Inh gô tơ'bôh tơdrong 'lơ̆ng rơgoh Inh tơ lăm lu sư 'bơ̆t anăp lu teh đak. Na lu sư gô oei tơ lăm teh đak mă Inh ăn boih kơ đĭch đam Inh Jakôp.

²⁶Lu sư oei tơ noh hiôk-hian, pơm hnam pơtăm hơmu. Lu sư oei tơ noh hiôk-hian kơplah Inh sek tơlang phak lu teh đak jum dăr lu sư, lu bơngai mă areh kơ lu sư. Lu sư gô băt Inh bơih Kră Yang 'Bok Kei-Dei lu sư.