Read bahnar Ese 29 Bible Online

Ese 29 - bahnar bible

Ese 29

¹Khan lê̆ adrol blah char Êyiptơ Sơnăm mă mơjĭt, khei mơjĭt, năr mơjĭt-'bar, Kră Yang khan kơ inh:

²“Ơ kon bơngai, blah bĕ Pharaôn, pơtao Êyiptơ, khan lê̆ adrol blah sư păng đĭ-đăng char Êyiptơ.

³Pơma khan kơ sư: Kră Yang khan thoi âu: “Ơ Pharaôn, pơtao Êyiptơ, âu Inh blah ih, ih jing sem brem tih kơnê̆ oei 'bĭch lăm đak glung. Ih khan: “Đak krong Nil noh gah Inh, đêl Inh kôch pơm sư.

⁴Inh gô wŏk kang ih păng ăn lu ka đơ̆ng lăm đak glung ih gô đom tơwŏk tơ kơchap ih. Inh gô dui hơđuh ih păng đĭ-đăng lu ka đơ̆ng lu đak glung mă đom tơwŏk tơ kơchap ih hơtŏk tơ kông.

⁵Inh gô klơ̆m hŭt lê̆ ih tơ char glă, Ih hăm lu ka lăm đak glung ih. Ih gô pơ̆k tơ lăm bri; pă đei bu iŏk păng ưh kơ đei bu dônh 'bŭ. Inh gô ăn ih jing tơmam sa ăn kơ sem bri ala teh păng lu sem păr tơ plĕnh.

⁶Na đĭ-đăng kon pơlei Êyiptơ gô băt Inh boih Kră Yang, ih thoi 'long jra hăm 'nhĕt gơlar kơ adrĕch adrung Isơrael.

⁷Lăp lu sư rôp ih hăm ti, na ih pơchah tơgơ̆ đĭ, hiĕt hơngiĕng lu sư; lu sư gơning 'bơ̆t ih, na ih tơgơ̆ pơm kơ lu sư pơ̆k tơgơ̆ kơiĕng.

⁸Kră Yang khan: Âu, Inh chĕp đao wă phak ih Inh gô pơlôch đĭ bơngai hăm đĭ lu sem dơrong đơ̆ng ih.

⁹Char Êyiptơ gô jing juơ rơhiăng pă đei. Păng lu sư gô băt Inh boih Kră Yang. Yua kơ ih khan: Krong Nil noh krang đơ̆ng đêl inh kôch pơm sư,

¹⁰lei na 'nâu, Inh blah ih păng lu krong ih, Inh gô pơm kơ char Êyiptơ iŏk đơ̆ng pơlei Mikdôl păng pơlei Aswan truh tơ hơdral Êthiôpi jing juơ tơtŭng.

¹¹Ưh pă đei tơpang jơ̆ng bu yak rok noh, kư̆m pă đei jơ̆ng sem bri yak năm trong noh, kư̆m ưh pă đei kon pơlei oei tơ noh dơ̆ng, lăm puăn-jĭt sơnăm.

¹²Lăm puăn-jĭt sơnăm Inh gô pơm kơ char Êyiptơ jing juơ rơhiăng lăm tŏk-bŏk lu char juơ rơhiăng păng lu pơlei sư pơchah răm tŏk-bŏk lăm pơlei mă pơchah răm Inh gô pơm kơ kon pơlei Êyiptơ tơklah tơklang tơ lăm jơ̆p kơ dêh char.

¹³Tơpă Kră Yang khan: “Hlôi kơ puăn-jĭt sơnăm, Inh gô akŭm kon pơlei Êyiptơ dơ̆ng, đơ̆ng lăm lu kon pơlei mă lu sư tơklah tơklang oei tơ noh.

¹⁴Inh gô chông lu bơngai bơnă Êyiptơ wih păng năm ba lu sư wih tơ char Patrôs jing teh mă lu sư kơdih sơ̆ mă-lei tơ noh lu sư pơjing char pơtao pơgơ̆r iĕ.

¹⁵Char Êyiptơ jing iĕ hloh kơ lu char nai, ưh pă gơh tơiung kơdih hloh kơ lu char nai dơ̆ng; Inh gô ăn lu sư iĕ hloh, wă kơ lu sư pă gơh pơgơ̆r lu char nai dơ̆ng.

¹⁶Char Êyiptơ ưh pă anih mă lu adrĕch Isơrael gơnang hơmĕng dơ̆ng mă-lei oei tơ'blŏk kơ lu sư tơdrong yoch kơnê̆ đêl lu sư pơm; păng lu sư gô băt Inh boih Kră Yang.

¹⁷Lăm sơnăm 'bar-jĭt tơpơh, năr mă mônh khei mônh, Kră Yang khan kơ inh:

¹⁸“Ơ kon bơngai, Nebukatnessar pơtao đe Babilôn, pơm ăn kơ lu linh sư jang gleh anat wă blah pơlei Tirơ; kơ̆l lu sư jing 'ngôch, hơngiĕng lu sư luih pơtao noh hăm lu linh sư mă khan blah pơlei Tirơ, hrat pơmat thoi noh ră kư̆m kơbĭ đei kiơ.

¹⁹Na, Kră Yang khan: Âu, Inh gô pơjao char Êyiptơ ăn kơ Nebukatnessar pơtao Babilôn; sư gô iŏk chĕp ba tơmam noh păng tơgar iŏk lu tơmam nai păng pơjei iŏk teh; noh boih tơmam apah kơ lu linh sư.

²⁰Inh gô pơjao char Êyiptơ ăn kơ sư wă apah tơdrong pơmat gleh sư hlôi blah iŏk, yua kơ sư đei bơ̆jang kơ Inh. Kră Yang khan thoi noh.

²¹Lăm năr noh, Inh gô ăn kơ adrĕch adrung Isơrael, chăt hơke jing pran thoi sem brem păng Inh gô ăn kơ ih Êsêkiên gơh pơih 'bơ̆r pơma tŏk-bŏk lu sư; na lu sư gô băt Inh boih Kră Yang.”